Ua fanauhia vau i 1955, e toru tamaroa matou, o vau te hopea. Ua paari au i te pae apatoa o Filelane, i te oire o Vantaa.

Ua bapetizohia to ˈu mama ei Ite no Iehova tau matahiti hou vau a fanauhia ˈi. Mea patoi râ to ˈu papa i te parau mau e aita oia i hinaaro ia haapii to ˈu mama ia matou aore ra ia afai ia matou i te mau putuputuraa. E haapii ïa o mama ia matou i te mau haapiiraa tumu Bibilia aita anaˈe papa i te fare.

Mai to ˈu tamarii-rii-raa mai â, ua faaroo noa vau ia Iehova. Ei hiˈoraa, i te 7raa o to ˈu matahiti, ua riri roa ta ˈu orometua haapii no te mea aita vau i amu i te faraoa pai e toto to roto, parauhia verilättyjä. Ua tamata oia i te haamǎmǎ i to ˈu vaha no te faahepo ia ˈu ia amu i te faraoa pai. Ua roaa râ ia ˈu ia haru i te patia mai roto mai i to ˈna rima.

I te 12raa o to ˈu matahiti, ua pohe to ˈu papa. Ua nehenehe atura ïa vau e haere i te mau putuputuraa. Ua hamani maitai te mau taeae o te amuiraa ia ˈu, e ua tauturu te reira ia ˈu ia piri atu â ia Iehova. Haamata ihora vau i te taio i te Bibilia pauroa te mahana e i te haapii tamau i ta tatou mau papai. Maoti te reira i bapetizohia ˈi au i te 14raa o to ˈu matahiti, i te 8 no Atete 1969.

 I te otiraa iho â ta ˈu tau haapiiraa, ua riro mai au ei pionie tamau. Tau hebedoma i muri iho, ua haere au e tavini i Pielavesi, i Filelane, e hinaarohia te tauturu i reira.

I Pielavesi to ˈu farereiraa i ta ˈu vahine here o Sirkka. Ua au roa vau i to ˈna aau faahaihai e here rahi ia Iehova. Aita oia i titau i te tiaraa teitei aore ra te oraraa fanaˈo. Ua hinaaro mâua toopiti e horoa i te mea maitai roa ˈˈe na Iehova i roto i te mau huru taviniraa atoa. Ua faaipoipo mâua i te 23 no Mati 1974. I muri iho i to mâua faaipoiporaa, ua reva mâua e tavini i Karttula, e hinaaro-rahi-hia te taata poro i reira.

Mai te haamataraa mai o to mâua faaipoiporaa, ua faaite Iehova e e aupuru oia ia mâua ia tuu mâua i ta ˈna Faatereraa arii na mua roa. (Mat. 6:33) Ei hiˈoraa, i Karttula, aita to mâua e pereoo uira, e pereoo tataahi noa râ. Mea fifi râ i te tau toˈetoˈe. E hinaarohia hoi te pereoo no te poro i te tuhaa fenua aano a te amuiraa. Aita râ ta mâua e moni no te hoo mai i te hoê pereoo.

Ma te manaˈo-ore-hia, ua haere mai to ˈu tuaana e hiˈo ia mâua. Ua vaiiho mai o ˈna i to ˈna pereoo. Ua pee ê na te parururaa pereoo. Te mori noa ïa ta mâua e aufau. Mea na reira te noaaraa mai to mâua pereoo.

Ua faaite mai Iehova e na ˈna iho â e aupuru ia mâua. Ta mâua noa tuhaa, e haapao na mua roa i te mau ohipa tei taaihia i te Faatereraa arii.

I te Haapiiraa no te mau pionie i 1978, ua faaitoito Raimo Kuokkanen, a hoê o na taeae haapii, ia mâua ia haere i te Haapiiraa no Gileada. Haapii atura ïa mâua i te reo Beretane. Hou râ mâua a faaî ai i ta mâua aniraa no Gileada, ua tonohia mâua i te amaa no Filelane i 1980. I tera mau matahiti, e ere te Haapiiraa no Gileada no te mau mero o te Betela. Ua hinaaro râ mâua e tavini ia Iehova i te vahi ta ˈna, eiaha râ ta mâua, e manaˈo ra e mea maitai aˈe. Farii atura ïa mâua e tavini i te Betela. Ua tamau râ mâua i te haapii i te reo Beretane no te mahana noa ˈtu e fanaˈo ai mâua i te Haapiiraa no Gileada.

 Tau matahiti i muri aˈe, ua haafanaˈo te Tino aratai i te mau mero o te Betela i te Haapiiraa no Gileada. Faaî ihora ïa mâua i ta mâua aniraa, e ere râ no te mea aita mâua e oaoa ra i te Betela. E ere roa ˈtu! Ta mâua noa i hinaaro, e tavini i te mau vahi e hinaaro-rahi-hia te tauturu, mai te peu e nehenehe ta mâua. Ua fariihia mâua i Gileada i te 79raa o te piha haapiiraa, e i Tetepa 1985 te hoperaa taua haapiiraa ra. Ua tonohia mâua i Colombie.

I Colombie, ua tonohia mâua na mua i te amaa. Ua haapao maite au i ta ˈu taviniraa i reira. Hoê râ matahiti i muri aˈe, ua manaˈo vau e hinaarohia te tahi tauiraa. A tahi ra ïa vau i ani ai e taui i te taviniraa. E i tera noa taime to ˈu na reiraraa. Ua tonohia ˈtura ïa mâua ei mitionare i Neiva, hoê o na oire i Huila.

Mea au roa iho â na ˈu te pororaa. I to ˈu taviniraa ei pionie taa noa i Filelane, i te tahi taime e poro vau mai te aahiata e ahiahi noa ˈtu. I muri iho i to mâua faaipoiporaa, e poro atoa mâua Sirkka i te mahana taatoa. Mai te peu mea atea te tuhaa fenua, e taoto ïa mâua i roto i te pereoo i te tahi mau po. E nehenehe ïa mâua e haamata oioi i te poipoi aˈe.

I roto i te taviniraa mitionare, aita to mâua anaanatae no te pororaa i iti mai. Ua rahi mai te amuiraa, e te mau taeae e tuahine no Colombie, mea faatura ïa, î i te here e te mauruuru.

I pihai iho noa mai i ta mâua tuhaa taviniraa i Neiva, te vai ra te oire aita e Ite no Iehova. Ua feruriruri au e nafea te parau apî oaoa e tae ai i ǒ. Mea atâta hoi no to rapaeau ia haere i taua mau oire ra no te aroraa orure hau. Pure ihora ïa vau e ia riro mai hoê taata na reira ei Ite no Iehova. Ua manaˈo vau e mea maitai aˈe ia haere mai taua taata ra i Neiva, i reira hoi oia e ite ai i te parau mau. Pure atoa ihora ïa vau e ua oti anaˈe oia i te bapetizohia, ua paari maitai ïa taua taeae ra i te pae varua o te hoˈi e poro i to ˈna oire. Aita râ vau i ite e ravea maitai aˈe ta Iehova.

I muri rii iho, ua haapii au i te Bibilia i te hoê taata apî o Fernando González te iˈoa. E faaea oia i Algeciras, hoê o na oire aita e Ite no Iehova. I Neiva oia e rave ai i te ohipa hau i te 50 kilometera te atea. Mea faaineine maitai o ˈna i ta ˈna haapiiraa e aita oia i haamarirau i te haere i te mau putuputuraa atoa. I tera iho â hebedoma matamua i haapii ai oia, e amui mai o ˈna vetahi o to ˈna oire no te faaite i ta ˈna i apo mai i roto i ta ˈna haapiiraa Bibilia.

E ono avaˈe i muri iho i ta ˈna haapiiraa, ua bapetizohia Fernando i Tenuare 1990. Riro maira oia ei pionie tamau. Ua nehenehe atura ïa te amaa e tono i te pionie taa ê i to ˈna oire, inaha e Ite no Iehova to reira no ǒ iho â. I Fepuare 1992, ua haamauhia te hoê amuiraa i taua oire ra.

Ua poro anei Fernando na to ˈna noa oire? Aita! I muri iho i to ˈna faaipoiporaa ia Olga, ua haere raua i San Vicente del  Caguán, te tahi atu oire aita e Ite no Iehova. I reira, ua apiti raua i te haamauraahia te hoê amuiraa. I 2002, ua faatoroahia Fernando ei tiaau haaati. To roto noa raua Olga i te taviniraa haaati tae roa mai i teie mahana.

I teie tupuraa, ua haapii mai au e mea faufaa roa ia pure no te tahi mau mea taa maitai i roto i ta tatou taviniraa. Na Iehova e rave i tei ore e maraa ia tatou. Inaha, o ˈna te Fatu o te auhune, e ere o tatou.—Mat. 9:38.

I 1990, ua tonohia mâua i roto i te taviniraa haaati, na mua i te oire pu o Bogota. Ua taiâ mâua, aita hoi to mâua e aravihi taa ê e aita mâua i matau i te huehue i taua oire ra. Ua tapea râ Iehova i ta ˈna parau fafau i roto i te Philipi 2:13: “O te Atua hoi te haapuai ia outou e te tuu i roto ia outou i te hinaaro e te puai no te rave i te mau mea atoa ta ˈna e au.”

I muri aˈe, ua tonohia mâua i roto i te taviniraa haaati i Medellín, te oire ta ˈu i faahiti i te omuaraa. No te mea ua matau roa to reira mau taata i te haavîraa uˈana, eita ratou e huru ê. I te hoê mahana, a faatere ai au i te hoê haapiiraa Bibilia i te fare o te hoê piahi, faaroo ihora vau i te paaina pupuhi na rapae mai. Mai marua vau. Te piahi râ, aita ïa i aueue noa ˈˈe a taio noa ˈi i te paratarafa. I te otiraa ta ˈna taioraa, taie atura oia i rapae e hoˈi maira e e piti tamarii rii. Parau mǎrû maira oia: “Eiaha e haapeapea, ua tii noa ˈtu vau i ta ˈu na tamarii.”

I te tahi atu mahana, a poro ai mâua na tera e tera fare, ua horo mai ta ˈu vahine ma te riaria. Parau maira oia e taata tei pupuhi ia ˈna. Ua oti roa vau. I muri iho râ, taa ihora ia mâua e ere o Sirkka ta tera taata i pupuhi, te tane râ tei na pihai iho roa mai ia Sirkka.

I muri aˈe, aita ˈtura mâua i taiâ faahou. Ua faaitoito mai te faaoromai o te mau taeae e tuahine no reira o tei faaruru i teie mau tupuraa atâta. Na ô ihora ïa mâua e mai te peu e te tauturu ra Iehova ia ratou, e tauturu atoa ïa o ˈna ia mâua. Ua pee noa mâua i te mau aˈoraa a te mau matahiapo o te amuiraa, ua haapao maitai, e ua vaiiho ia Iehova ia aratai ia mâua.

Parau mau, e ere pauroa te tupuraa te mea atâta. I te hoê mahana, ua faaroo vau i te maniania, e au ra e piti vahine te tuhi ra te tahi i te tahi i rapae mai i te fare to reira vau. Aita vau i hinaaro e mataitai i tera tatamaˈiraa, ua onoono râ te fatu fare ia haere au i to ˈna taupee. Ite ihora vau e piti manu paraparau tera e “tatamaˈi” ra mai ta te taata ra.

I 1997, ua faatoroahia vau ei taeae haapii i te Haapiiraa faaineineraa no te taviniraa. b  Mea au noa iho â na ˈu e haere i te mau haapiiraa a te faanahonahoraa. Aita râ vau i manaˈo noa ˈˈe e fanaˈo i te haamaitairaa e horoa i te haapiiraa.

I muri aˈe, ua tavini au ei tiaau mataeinaa. I te faaoreraahia taua faanahoraa ra, ua hoˈi au i roto i te taviniraa haaati. Hau ïa i te 30 matahiti to ˈu taviniraa ei taeae haapii e ei tiaau ratere. Mea rahi te haamaitairaa ta ˈu i fanaˈo. E ere râ mea ohie i te mau taime atoa.

No to ˈu huru aueue ore, ua nehenehe au e faaruru i te mau tupuraa fifi. I te tahi râ mau taime, ua onoono roa vau ia faaafarohia te tahi mau fifi i roto i te mau amuiraa. I te hoê mahana, ua aˈo roa vau i te tahi mau mero ia faaite i te here e te huru au noa ia vetahi ê. A hiˈo na! O vau noa iho â te ere ra i taua mau huru maitatai ra.—Roma 7:21-23.

I te tahi mau taime, e toaruaru roa vau no to ˈu mau paruparu. (Roma 7:24) I te hoê mahana, ua parau roa vau ia Iehova mea maitai aˈe ia vaiiho vau i te taviniraa mitionare no te hoˈi i Filelane. I taua po ra, i te hoê putuputuraa, maoti te tahi faaitoitoraa ta ˈu i faaroo, faaoti ihora vau e faaea noa i roto i ta ˈu taviniraa, a tamau ai i te haavî i to ˈu huru tia ore. Ua putapû roa vau i ta Iehova pahonoraa i ta ˈu pure tae roa mai i teie mahana. Te mauruuru roa nei au ia ˈna no ta ˈna tauturu hamani maitai e haavî i to ˈu mau paruparu.

Te mauruuru roa nei mâua Sirkka ia Iehova no te haamaitairaa e tavini ia ˈna ma te taime taatoa e rave rahi matahiti. Te mauruuru roa atoa nei au ia Iehova no te horoaraa mai i te hoê vahine î i te here e te taiva ore.

Fatata to ˈu e 70 matahiti e eita vau e tavini faahou ei taeae haapii e ei tiaau ratere. Aita râ vau e peapea ra. No te aha? No te mea ua papu roa ia ˈu e te mea o te faahanahana ia Iehova, o te taviniraa ïa ia ˈna ma te aau faahaihai e te arueraa ia ˈna ma te aau î i te here e te mauruuru. (Mika 6:8; Mar. 12:32-34) No te faahanahana ia Iehova, eita e hinaarohia te tahi haamaitairaa faahiahia.

Ia hiˈo vau i te mau haamaitairaa ta ˈu i fanaˈo, e ere ïa no te mea mea maitai aˈe aore ra mea aravihi aˈe au ia vetahi ê. E ere roa ˈtu! Ua horoa mai râ Iehova i te reira no to ˈna hamani maitai rahi, noa ˈtu to ˈu mau paruparu. Ua ite au e maoti noa Iehova i maraa ˈi ia ˈu taua mau fanaˈoraa taa ê ra. Na roto ïa i to ˈu mau paruparu i ite-maitai-hia ˈi te puai o te Atua.—Kor. 2, 12:9.