Arataihia ˈtura Iesu e e piti taata eiâ i te hoê vahi e ere mea atea i te oire no te haapohe ia ratou. I parauhia na taua vahi ra o Gologota, aore ra Apu upoo, o te itehia “na te atea mai.”—Mareko 15:40.

Tatarahia ˈtura to ratou ahu, e horoahia maira te uaina anoihia i te mura e te raau maramara. E au ra e na te tahi mau vahine no Ierusalema i hamani i teie inu, ta te mau faehau Roma e farii ia horoahia no te tamǎrû i te mauiui o te feia e haapohehia ra. I te tamataraa Iesu, aita oia i hinaaro e inu. No te aha? Ia vai noa to ˈna hiroa i te roaraa o teie tamataraa rahi, a tapea ˈi i to ˈna haapao maitai e tae atu i te pohe.

Faataravahia ˈtura Iesu i nia i te pou. (Mareko 15:25) Patiti atura te mau faehau i te naero i nia i to ˈna na rima e avae, puta ˈtura te iˈo e te uaua a mauiui roa ˈi oia. I te faatiaraahia te pou, rahi roa ˈtura to ˈna mauiui a hahae ai te puta naero e te pepe no te teiaha o to ˈna tino. Aita râ Iesu i parau iria i te mau faehau. Ani atura oia i roto i te pure: “To ˈu Metua, a faaore i ta ratou hara, aita hoi ratou i ite i ta ratou e rave nei.”—Luka 23:34.

E tuu na to Roma i te hoê papai no te faaite eaha te hara i haapohehia ˈi te tahi taata. Teie te parau tei tamauhia i nia noa mai i to Iesu upoo: “Iesu no Nazareta te Arii o te ati Iuda.” Ua papaihia te reira na roto i te reo Hebera, Latino e Heleni, fatata ïa pauroa te taata te nehenehe e taio. Ua na reira Pilato no te faaite i to ˈna vahavaha i te mau ati Iuda tei onoono e ia haapohehia Iesu. Aita te mau tahuˈa tiaau i afaro, patoi maira ratou: “Eiaha e papai ‘te Arii o te ati Iuda,’ a papai râ i ta ˈna i parau: ‘O vau te Arii o te ati Iuda.’” Aita Pilato i hinaaro ia faatere ratou ia ˈna, pahono atura oia: “Ta ˈu i papai, ua oti ïa parau.”—Ioane 19:19-22.

Ua hae roa te mau tahuˈa, pari haavare faahou atura ratou ia Iesu i ta ratou i pari aˈenei a haavahia ˈi oia e te Sunederi. No reira te feia e haere ra na ô i tairiiri ai i to ratou upoo ei faaoooraa ia ˈna, a faaino ai ia ˈna: “Ua faaora o ˈna ia vetahi ê, ia ˈna iho râ, eita ïa e tia ia ˈna! Ia pou mai te Mesia, te Arii o Iseraela, i teie nei i raro i te pou haamauiuiraa, ia ite hoi matou a tiaturi atu ai ia ˈna.” (Mareko 15:29-32) Oia atoa na taata eiâ i to ˈna pae atau e aui tei faaino ia ˈna, noa ˈtu e o ˈna anaˈe te taata aita ta ˈna e hara.

Faaooo atoa maira e maha faehau Roma ia Iesu. Ua inu paha ratou i te uaina toavaava, e ua toro atu paha i te tahi auˈa uaina avaava ia Iesu, eita hoi e naea ia ˈna ia rave mai. Ma te faahiti i tei papaihia i nia noa mai i to Iesu upoo, parau faaooo maira ratou: “O oe te Arii o te ati Iuda, a faaora ïa ia oe iho.” (Luka 23:36, 37) A feruri na! Te taata o ˈna te eˈa, te parau mau e te ora, te rave-ino-hia ra ïa ma te tano ore e te faaooohia ra. Ua faaoti papu râ oia i te faaoromai i teie mau ati atoa, ma te ore e faahapa i te mau ati Iuda e hiˈo noa mai ra, e te mau faehau Roma e  faaooo mai ra, aore ra na taata ohipa ino i patitihia i pihai iho ia ˈna.

Rave maira na faehau e maha i to Iesu ahu tapoˈi, pahae atura ei maha tuhaa, e pere atura no te faaoti na vai e rave i na tuhaa tataitahi. To ˈna râ ahu e au i te piriaro, aita e niraraa, “mea raraa-noa-hia mai nia mai e raro roa,” e ahu maitai roa ïa. Na ô aˈera na faehau te tahi i te tahi: “Eiaha e pahae i teie ahu, e pere râ tatou no te faaoti na vai e rave atu.” Ia tupu hoi tei papaihia: “Ua opere ratou i to ˈu mau ahu i rotopu ia ratou e ua pere i to ˈu ahu e au i te piriaro.”—Ioane 19:23, 24; Salamo 22:18.

I te hoê râ taime, taa ihora i te hoê o na taata ohipa ino e e arii iho â Iesu. Tamaˈi atura oia i te tahi atu: “Aita oe e mǎtaˈu ra i te Atua, ua roohia oe i te hoê â utua? Mea tano roa teie utua no tâua no ta tâua i rave. Teie râ taata, aita ïa i rave i te ohipa ino.” Taparu maira oia ia Iesu: “Haamanaˈo mai oe ia ˈu ia tae oe i roto i ta oe Faatereraa arii.”—Luka 23:40-42.

Pahono atura Iesu: “Oia mau ta ˈu e parau atu ia oe i teie mahana: Ei te paradaiso oe e o vau atoa.” A tapao na e aita Iesu i parau no te Faatereraa arii. (Luka 23:43) Mea ê ta Iesu i fafau i ta ˈna mau aposetolo, e parahi ratou e o ˈna i nia te mau terono i roto i te Faatereraa arii. (Mataio 19:28; Luka 22:29, 30) Ua faaroo râ paha teie ati Iuda ohipa ino i te parau o te paradaiso i te fenua ta Iehova i faanaho ei nohoraa no Adamu, Eva e to raua huaai. E nehenehe ïa oia e pohe ma teie tiaturiraa no a muri aˈe.