TEMATAITAI ra Rebeka i teie fenua a topa ˈi te mahana. I muri aˈe i te tereraa tau hebedoma, ua matau roa o ˈna i te haere na nia i te tua o te kamela. Mea atea roa to ˈna fenua tumu o Harana, peneiaˈe eita o ˈna e farerei faahou i to ˈna fetii. I te mea te hope ra to ratou tere, mea rahi te mau uiraa e puta mai i roto i to ˈna feruriraa no te tupu i muri aˈe.

Tei Kanaana ratou e te tere ra na te fenua pâpâmǎrô i te pae apatoa o tera vahi. (Genese 24:62) Ua ite paha Rebeka i te mau mamoe, te vai atoa ra râ te animara taehae. I te mea e ere tera vahi i te mea pape roa, eita e nehenehe e faaapu rahi i reira. E navai râ te aihere no te faaamu i te mau nǎnǎ mamoe. Aita paha Rebeka i matau i te ite i te fenua mai tera, area to ˈna aratai paari, oia ïa. E hinaaro rahi to tera taata e faaite i te parau apî i to ˈna fatu: E riro Rebeka ei vahine na Isaaka! Eita e ore, ua uiui o Rebeka ia ˈna, ‘Eaha te huru o to ˈu oraraa i tera fenua? Mai te aha râ te huru o Isaaka, te tane ta ˈu e faaineine ra i te faaipoipo? Aita mâua i farerei atura, e au anei au ia ˈna e o ˈna ia ˈu?’

I teie mahana i roto e rave rahi fenua, mea huru ê roa na metua anaˈe e faaau i te faaipoiporaa. Area i te tahi atu mau vahi, ua matauhia te reira. Noa ˈtu no teihea fenua oe, te taa ra ia oe aita o Rebeka i ite noa ˈˈe mai te aha te huru o to ˈna oraraa ananahi. E vahine itoito mau oia e te faaroo puai. E mea faufaa tera na huru maitatai ia tupu te tahi mau tauiraa i roto i to tatou oraraa. No to ˈna faaroo, ua faaite Rebeka i te tahi atu mau huru maitatai mea varavara te itehia i teie mahana.

Ua taui roa te oraraa o Rebeka i to ˈna haereraa e rave i te tahi ohipa ta ˈna i matau. Ua paari paha oia i Harana, te hoê oire i Mesopotamia, aore ra i te tahi vahi piri atu. Mea taa ê to ˈna na metua i te mau taata no Harana. Aita hoi raua e haamori i te atua-avaˈe Sîn, ia Iehova râ.—Genese 24:50.

I to Rebeka paariraa, ua riro oia ei vahine haviti mau, e ere râ i te mea hupehupe. Mea itoito o ˈna e ua faaite noa i te hoê haerea tura i te aro o te Atua. I te mea e tavini ta to ˈna utuafare, e oraraa fanaˈo ïa to ratou. Aita râ te hinaaro o Rebeka i faatiatia-noa-hia e aita atoa i faarirohia mai te hoê arii vahine. Mai to ˈna tamariiraa, ua matau oia i te rave i te ohipa ma te itoito. Mai te rahiraa o te mau vahine i to ˈna tau, e tuhaa ohipa rohirohi mau ta Rebeka mai te haereraa e tii i te pape no te utuafare. I te pae ahiahi, te haere atura oia i te apoo pape e ta ˈna farii i nia i te tapono.—Genese 24:11, 15, 16.

I te hoê ahiahi, ua oti ta ˈna farii pape i te faaîhia, horo mai nei te hoê taata paari ia ˈna, na ô aˈera: “Ho mai na i te tahi maa pape e inu i te farii pape na oe na.” Na roto i ta ˈna mau parau, o te haehaa e te faatura te itehia ra! Ua taa ia Rebeka mea atea te vahi i haerehia mai e teie taata. Mau aˈera ia ˈna te farii pape i nia i to ˈna tapono, faainu ihora ia ˈna i te pape toˈetoˈe e te haumârû mau e mâha ˈtura to ˈna poihâ. Ua ite atoa oia na ahuru kamela a teie taata e faaea noa ra i mua i te farii o tei ore i faaîhia ˈtura i te pape. Te ite ra Rebeka te hiˈo noa ra teie taata paari ia ˈna e aita to ˈna e manaˈo ino. I te mea ua hinaaro Rebeka e faaite  i te hoê aau horoa noa, na ô atura o ˈna: “E huti atoa vau i te pape na te mau kamela na oe, e ia fiu anaˈe ratou.”—Genese 24:17-19.

A tapao na, aita Rebeka i manaˈo e horoa maa pape noa i te mau kamela, ua hinaaro râ e faainu ia mâha roa to ratou poihâ. Hau atu 95 litera pape ta te kamela e inu ua poihâ roa anaˈe oia! Mai te peu tera iho â no na ahuru kamela, ehia ïa hora ohipa te tiai maira ia Rebeka! E au ra râ, aita te mau kamela i poihâ roa. a Ua ite anei râ Rebeka i te reira? Aita, ua ineine râ oia i te rohi no te farii maitai i teie taata paari ta ˈna i ore i matau. Ua farii atura te taata ra e ua mataitai ia Rebeka ia haere noa e ia hoˈi mai no te faaî i te farii a te mau kamela.—Genese 24:20, 21.

Te ora nei tatou i te hoê tau ua rahi roa te miimii, e hiˈoraa maitai roa ïa Rebeka no tatou. Mai tei tohuhia, e riro te taata “ei miimii,” eita e hinaaro e tuu i te maitai o vetahi ê na mua. (Timoteo 2, 3:1-5) Mea faufaa no te mau Kerisetiano o te tutava nei i te haapae i te miimii ia hiˈopoa i te aamu Bibilia o teie vahine apî o te horo ra e te hoˈi maira no te faaî i te pape.

Ua taa ia Rebeka e te hiˈo noa maira tera taata paari ia ˈna. Aita to ˈna e manaˈo ino, ua maere râ, ua faahiahia e ua oaoa ia Rebeka. Horoa ˈtura oia i te taoˈa faaunauna na Rebeka i te otiraa ta ˈna ohipa. E ua ani atu: “E tamahine oe na vai? e faaite mai na oe ia ˈu. E ô anei matou i te fare o to metua ia taoto?” I to ˈna faaiteraa o vai to ˈna fetii, ua oaoa roa te taata paari. Peneiaˈe, ua pahono oioi Rebeka ma te parau: “E aretu ta matou, e te maa, e e ô hoi i to matou fare ia taoto.” Auê te faahiahia e, te vai ra hoi te tahi atu mau taata tei haere mai na muri ia ˈna. Horo atura Rebeka i to ˈna metua vahine no te faaite i tei tupu.—Genese 24:22-28, 32.

Papu maitai, ua haapiihia ia Rebeka ia farii maitai i te taata. Mea varavara ia ite tera huru i teie mahana. Tera te tahi atu tumu ia pee i te faaroo o teie vahine apî o tei faaite i te aau maitai. E turai  to tatou faaroo i te Atua ia farii maitai i te taata. Tera atoa te tahi huru o Iehova, no reira oia e faaite ai i te aau horoa noa i te taata atoa e te hinaaro atoa ra ia na reira ta ˈna mau tavini. E oaoa Iehova ia farii maitai tatou i te taata ma te ore e titau atu i te tahi mea.—Mataio 5:44-46; Petero 1, 4:9.

O vai tera taata paari i te apoo pape ra? O te tavini a Aberahama, te tuaana o te papa ruau o Rebeka. Ua farii maitaihia o ˈna i te fare o Betuela, te metua tane o Rebeka. E au ra e o Eliezera to ˈna iˈoa. b Ua faaineinehia te maa na ˈna e to ˈna mau hoa, aita râ i farii i te tamaa na mua aˈe ia faaite atu oia i te tumu o to ˈna tere. (Genese 24:31-33) A feruri na i to ˈna oaoa a faatia ˈi i ta ˈna i ite iho nei o tei riro ei haapapuraa ua haamaitai Iehova to ˈna Atua i to ˈna tere faufaa mau.

A feruri na ia Eliezera ia faatia i ta ˈna aamu ia Betuela, te metua tane o Rebeka, e ia Labana, to ˈna taeae, o te faaroo noa ra ma te anaanatae rahi. Ua faaite oia ua haamaitai rahi Iehova ia Aberahama i Kanaana, hoê tamaiti ta raua Sara o Isaaka to ˈna iˈoa e o ˈna te fanaˈo i ta raua faufaa atoa. E hopoia rahi ta Aberahama i horoa i ta ˈna tavini, e haere e imi i te hoê vahine na Isaaka i roto i to ˈna fetii i Harana.—Genese 24:34-38.

Na nia i te aniraa a Aberahama, ua fafau Eliezera eita oia e maiti i te vahine na Isaaka i rotopu i te mau tamahine o Kanaana. No te aha? No te mea aita to Kanaana e faatura e e haamori ra i te Atua ra o Iehova. Ua papu ia Aberahama e haamou Iehova i te hoê mahana i tera mau taata no ta ratou mau peu iino. Aita ïa i hinaaro ia amui ta ˈna tamaiti here o Isaaka i tera nunaa e ia pee i ta ratou peu faufau. Ua ite o ˈna e hopoia rahi ta Isaaka ia tupu ta te Atua mau parau fafau.—Genese 15:16; 17:19; 24:2-4.

Ua parau atoa Eliezera i tei titau manihini ia ˈna, ua pure oia i te Atua ra o Iehova i to ˈna taeraa i te apoo pape. Ua ani o ˈna ia Iehova ia maiti i te vahine ta ˈNa i hinaaro na Isaaka, ia haere mai oia i te apoo pape, ia farii oia i te horoa i te pape inu na ˈna e ta ˈna mau kamela atoa. (Genese 24:12-14) E o vai tei haere mai e tei rave mai tera? O Rebeka! A feruri na eaha to ˈna huru ahiri oia i faaroo i te faatiaraa a Eliezera!

Ua putapû roa Betuela e Labana i te faatiaraa a Eliezera, na ô atura: “No ǒ ia Iehova taua parau nei.” Mai tei matauhia i ǒ, ua faaau ratou ia faaipoipo Rebeka ia Isaaka. (Genese 24:50-54) Te auraa anei aita ta Rebeka parau i tera ohipa?

Tau hebedoma na mua ˈtu, ua ui Eliezera ia Aberahama: “O te ore hoi taua vahine ra o te pee mai ia ˈu?” Ua pahono atura to ˈna fatu: “Aita a oe hapa i taua tǎpǔ na ˈu nei i reira.” (Genese 24:39, 41) I roto atoa te utuafare o Betuela, mea faufaa te manaˈo o te vahine. Ua oaoa roa Eliezera no te manuïaraa o to ˈna tere i ani ai oia ia aratai oioi ia Rebeka i Kanaana i te poipoi aˈe. Area to ˈna fetii, ua hinaaro ïa ia faaea Rebeka ahuru mahana ia ratou. No te faaafaro i tera fifi, faaoti atura ratou: “E parau atu na matou i taua potii nei, a ui atu ai ia ˈna iho.”—Genese 24:57.

Tei mua Rebeka i te hoê faaotiraa o te taui roa i to ˈna oraraa. Eaha ta ˈna e pahono? E parau anei o ˈna eita ta ˈna e nehenehe e haere no to ˈna aroha i to ˈna metua tane e taeae? Aore ra e faariro oia i te reira ei haamaitairaa taa ê no ǒ mai ia Iehova. Na roto i ta ˈna pahonoraa, ua faaite Rebeka i to ˈna huru i mua i teie tauiraa taue e te riaria atoa paha. Ua na ô noa oia: “E haere ïa vau.”—Genese 24:58.

Auê huru feruriraa faahiahia e! I teie mahana, mea taa ê ta tatou faanahoraa no nia te faaipoiporaa, e nehenehe râ e haapii mai i te hiˈoraa o Rebeka. E ere to ˈna hinaaro te mea faufaa roa ˈˈe no ˈna, to te Atua râ o Iehova. Te horoa noa mairâ te Parau a te Atua i te aratairaa maitai roa ˈˈe no nia i te faaipoiporaa: E nafea ia maiti i te hoê hoa faaipoipo e ia riro ei tane aore ra ei vahine maitai. (Korinetia 2, 6:14, 15; Ephesia 5:28-33) E pee  anaˈe i te hiˈoraa o Rebeka e te mau aratairaa a te Atua.

Ua haamaitai te utuafare o Betuela i ta ratou tamahine here ra o Rebeka. Ua apee atoa ˈtu Debora tei haapao ia ˈna i to ˈna tamariiraa e tae noa ˈtu te tahi mau tavini vahine ia Eliezera e to ˈna mau taata. (Genese 24:59-61; 35:8) Ua atea roa Harana ia ratou i teie nei. E toru paha hebedoma te maoro to ratou tere i nia 800 kilometera aore ra hau atu. E ere tera tere i te mea ohie. Ua ite aˈena Rebeka i te kamela, aita râ paha i matau i te haere na nia i tera animara. Ia au i te Bibilia, e tiai mamoe to ˈna utuafare fetii, e ere râ i te feia hoo taoˈa o te tere haere na nia i te kamela. (Genese 29:10) Pinepine e ere i te mea nahonaho no te taata a tahi ra e haere ai na nia i te kamela, noa ˈtu no te hoê taime poto roa!

Aita Rebeka i haapao i te reira, ua hiˈo noa râ i mua no to ˈna hinaaro e faaroo i te mau parau atoa ta Eliezera e faaite no nia ia Isaaka e to ˈna utuafare. A feruri na ia ˈna i mua i te auahi e ama ra ia faaroo i te taata paari ia faaite i ta Iehova i fafau i to ˈna hoa ra o Aberahama. Mea na roto mai hoi ia ˈna te huaai e haamaitai i te huitaata atoa. A feruri na i te huru o Rebeka i te iteraa mea na roto i ta ˈna tane o Isaaka, ia ˈna atoa ïa, e tupu ai ta te Atua parau fafau.—Genese 22:15-18.

Mai tei faahitihia i te omuaraa o teie tumu parau, te topa ra te mahana a haere noa ˈi ratou na te fenua pâpâmǎrô i te pae apatoa o Kanaana. Ite atura Rebeka i te hoê taata o te haere ra na roto i te aihere o te feruriruri noa ra. Te parauhia ra no Rebeka, “ua pou ihora oia i raro mai nia mai i te kamela,” peneiaˈe aita i tiai ia tapea te animara. Ua ani atura oia ia Eliezera: “O vai tera ra taata e haere mai na roto i te aua nei e farerei ia tatou?” I te faaiteraahia ˈtu o Isaaka, tapoi ihora oia i to ˈna upoo i te tahi ahu. (Genese 24:62-65) Eaha te tumu? No te faaite i to ˈna faatura i te tane ta ˈna e faaipoipo. Te parau nei paha vetahi, ua hope te tau o te auraroraa i te tane. E haapiiraa râ ta te mau tane e vahine e huti mai i te haehaa o Rebeka. O vai hoi i roto ia tatou o te faaite noa i tera huru maitai au mau!

E 40 matahiti to Isaaka e noa ˈtu ua mairi toru matahiti, te mauiui noa ra oia no te pohe o to ˈna mama o Sara. E taata mǎrû e te hamani maitai o Isaaka. Auê haamaitairaa ia horoahia ˈtu te hoê vahine itoito, farii maitai e te haehaa na ˈna! Eaha ˈtura tei tupu no raua? Te faaite ra te Bibilia, ua here te tahi i te tahi.—Genese 24:67; 26:8.

Noa ˈtu ua mairi 3 900 matahiti, mea ohie ia here ia Rebeka. E vahine itoito hoi, peepee no te rave i te ohipa, farii maitai e te haehaa. E nafea tatou e faufaahia ˈi i to ˈna hiˈoraa faahiahia mau? Ei feia apî e aore ra paari, faaipoipohia aore ra eita, e pee paatoa anaˈe i to ˈna faaroo!