E nafea oe ia fanaˈo i te tiaturiraa papu?

A FERURI na ua ino to oe uati e te hinaaro ra oe ia tataîhia. E ite oe e rave rahi poroi faatianiani e parau atu ra ia haere i tera aore ra i tera fare tataîraa uati. I te hoê râ mahana, farerei atura oe i te taata iho o tei hamani i tera hohoˈa uati e ua parau mai oia e tataî o ˈna i to oe uati ma te tamoni ore. Papu roa e maiti oe ia ˈna!

E nehenehe teie uati e faahohoˈahia i te tiaturiraa. Ia ite tatou ua pohe te tiaturiraa i roto ia tatou, mai te rahiraa i teie mahana, ihea tatou e imi ai i te tauturu? Mea rahi paha te parau mai tei ia ratou ra te ravea! No te aha râ e ore ai e fariu na mua i te Atua, tei hamani i te taata e tei horoa ˈtu i te tiaturiraa papu? Te parau ra te Bibilia “aita hoi oia i atea ia tatou tataitahi” e ua ineine oia i te tauturu mai.—Ohipa 17:27; Petero 1, 5:7.

Te auraa mau o te tiaturiraa

Mea hohonu atu â te faataaraa ta te Bibilia e horoa ra no nia i te tiaturiraa i ta te mau aivanaa e taote. Ia au i te reo tumu i papaihia ˈi te Bibilia, te auraa mau o te parau tiaturiraa, o te tiai-ru-raa ïa ia tupu te hoê mea maitai. E piti tuhaa to te tiaturiraa. Te vai ra te hinaaroraa i te hoê mea maitai, e te vai atoa ra te haapapuraa e tupu mau iho â te mea ta tatou e tiai ra. E ere te tiaturiraa ta te Bibilia e horoa ra i te moemoeâ, e niu papu râ to te reira.

Ia faahitihia te parau o te tiaturiraa, e ô atoa mai te parau o te faaroo tei niu-atoa-hia i nia i te haapapuraa, eiaha noa râ i nia i te parau a te tahi taata. (Hebera 11:1) I roto râ i te Bibilia, mea taa ê iho â te faaroo, mea taa ê te tiaturiraa.—Korinetia 1, 13:13.

A feruri na e ani oe i te hoê hoa ia tauturu ia oe, e tiaturi oe e na reira iho â o ˈna. Eaha te haapapu ia oe e tauturu atu iho â to oe hoa? Na te mau ohipa ïa ta ˈna i rave aˈenei, ua matauhia o ˈna mai te hoê taata o tei hamani maitai e tei tauturu ia vetahi ê. Hoê â atoa no te faaroo e te tiaturiraa, e tuati na huru maitatai te tahi i te tahi, mea taa ê iho â râ te faaroo i te tiaturiraa. E nafea ia faariro i te Atua ei tiaturiraa no oe?

Te tiaturiraa papu

No ǒ mai i te Atua te tiaturiraa papu. No reira Iehova i piihia ˈi “te tiaturiraa o Iseraela.” (Ieremia 14:8) Pauroa te mau mea maitai ta to ˈna nunaa i tiai na, na Iehova ïa i faatupu. Aita Iehova i parau noa, ua horoa atoa râ oia i te niu papu no to ratou tiaturiraa. No reira i te roaraa o te tau, ua haapapai Iehova i te mau parau ta ˈna i horoa, oia atoa râ mea nafea o ˈna i te faatupuraa i te reira. No reira Iosua i nehenehe ai e parau i to Iseraela: “Ua ite atoa hoi outou . . . e aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia.”—Iosua 23:14.

Aita ta Iehova raveraa i taui, ua tamau oia i te haapapai i roto i te Bibilia te mau parau fafau ta ˈna i horoa, e mea nafea atoa te reira i te tupuraa i te roaraa o te tau. No te faaite e tupu mau iho â te reira, ua papaihia te tahi mau parau tohu mai te huru ra e ua tupu aˈena.

Mea tano roa ïa ia parau ua riro te Bibilia ei buka o te horoa mai i te tiaturiraa. A hiˈopoa ˈi tatou i te mau ohipa ta te Atua i rave no te taata, e ite mai tatou i te haapapuraa e nehenehe iho â tatou e faariro i te Atua ei tiaturiraa papu no tatou. No reira te aposetolo Paulo i parau ai: “Te mau parau atoa hoi i papaihia mai tahito mai â, ua papaihia ïa ei haapiiraa ia tatou e ia noaa atoa te tiaturiraa na roto i te faaoromai tamau e te tamahanahanaraa a te mau Papai.”—Roma 15:4.

Eaha te tiaturiraa ta te Atua e horoa mai ra?

Ia pohe tei herehia, tera te taime e hinaaro rahi ai tatou i te tiaturiraa. Aita hoi ta tatou e ravea, mai te huru ra te tapapa noa mai ra te pohe ia tatou! Eita tatou e nehenehe e ape maoro i te pohe, no reira te rahiraa e haaparuparu ai! Mea tano roa ïa ta te Bibilia e parau ra, o te pohe to tatou “enemi hopea.”—Korinetia 1, 15:26.

Eaha te tauturu mai ia tapea i te tiaturiraa i mua i te pohe? O te tiaturi-papu-raa ïa i ta te Bibilia e haapii ra, e haamou-roa-hia to tatou enemi hopea, oia hoi te pohe! E rave rahi taime to Iehova faaiteraa mea puai aˈe o ˈna i te pohe. E iva faatiaraa i roto i te Bibilia e haapapu ra e mana to te Atua no te faahoˈi mai i te feia pohe i te ora.

I te hoê mahana, ua horoa Iehova i te mana i ta ˈna Tamaiti ra o Iesu no te faatia mai i to ˈna hoa here o Lazaro tei pohe a maha ˈtura mahana. Te mea faahiahia, aita Iesu i rave huna i tera ohipa, ua na reira râ i mua i te hoê nahoa rahi.—Ioane 11:38-48, 53; 12:9, 10.

E na ô paha vetahi, ‘Aita i apî i te faatiaraahia mai teie mau taata, i te mea e ua ruau e ua pohe faahou ratou!’ Parau mau, ua pohe faahou ratou, ua riro râ te faatiaraa o to ratou tia-faahou-raa ei haapapuraa e tupu mau iho â te reira. E ere te tia-faahou-raa i te moemoeâ, e tiaturiraa papu râ!

Ua parau Iesu: “O vau te tia-faahou-raa e te ora.” (Ioane 11:25) A muri aˈe, e horoa Iehova ia Iesu i te mana no te faatia mai i te feia pohe na te ao atoa nei. No reira Iesu i na ô ai: “Ua fatata te hora e faaroo ai te feia atoa i roto i te menema i to [te Mesia] reo, a haere mai ai i rapae.” (Ioane 5:28, 29) Oia mau, e nehenehe te feia atoa e taoto nei i roto i te pohe e tia faahou mai no te ora i roto i te paradaiso i nia i te fenua nei.

Mea putapû mau te mau parau ta te peropheta Isaia i faahiti no nia i te tia-faahou-raa e tupu a muri aˈe, ua na ô hoi oia: “To oe ra mau taata pohe, e ora ïa; to ratou mau tino pohe, e tia faahou ïa: a ara, a himene, e tei parahi i te repo e! e au hoi to oe ra hau i te hau o te mau raau rii ra; e haapuaˈi mai hoi te fenua i te feia i pohe ra.”—Isaia 26:19.

E ere anei i te parau mahanahana? Oia mau, no reira ia pohe tei herehia, e haamanaˈo anaˈe i te tiaturiraa o te tia-faahou-raa. Mai te hoê pêpe i roto i te opu o to ˈna mama, tei roto atoa te feia e taoto nei i roto i te pohe i te feruriraa o te Atua Manahope. (Luka 20:37, 38) E mai te pêpe fanau-apî-hia, fatata roa tatou i te farii popou i te feia pohe!

Eaha ta te tiaturiraa e hopoi mai?

Ua parau atoa te aposetolo Paulo e tuhaa faufaa roa te tiaturiraaa i roto i te haana tamaˈi no ǒ mai i te Atua. (Tesalonia 1, 5:8) I tahito ra, e hamanihia na te taupoo o te faehau i te auri a tapoˈihia ˈtu ai i te hoê ahu aore ra iri puaa. Maoti tera taupoo e paruruhia ˈi te upoo o te faehau i roto i te aroraa. Mai te taupoo o te faehau, e paruru atoa te tiaturiraa i to tatou feruriraa. I roto i te ati, e tauturu mai te tiaturiraa i te mau parau fafau a te Atua ia ore e haapeapea aore ra e hepohepo rahi roa.

Ua papai atoa Paulo: “Teie tiaturiraa to tatou, mai te hoê ïa tutau no to tatou ora, mea papu e te aueue ore atoa.” (Hebera 6:19) I ǒ nei, te faahohoˈa ra Paulo i te tiaturiraa i te hoê tutau. Ua ite maitai o ˈna i te faufaaraa o te reira no te mea e rave rau taime to ˈna faarururaa i te vero i nia i te pahi. I roto i te vero, e taora na te mau mataro i te tutau no te tapeapea i te pahi eiaha te reira ia painu aore ra ia iri atu i nia i toˈa e te aˈau.

Te fafau ra Iehova fatata o ˈna i te faaore i te tamaˈi, te ino, te oto, e oia atoa i te pohe. Mai te peu no tatou e tiaturiraa “papu e te aueue ore” teie, e tauturu mai te reira ia mau papu i roto i te ati. (A hiˈo i te tumu parau “Te niu papu o to tatou tiaturiraa” i te api 10.) Ia tiatonu noa tatou i nia i tera tiaturiraa, e ora noa ïa tatou ia au i ta te Atua mau faaueraa e eita tatou e iri atu i roto i teie ao ino e te arepurepu.

Te hinaaro ra Iehova ia “ora mai te mau huru taata atoa” e ia fanaˈo ratou i te oraraa ta ˈna i fafau mai no a muri aˈe. E titauhia râ ia noaa i te taata tataitahi “te ite papu i te parau mau.” (Timoteo 1, 2:4) Ia tutava oe i te fanaˈo i tera ite, eita oe e tatarahapa! Aita hoê aˈe mea i roto i teie ao e faito i te oraraa maitai roa e tiai mai ra ia tatou!

Maoti te tiaturiraa ta te Atua e horoa mai, e roaa ia oe te puai ia naea ta oe mau fa a haapao noa ˈi oe i te hinaaro o te Atua. (Korinetia 2, 4:7; Philipi 4:13) No reira i mua i te fifi, eiaha e tuu, a faaitoito, e oraraa maitai hoi te tiai mai ra ia tatou!

[Tumu parau/Hoho‘a]

Te niu papu o to tatou tiaturiraa

E tauturu teie mau irava Bibilia ia oe ia patu i to oe tiaturiraa:

▪ Te fafau mai ra te Atua i te hoê oraraa oaoa no a muri aˈe.

Te parau ra te Bibilia e riro te fenua taatoa ei paradaiso i reira te taata e ora ma te hau e te oaoa.—Salamo 37:11, 29; Isaia 25:8; Apokalupo 21:3, 4.

▪ E ore te Atua e haavare.

Eita Iehova e au i te mau parau haavare atoa. E Atua moˈa oia e te parau-tia, eita ïa o ˈna e nehenehe e haavare.—Maseli 6:16-19; Isaia 6:2, 3; Tito 1:2; Hebera 6:18.

▪ Aita e otia to te puai o te Atua.

O Iehova te Atua Manahope, eita roa te hoê mea e nehenehe e tapea ia ˈna ia faatupu i ta ˈna mau parau fafau.—Exodo 15:11; Isaia 40:25, 26.

▪ Te hinaaro ra te Atua ia ora oe e a muri noa ˈtu.

​—Ioane 3:16; Timoteo 1, 2:3, 4.

▪ E imi te Atua i te maitai e vai ra i roto ia tatou.

Eita o ˈna e tiatonu i nia i ta tatou mau hara e hape, e haafaufaa râ o ˈna i to tatou mau huru maitatai e ta tatou mau tutavaraa. (Salamo 103:12-14; 130:3; Hebera 6:10) Ia rave tatou i te mea maitai, e oaoa to ˈna aau.—Maseli 27:11.

▪ E tauturu te Atua ia oe ia oaoa a haapao noa ˈi i ta ˈna mau faaueraa.

Eita roa te mau tavini o te Atua e haaparuparu. Maoti hoi to ˈna varua moˈa, e horoa te Atua ia ratou i te puai ta ratou e hinaaro.—Philipi 4:13.

▪ Ia tuu oe i to oe tiaturiraa i te Atua, eita oe e tatarahapa!

E nehenehe mau oe e tiaturi i te Atua, eita roa hoi o ˈna e faarue ia oe.—Salamo 25:3.

[Hoho‘a]

Mai te taupoo o te faehau, e paruru te tiaturiraa i to tatou feruriraa

[Hoho‘a]

Mai te tutau, e tauturu mai te hoê tiaturiraa papu ia ore e aueue i mua i te fifi

[Faaiteraa i te tumu]

Courtesy René Seindal/Su concessione del Museo Archeologico Regionale A. Salinas di Palermo