Te manaˈo nei hoê pǔpǔ aivanaa e o te taata paha te tahi tumu o te aueueraa fenua i tupu i 2011 i Lorca, e oire i te pae apatoerau hitia o te râ i Paniora. I muri aˈe i te reira, e iva taata tei pohe e e ahuru ma piti tei pepe. Ua itehia mai e te feia hiˈopoa i te fenua e ua tupu te aueueraa fenua i haapohe rahi i te taata i te vahi i heruhia no te pâmu i te pape no te mau faaapu.

E 102 miria moni Marite ta te mau ratere no te fenua Taina i haamâuˈa a reva ˈi na te ara i 2012. Ia au i te Faanahonahoraa no te mau ratere na te ao, o Taina te fenua e haamâuˈa roa ˈˈe i te moni i te ara. I muri noa mai, o Heremani e Marite. No na fenua hopea nei e piti, e haamâuˈa te fenua taitahi fatata e 84 miria moni Marite.

Ia au i te tahi faatiaraa i roto i te hoê vea i Beretane no nia i te ea (BMJ), ua hiˈopoahia tau 68 000 taata i te fenua Tapone fatata e 23 matahiti. Ia au i te feia hiˈopoa, ua itehia e no te mau vahine i puhipuhi i te avaava hou i te 20 matahiti e ua fanauhia mai te 1920 e tae atu 1945, e pohe ratou hoê ahuru matahiti na mua ˈˈe i te vahine i ore i na reira. No te mau tane, e pohe ïa e vau matahiti na mua ˈˈe.

Ua opanihia ia hoo mai i te ara, ia hamani e ia faaohipa i te puohu e haafifi i te animara i roto i te miti e to nia i te fenua ia amu ratou i te reira. Te faaitoito nei te faatereraa ia faaohipa i te puohu o te ore e tuino i te natura.

No te mau ati natura, fatata e 50 tiahapa miria moni Marite te pau a te mau taiete parururaa i te matahiti. No te maraaraa o te hoo, ua tataipiti to ratou pau i te mau ahuru matahiti atoa mai 1980 mai.