HAAPIIRAA 36
A faaite i te haavare ore i roto i te mau tuhaa atoa
E hinaaro pauroa te taata ia faaite te mau hoa i te haavare ore. O ta Iehova atoa e tiai ra no to ˈna mau hoa. E ere râ i te mea ohie i roto i teie nei ao, e rave rahi taata aita e faaite ra i te haavare ore. Eaha ïa te haamaitairaa ia faaite i te haavare ore i roto i te mau tuhaa atoa?
1. Eaha te tumu faufaa roa ia faaite i te haavare ore?
Ia faaite tatou i te haavare ore ia vetahi ê, e faaite atoa tatou i te here e te faatura ia Iehova. A feruri na: E ite Iehova i te mau mea ta tatou e manaˈo ra e e rave ra. (Hebera 4:13) E ite oia ia faaoti tatou i te faaite i te haavare ore e mea au na ˈna i te reira. Te faaite ra ta ˈna Parau: “Mea au ore roa . . . na Iehova te taata haavarevare, e hoa rahi râ o ˈna no te taata afaro.”—Maseli 3:32.
2. Eaha te tahi mau ravea ia faaite i te haavare ore i roto i to tatou oraraa?
Te hinaaro ra Iehova ia faaite tatou i te “parau mau te tahi i te tahi.” (Zekaria 8:16, 17) Eaha ïa te auraa? Ia paraparau tatou i to tatou utuafare, te mau hoa ohipa, te mau taeae e tuahine Kerisetiano aore ra te feia mana, eita tatou e haavare aore ra e horoa i te hoê haamaramaramaraa hape. Eita te taata haavare ore e eiâ ia vetahi ê aore ra e taviri ia ratou. (A taio i te Maseli 24:28 e te Ephesia 4:28.) E aufau ratou i ta ratou mau tute atoa i titauhia ia ratou. (Roma 13:5-7) I roto i teie mau tupuraa e te tahi atu, “ia afaro noa to [tatou] haerea i te mau mea atoa.”—Hebera 13:18.
3. Eaha te mau haamaitairaa ia faaite i te haavare ore?
Ia matauhia tatou ei taata haavare ore, e tiaturi mai vetahi ia tatou. E tauturu tatou i te taata ia oaoa i roto i te amuiraa mai te hoê utuafare here. E manaˈo haava mâ to tatou. E nehenehe atoa to tatou haavare ore e “faanehenehe roa . . . i te haapiiraa a to tatou Faaora, te Atua,” a hinaaro roa atoa ˈi vetahi e tavini ia Iehova.—Tito 2:10.
A FAAHOHONU ATU Â
A hiˈo nafea te haavare ore e ohipa ˈi i nia ia Iehova e ia oe, e a haapii nafea oe e nehenehe ai e faaite i te haavare ore i roto e rave rahi tupuraa o te oraraa.
4. E faaoaoa te haavare ore ia Iehova
A taio i te Salamo 44:21 e te Malaki 3:16, e a aparau i teie mau uiraa:
-
No te aha oe e manaˈo ai e ere i te haerea paari ia tiaturi e nehenehe tatou e huna i te parau mau?
-
No oe, eaha to Iehova huru ia maiti tatou i te faaite i te parau mau noa ˈtu e ere i te mea ohie?
Ia faaite te mau tamarii i te parau mau, e faaoaoa ratou i to ratou mau metua. Ia faaite tatou i te parau mau, e faaoaoa tatou ia Iehova
5. A faaite i te haavare ore i te mau taime atoa
E rave rahi taata o te tiaturi ra e ere i te mea ohie ia faaite i te haavare ore. E ite râ tatou no te aha mea tia ia faaite i te haavare ore i te mau taime atoa. A pata i te VIDEO.
A taio i te Hebera 13:18, e a aparau nafea tatou e nehenehe ai e faaite i te haavare ore . . .
-
i to tatou utuafare.
-
i te vahi raveraa ohipa aore ra i te fare haapiiraa.
-
i roto i te tahi atu mau tupuraa.
6. E faufaahia tatou ia faaite i te haavare ore
E nehenehe te haavare ore e faatupu i te tahi mau fifi. E ohipa maitai râ te ravehia ia faaite noa i te haavare ore. A taio i te Salamo 34:12-16, e a aparau i teie uiraa:
-
Nafea te haavare ore e haamaitai ai i to oe oraraa?
-
E haapuai te haavare ore o te mau tane e vahine i to ratou faaipoiporaa
-
E noaa i te mau rave ohipa haavare ore i te tiaturiraa a to ratou mau paoti ohipa
-
E roo maitai to te mau taata atoa o te faaite i te haavare ore i te feia mana
TE MANAˈO O VETAHI: “Mea huˈa roa te tahi mau haavare e eita e tâuˈahia.”
-
No te aha oe e tiaturi ai mea faufau na Iehova te mau haavare atoa?
HAAPOTORAA
Te hinaaro ra Iehova ia faaite to ˈna mau hoa i te haavare ore i roto i ta ratou e rave ra e e parau ra.
Haamanaˈoraa
-
Eaha te tahi mau ravea ia faaite i te haavare ore?
-
No te aha e ere i te haerea paari ia manaˈo e nehenehe tatou e huna i te parau mau?
-
No te aha oe e hinaaro ai e faaite i te haavare ore i te mau taime atoa?
HIˈOPOA
Nafea te mau metua e nehenehe ai e haapii i ta ratou mau tamarii ia faaite i te haavare ore?
Eaha te mau haamaitairaa ia tapea tatou i ta tatou parau?
A tapea i ta tatou mau parau, a fanaˈo i te mau haamaitairaa (9:09)
A hiˈo mea titauhia anei ia aufau tatou i te mau tute, noa ˈtu aita te reira i faaohipa maitaihia.
“Titauhia anei ia tatou ia aufau i ta tatou mau tute?” (Tumu parau o Te Pare Tiairaa)
Eaha te turai i te hoê taata ia faaea i te haavare, ia taui i to ˈna oraraa e ia rave i te ohipa ma te faaite i te haavare ore?
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
