I te mahana hopea o te Oroa patiaraa tiahapa, te hitu o te mahana, te haapii ra Iesu i te taata i te vahi o te hiero to reira “te mau afata moni.” (Ioane 8:20; Luka 21:1) E au ra e to roto i te Aua o te mau vahine, i reira te taata e tuu ai i ta ratou mau ô.

I te po i taua oroa ra, mea marama roa na taua vahi ra. Te vai ra e maha mori avae teitei roa e maha amaa e auˈa rahi î i te hinu to nia iho. I te mea e mea huru puai te mori, e ite-roa-hia te maramarama na te atea ê. Faahiti atura Iesu i te tahi parau o te haamanaˈo paha i te feia e faaroo ra i te reira: “O vau te maramarama o teie nei ao. O te pee mai ia ˈu, e ore roa ïa e haere na te poiri, e noaa râ ia ˈna te maramarama o te horoa mai i te ora.”—Ioane 8:12.

Faahapa maira te mau Pharisea i ta Iesu parau e na ô maira: “Te faaite ra oe i te parau no oe. Eita matou e tiaturi i ta oe parau.” Pahono atura Iesu: “Ia faaite noa ˈtu vau i te parau no ˈu, e parau mau ta ˈu, no te mea ua ite au nohea mai au e te haere ra vau ihea. Outou râ, aita ïa i ite nohea mai au e te haere ra vau ihea.” Parau faahou atura oia: “Ua papai-atoa-hia i roto i ta outou ture tei horoahia ˈtu e Mose: ‘E parau mau te faaiteraa a toopiti taata.’ Te faaite ra vau i te parau no ˈu, e te faaite atoa ra te Metua tei tono mai ia ˈu i te parau no ˈu.”—Ioane 8:13-18.

Aita te mau Pharisea i farii i ta ˈna haaferuriraa. Ui maira ratou: “Teihea roa ïa to oe Metua?” Pahono roa ˈtura Iesu: “Aita outou i ite o vai au e o vai to ˈu Metua. Ahiri outou i ite o vai au, e ite atoa ïa outou o vai to ˈu Metua.” (Ioane 8:19) Ua hinaaro te mau Pharisea ia haruhia Iesu, aita râ hoê aˈe i na reira ˈtu.

Faahiti faahou atura Iesu i te tahi parau ta ˈna i parau aˈena: “Te reva nei au, e imi outou ia ˈu, tera râ, e feia hara noa â outou. I te vahi ta  ˈu e haere nei, e ore outou e tae.” Feruri aˈera te ati Iuda aita roa ˈtu e taa ra i ta Iesu parau: “Te manaˈo ra anei o ˈna e haapohe ia ˈna i parau ai oia: ‘I te vahi ta ˈu e haere nei, e ore outou e tae?’” Aita iho â i taa ia ratou ta Iesu e parau ra, aita hoi ratou i ite nohea mai o ˈna. Faataa ˈtura oia: “No raro outou, no nia vau. No teie nei ao outou, e ere au no teie nei ao.”—Ioane 8:21-23.

Te faahiti ra Iesu i to ˈna oraraa na mua ˈˈe i te raˈi, e o ˈna te Mesia, aore ra Kirito, fafauhia. Mea tano hoi ia taa i teie mau aratai haapaoraa e o ˈna te Mesia. Aita râ, ui maira ratou ma te vahavaha: “O vai hoi oe?”—Ioane 8:25.

Pahono atura Iesu i ta ratou patoiraa: “Mâuˈa noa to ˈu taime i te paraparauraa ia outou.” Faahiti atura oia i to ˈna Metua e faataa ˈtura no te aha ia faaroo te ati Iuda i te Tamaiti: “E parau mau ta tei tono mai ia ˈu, e te mau mea atoa ta ˈu i faaroo ia ˈna ra, te parau nei ïa vau i to teie nei ao.”—Ioane 8:25, 26.

Faaite atura Iesu e mea tiaturi na ˈna i to ˈna Metua, ta teie mau ati Iuda aita e tiaturi ra: “Ia faateitei outou i te Tamaiti a te taata nei e ite ai outou e o vau te Mesia e eita roa vau e rave i te tahi noa ˈˈe mea mai ta ˈu e hinaaro. Mai ta te Metua râ i haapii mai, o ta ˈu ïa e parau. Tei pihai iho ia ˈu tei tono mai ia ˈu. Aita oia i faarue ia ˈu, no te mea e rave noa vau i te mau mea atoa e mauruuru ai o ˈna.”—Ioane 8:28, 29.

Ua tiaturi râ te tahi mau ati Iuda ia Iesu, e na ô atura oia ia ratou: “Ia haapao noa outou i ta ˈu parau, e pǐpǐ mau ïa outou na ˈu, e e ite outou i te parau mau e na te parau mau e faatiamâ ia outou.”—Ioane 8:31, 32.

E au ra e ua maere vetahi i teie parau o te faatiamâraa. Parau maira ratou: “E tamarii matou na Aberahama e aore roa matou i riro aˈenei ei tîtî na te taata. No te aha ïa oe e parau ai: ‘E tiamâ outou’?” Ua ite te mau ati Iuda e i te tahi taime i haavîhia na ratou e te hoê nunaa ê, aita râ ratou i hinaaro ia parauhia ratou e tîtî. Faataa ˈtura râ Iesu e e tîtî noa â ratou: “E parau mau ta ˈu e parau atu: Te taata atoa e rave i te hara, e tîtî ïa no te hara.”—Ioane 8:33, 34.

Te mau ati Iuda o te ore e farii e e tîtî ratou no te hara, e fifi ratou. Faataa ˈtura Iesu: “Eita . . . te tavini e parahi noa i te fare o te fatu, o te tamaiti râ te parahi tamau i reira.” (Ioane 8:35) Aita e tiaraa to te hoê tavini, aore ra tîtî, e fatu i te faufaa, e nehenehe noa atoa oia e faahoˈihia. O te tamaiti mau anaˈe aore ra te tamaiti faaamuhia te parahi “tamau” i roto i te utuafare, a ora noa ˈi oia.

Na te parau mau no nia i te Tamaiti e faatiamâ roa i te taata i te hara o te pohe te utua. Na ô atura Iesu: “Ia faatiamâ te Tamaiti ia outou, e tiamâ mau â outou.”—Ioane 8:36.