Tei te piha i nia â Iesu e ta ˈna mau aposetolo haapao maitai i muri iho i te Oroa haamanaˈoraa, faaitoito atura oia ia ratou: “Eiaha to outou aau ia horuhoru. A faatupu i te faaroo i te Atua, a faatupu atoa i te faaroo ia ˈu.”—Ioane 13:36; 14:1.

Faataa ˈtura Iesu no te aha eiaha ˈi ratou ia horuhoru ia reva oia: “Mea rahi te vahi faaearaa i roto i te fare o to ˈu Metua. . . . Ia reva vau e faaineine i te tahi vahi no outou, e hoˈi mai â vau e aratai ia outou i ǒ ˈu ra, i te vahi hoi to reira vau, to reira atoa ïa outou.” Aita râ i taa ia ratou e o to ˈna revaraa i te raˈi ta ˈna e parau ra. Na ô maira Toma: “E te Fatu, aita matou i ite i te vahi ta oe e haere nei. Mea nafea ïa matou i ite ai i te eˈa?”—Ioane 14:2-5.

Pahono atura Iesu: “O vau te eˈa e te parau mau e te ora.” Ia farii te tahi taata ia ˈna e ta ˈna mau haapiiraa, e ia pee i to ˈna huru oraraa e tomo ai oia i te fare i te raˈi o to ˈna Metua. Na ô atura Iesu: “Aore roa e taata e tae i te Metua ra, na roto noa râ ia ˈu.”—Ioane 14:6.

Ani maira Philipa o te faaroo maitai mai ra: “E te Fatu, a faaite mai i te Metua, atira ˈtu ai.” E au ra e ua hinaaro Philipa e ite orama i te Atua, mai ia Mose, Elia e Isaia. Mea fanaˈo aˈe râ te mau aposetolo, ta Iesu i haapapu atu: “Ahia ˈtura maororaa to ˈu parahiraa mai ia outou ra, aita â oe e Philipa i ite atura o vai au? O tei ite mai ia ˈu, ua ite atoa ïa i te Metua.” E faaite Iesu i te huru o to ˈna Metua ma te tia roa. No reira, te oraraa i pihai iho ia Iesu e te iteraa ia ˈna, mai te huru ra e te ite ra ratou i te Metua. Parau mau, mea hau aˈe te Metua i ta ˈna Tamaiti, ua haapapu hoi Iesu: “Te mau mea ta ˈu e parau ia outou pauroa, e ere ïa i to ˈu iho mau manaˈo.” (Ioane 14:8-10) Te parau ra ïa Iesu i te mau aposetolo e no ǒ mai i to ˈna Metua ta ˈna mau haapiiraa atoa.

Ua ite te mau aposetolo ia Iesu i te raveraa i  te tahi mau ohipa faahiahia e ua faaroo ia ˈna i te pororaa i te parau apî oaoa o te Faatereraa arii a te Atua. Na ô atura oia ia ratou: “O te faatupu i te faaroo ia ˈu, e rave atoa ïa oia i te mau ohipa ta ˈu e rave nei. E ohipa rahi aˈe i teie ta ˈna e rave.” (Ioane 14:12) Aita Iesu e parau ra e e faatupu ratou i te semeio rahi aˈe i ta ˈna. E poro râ ratou i nia i te hoê tau maoro atu â, na te hoê tuhaa fenua aano atu â, e i te taata e rave rahi atu â.

Ia reva Iesu, eita oia e faarue ia ratou, ua fafau hoi oia: “Ia ani outou i te tahi mea ma to ˈu iˈoa, e rave au.” Na ô faahou atura oia: “Na ˈu e ani i te Metua e na ˈna e horoa ˈtu i te tahi atu tauturu o te vai noa mai ia outou ra e a muri noa ˈtu. O te varua moˈa ïa o te parau mau.” (Ioane 14:14, 16, 17) Ua haapapu oia e e fanaˈo ratou i te varua moˈa, te tahi atu tauturu. Te ohipa ïa i tupu i te Penetekose.

Na ô atura Iesu: “E maa taime â e ore teie nei ao e ite faahou mai ia ˈu. Outou râ, oia ïa no te mea te ora nei au, e ora ïa outou.” (Ioane 14:19) I muri iho i to Iesu faatiaraahia mai, ua ite te mau pǐpǐ ia ˈna hou oia a reva ˈi i te raˈi. I te tau faataahia râ, e faatia mai oia ia ratou ia ora e o ˈna i te raˈi ei varua.

Faahiti atura Iesu i teie parau mau: “O te farii i ta ˈu mau faaueraa e o te haapao i te reira, mea here ïa na ˈna ia ˈu. E o te here ra ia ˈu, e herehia ïa o ˈna e to ˈu Metua. E here atoa vau ia ˈna, a faaite maitai atu ai ia ˈna o vai au.” Ui maira te aposetolo Iuda, pii-atoa-hia Tadaio: “E te Fatu, no te aha oe e hinaaro ai ia ite maitai matou o vai oe, eiaha râ to te ao?” Pahono atura Iesu: “Ia here te hoê taata ia ˈu, e haapao ïa o ˈna i ta ˈu parau, e here to ˈu Metua ia ˈna . . . O te ore e here ia ˈu, eita ïa e haapao i ta ˈu mau parau.” (Ioane 14:21-24) Aita to te ao e farii ra e o Iesu te eˈa, te parau mau e te ora, area ta ˈna mau pǐpǐ, oia ïa.

Ia reva Iesu, e nafea ïa te mau pǐpǐ e haamanaˈo ai i ta ˈna i haapii ia ratou? Faataa ˈtura Iesu: “Area te tauturu, te varua moˈa ta te Metua e tono atu ma to ˈu iˈoa, na ˈna e haapii ia outou i te mau mea atoa e e haamanaˈo ia outou i te mau mea atoa ta ˈu i parau atu.” E parau tamahanahana teie, ua ite hoi te mau aposetolo i te ohiparaa te varua moˈa ma te puai rahi. Na ô faahou atura Iesu: “E vaiiho atu vau i te hau, e horoa ˈtu vau i to ˈu nei hau. . . . Eiaha to outou aau ia horuhoru, eiaha atoa ia taiâ.” (Ioane 14:26, 27) Eiaha iho â te mau pǐpǐ e horuhoru, na te Metua hoi o Iesu e aratai e e paruru ia ratou.

I muri iho, e ite papu ratou i te parururaa a te Atua. Parau atura Iesu: “Te haere mai nei hoi te arii o teie nei ao e aita to ˈna e mana i nia ia ˈu.” (Ioane 14:30) I nehenehe na te Diabolo e tomo i roto ia Iuda a mana ˈtu ai i nia ia ˈna. Aita râ to Iesu e paruparu ta Satani e nehenehe e ohipa i nia iho ia patoi Iesu i te Atua. Aita atoa i tia i te Diabolo ia tapea ia Iesu i roto i te pohe. No te aha? Faataa ˈtura Iesu: “Te rave nei au i ta te Metua i faaue mai.” Ua papu ia ˈna e e faatia to ˈna Metua ia ˈna mai te pohe mai.—Ioane 14:31.