A faaineine no te mau haafifiraa

“Ua faaoti au e faaea i te avaava no ta mâua aiû tei fanauhia mai ra. No reira vau i tuu ai i te hoê iri papai ‘Eiaha e puhipuhi i te avaava’ i roto i to ˈu fare. Hoê noa hora i muri iho, ua rahi mai te hinaaro no te nicotine mai te miti faaî ra te huru e faaama ˈtura vau i te avaava.”—Yoshimitsu, Tapone.

MAI TE tupuraa o Yoshimitsu e faaite ra, mea fifi i te tahi mau taime ia hinaaro te hoê taata i te faaea i te avaava. Te faaite râ te tahi mau maimiraa, fatata 90 i nia i te hanere feia te puhipuhi faahou i te avaava. Ia tamata râ oe i te faaea, e manuïa atu â oe mai te peu ua ineine oe no te mau haafifiraa. Eaha te tumu matauhia i hiˈa ˈi vetahi?

Te hinaaro no te nicotine: E rahi roa tera hinaaro i roto i na toru mahana i muri aˈe i te avaava hopea e e iti mai i muri aˈe e piti hebedoma. I roto i tera area taime, “e haere mai tera hiaai e i te tahi atu taime aita,” ta te hoê taata i puhipuhi na i te avaava i parau. Tau matahiti i muri aˈe râ, e puai mai tera hinaaro e puhipuhi i te avaava. Eiaha e ru! A tiai e pae minuti aore ra hau atu e e pee tera hinaaro.

Te tahi atu mau tapao mâha ore: I te haamataraa, mea fifi no te taata ia ara noa aore ra ia tiatonu i nia i te hoê ohipa e e mea ohie ia poria mai. E nehenehe atoa ratou e ite: Te mauiui, te maero, e tahe te hou, te hota, e taui te huru oia hoi ma te ore e faaoromai, te iria oia atoa te hepohepo. Te rahiraa râ o teie mau tumu e iti mai i roto e maha e ono hebedoma.

Teie te tahi mau manaˈo faufaa o te nehenehe e tauturu ia oe i roto i teie taime fifi. Ei hiˈoraa:

● A rave i te taime no te taoto maitai.

● A inu rahi te pape aore ra te pape maa hotu. A amu i te maa maitai.

● A faaetaeta i te tino ma te tano noa.

● A huti maitai i te aho e a feruri i te mataˈi apî e ô mai i roto i to oe mahaha.

Te mau mea e faatupu i te hinaaro e puhipuhi i te avaava: Te vai ra te mau ohipa aore ra te mau huru aau o te faatupu i te hinaaro e puhipuhi i te avaava. Ei hiˈoraa, peneiaˈe e peu matau na oe ia puhipuhi i te avaava a inu ai i te tahi mea. No reira, eiaha oe e faataere i nia i ta oe e inu ra mai te peu ua faaea oe i te avaava. I te roaraa râ o te tau, e nehenehe oe e inu ma te rave i te taime.

Tera râ, e nehenehe te mau ohipa ta oe i matau i te rave e hoˈi mai i muri aˈe i to oe faaearaa i te avaava. Ua faˈi o Torben tei faahitihia i te omuaraa: “E ahuru ma iva matahiti i muri aˈe i te faaearaa i te avaava, ua hoˈi mai tera hinaaro e puhipuhi i te avaava ia rave au i te taofe.” Te rahiraa râ o te taime, e iti mai te mau ohipa ta oe i matau i te rave e te puhipuhiraa i te avaava i te roaraa o te tau.

Mea taa ê râ no te ava. Mea papu, ia tamata oe i te faaea i te avaava, e titauhia ia oe ia haapae e ia faaea i te haere i te mau vahi e horoahia ra te ava. No te mea e rave rahi tei puhipuhi faahou i te avaava i te taime a inu ai ratou i te ava. No te aha?

● Noa ˈtu mea iti te ava e inuhia e rahi mai ra te hinaaro no te nicotine.

● Pinepine te inuraa e o vetahi i te faaauhia e te avaava.

● E faahuru ê te ava i te mau faaotiraa e e rave i te mau peu haama ore. Ua tano te Bibilia i te parauraa: ‘E tinai te uaina i te hinaaro e rave i te mea tia.’—Hosea 4:11.

Te amuimuiraa: A maiti maitai. Ei hiˈoraa, a haapae i te mau amuimuiraa faufaa ore e te feia e puhipuhi ra i te avaava aore ra o te ani ia oe ia na reira. A haapae atoa i te feia e tamata ra i te haafifi i ta oe mau tutavaraa e faaea i te avaava, peneiaˈe ma te faaooo ia oe i nia i te reira.

Te mau huru aau: Ia au i te hoê maimiraa, fatata piti i nia e toru taata tei puhipuhi faahou i te avaava no te ahoaho aore ra no te iria hou a puhipuhi ai i te avaava. Ia faatupu te tahi huru aau i te hinaaro e puhipuhi i te avaava: A inu i te pape, a amu i te chewing gum aore ra a ori haere. A tamata i te faaî i te feruriraa i te mau manaˈo maitai, peneiaˈe ma te pure i te Atua aore ra ma te taio i te tahi mau api o te Bibilia.—Salamo 19:14.

Eiaha e imi i te otoheraa

● Hoê noa haˈuraa.

Te mea papu: Hoê noa hutiraa e 50 i nia i te hanere faito nicotine i roto i te roro no te roaraa e toru hora. Te faahopearaa e topa faahou i roto i tera fifi.

● E tauturu te avaava ia faaiti mai i to ˈu ahoaho.

Te mea papu: Te faaite ra te mau maimiraa e faarahi te nicotine i te ahoaho. E mǎrû mai te ahoaho ia iti mai te mau tapao mâha ore.

● Ua maoro roa no ˈu no te faaea.

Te mea papu: E tapea te manaˈo haaparuparu ia manuïa. Te parau ra te Bibilia: “Ia toaruaru oe i te mahana ahoaho, e iti to oe puai.” (Maseli 24:10) A patoi i te manaˈo haaparuparu. E manuïa te taata tei hinaaro mau e faaea e tei faaohipa i te mau faaueraa tumu mai te feia faahitihia i roto i teie vea.

● Mea fifi roa no ˈu ia faaruru i te mau tapao mâha ore.

Te mea papu: Noa ˈtu mea rahi te tapao mâha ore e nehenehe râ te mau tapao mâha ore e iti mai i roto noa tau hebedoma. A mau papu! Mai te peu e hoˈi mai tera hinaaro e puhipuhi i te avaava tau avaˈe aore ra tau matahiti i muri aˈe, e pee tera hinaaro tau minuti noa ia ore râ oe e faaama i te hoê omou avaava.

● Ua fifihia to ˈu feruriraa.

Te mea papu: Mai te peu te rapaauhia ra oe no te hoê fifi i te pae feruriraa mai te hepohepo aore ra te schizophrénie, a ani i te tauturu a to oe taote no te faaea i te avaava. Ua ineine o ˈna i te tauturu ia oe, peneiaˈe ma te faatano i ta oe ravea rapaauraa no te tauturu ia oe ia maitai mai i te pae feruriraa aore ra ia rave maitai oe i te mau raau.

● Mai te peu e topa faahou vau, mai te mea ra e aita vau i manuïa.

Te mea papu: Ia topa faahou oe, mai tei tupu i nia e rave rahi, e ere ïa te auraa eita oe e manuïa. A faaetaeta e a haere i mua. E ere te toparaa i te oreraa e manuïa, o te taoraraa râ i te tauera te oreraa e manuïa. A tutava ïa. E nehenehe oe e manuïa!

A hiˈo i te tupuraa o Romualdo tei puhipuhi i te avaava i te roaraa 26 matahiti e tei faaea a 30 matahiti i teie nei. Te papai ra o ˈna: “Aita vau i ite faahou ehia rahiraa taime to ˈu toparaa. I te mau taime atoa, e inoino rahi to ˈu ia ˈu iho, mea faufaa ore au. I to ˈu faaoti-papu-raa e haamaitai i to ˈu auhoaraa e o Iehova e i to ˈu pure-tamau-raa no te ani i ta ˈna tauturu, ua manuïa mai au.”

I roto i te tumu parau hopea o teie anairaa tumu parau, e hiˈo mai tatou te tahi mau manaˈo faufaa o te nehenehe e tauturu ia oe ia oaoa i te faaea i te puhipuhi i te avaava.

[Hohoˈa i te api]

MEA INO MAU TE MAU AVAAVA ATOA

Ua rau te faaohiparaa o te avaava. E hoo-atoa-hia te tahi mau tuhaa o te avaava i roto i te mau fare hooraa maa natura e te mau fare hooraa i te tahi mau raau tupu rapaauraa. Tera râ, te parau ra te Faanahonahoraa no te ea na te ao: “Mea ino mau te mau avaava atoa.” E rave rahi maˈi pohe mai te mariri ai taata e te maˈi mafatu no roto mai i te avaava. E haamauiui atoa te mau metua vahine e puhipuhi ra i te avaava i ta ratou mau aiû aita i fanauhia ˈtura. Eaha te mau tuhaa o te avaava e faaohipa-pinepine-hia?

Te bidis: Mea nainai tera mau avaava tei ovirihia i te rima, matauhia i te faaohipa i te fenua Asia. Te auauahi o te bidis mea rahi aˈe to ˈna faito tâ, te nicotine e te monoxyde de carbone i te hoê avaava matauhia.

Te tita: Ua ovirihia i roto i te mau rauere avaava aore ra i roto i te papie e faaohipahia no te avaava. E ere te tita i te mea avaava, faaauhia i te avaava o te avaava matauhia, e noa ˈtu ua pohe te tita e vai noa â te nicotine i roto i te vaha.

Te avaava clou de girofle: Te vai ra e 60 i nia i te hanere avaava e 40 i nia i te hanere clou de girofle to roto. Te auauahi o te reira mea rahi aˈe to ˈna faito tâ, te nicotine e te monoxyde de carbone i te hoê avaava matauhia.

Te paipu: Aita e taa-ê-raa to te auauahi o te paipu i to te auauahi o te avaava, e faatupu na peu e piti i te hoê â maˈi mai te mariri ai taata e te tahi atu mau maˈi.

Te avaava aita e auauahi: E ô mai te ˈauauraa, te hutiraa i te avaava e te gutkha faanoˈanoˈahia, faaohipahia i te pae apatoa hitia o te râ o Asia. E ô te nicotine i roto i te toto ma te vaha. Mea ino roa ˈtu te avaava aita e auauahi i te tahi atu mau avaava matauhia.

Te paipu pape: I roto i te paipu pape e haere te auauahi o te avaava i roto i te pape hou a haˈu ai i te reira. Mea papu eita te reira e faaiti mai i te taero, oia hoi, te mau mea e faatupu i te mariri ai taata o te mahaha.

[Hohoˈa i te api]

A TAUTURU I TE TAHI TAATA IA FAAEA I TE AVAAVA

● A tapea i te manaˈo maitai. Mea maitai aˈe ia haapopou e ia haamauruuru, i te tamaˈi atu ia ˈna aore ra i te faahapahapa. Mea au aˈe ia parau: “E nehenehe oe e manuïa ia tamata faahou oe” i te parau atu: “Ua topa faahou oe!”

● A faaore i te hapa. A faaite i te faaoromai i te tahi taata e tamata ra i te faaea, ia iria o ˈna i nia ia oe. A parau ma te mǎrû: “Ua ite au e ere i te mea ohie, te oaoa nei râ vau no te mea te tamata ra oe.” Eiaha roa ˈtu e parau: “Mea au aˈe na ˈu a puhipuhi ai oe i te avaava!”

● Ei hoa mau. Te faaite ra te Bibilia: “E faaite te hoê hoa mau i te here i te mau taime atoa e e taeae oia tei fanauhia no te taime ahoaho.” (Maseli 17:17) Oia mau, a faaite i te faaoromai e te here “i te mau taime atoa” a tamata ˈi te hoê taata i te faaea noa ˈtu eaha te hora i te mahana aore ra te huru o te taata.