1, 2. No te aha e taoˈa faufaa roa ˈi te hoê aveia, e e nafea e nehenehe ai e faaau i te reira i te manaˈo haava?

 TE FAATERE ra te hoê ihitai i to ˈna pahi na roto i te mau are o te hoê moana aano. Te haere avae ra te hoê taata ori haere na te hoê medebara ano. Te faatere ra te hoê pairati i to ˈna manureva na nia aˈe i te mau ata. Ua ite anei oe eaha te taairaa o teie mau taata? E fifi roa ïa ratou tataitahi aita anaˈe e aveia, mai te peu iho â râ e aita ˈtu e ravea apî e vai ra.

² E taoˈa haihai te hoê aveia, parau-atoa-hia uati moana, e e tohu te nira auri ovahine i te apatoerau. Mea tano anaˈe te aveia e ia apitihia ˈtu te hoê hohoˈa fenua tano roa, e nehenehe te reira e faaora i te taata. I roto i te tahi mau tuhaa, e nehenehe te reira e faaauhia i te hoê ô faufaa roa ta Iehova i ho mai, te hoê manaˈo haava. (Iakobo 1:17) Aita anaˈe e manaˈo haava, e moˈe roa ïa tatou. Ia faaohipa-maitai-hia, e  nehenehe te reira e tauturu ia tatou ia ite i te eˈa maitai i roto i te oraraa e ia na reira noa i te haere. No reira, e hiˈopoa tatou eaha te manaˈo haava e ta ˈna ohiparaa. I muri iho, e tatara tatou i teie mau manaˈo: (1) E nafea ia haapii i te manaˈo haava, (2) no te aha e mea tia ˈi ia tâuˈa tatou i te manaˈo haava o vetahi ê, e (3) eaha te mau maitai ei manaˈo haava maitai noa anaˈe to tatou.

3. Eaha te auraa mau o te taˈo Heleni i hurihia ei “manaˈo haava,” e te faataa ra te reira i teihea ravea otahi i roto i te taata?

³ I roto i te Bibilia, e “ite e o ˈna iho” te auraa mau o te taˈo Heleni i hurihia ei “manaˈo haava.” Taa ê roa i te mau animara, e ravea ta tatou ta te Atua i horoa mai no te ite ia tatou iho. E nehenehe tatou, ei auraa parau, e hiˈopoa ia tatou iho e e haava ia tatou no nia i te mea maitai e te mea ino. Mai te hoê ite, aore ra haava, i roto ia tatou, e nehenehe to tatou manaˈo haava e hiˈopoa i ta tatou mau ohipa, to tatou mau haerea e ta tatou mau maitiraa. E nehenehe te reira e aratai ia tatou i te hoê faaotiraa maitai aore ra e faaara mai no nia i te hoê faaotiraa ino. I muri aˈe, e nehenehe te reira e tamahanahana ia tatou no ta tatou maitiraa maitai aore ra e faautua mai i te horuhoru uˈana no ta tatou maitiraa tano ore.

4, 5. (a) Mea nafea to tatou iteraa e e manaˈo haava to Adamu e to Eva atoa, e eaha te faahopearaa no to raua tâuˈa-ore-raa i te ture a te Atua? (b) Eaha te mau hiˈoraa e faaite ra e ua faaohipa te mau tane haapao maitai hou te Kerisetianoraa i to ratou manaˈo haava?

⁴ Ua tuuhia teie ravea i roto i te tane e te vahine i te omuaraa iho â. Ua faaite Adamu e o Eva atoa e e manaˈo haava to raua. E haapapuraa ta tatou i to raua iteraa i te haama i muri aˈe i to raua hararaa. (Genese 3:7, 8) Tera noa râ, aita te hoê manaˈo haava peapea i riro ei maitai no raua i taua taime ra. Ua opua roa raua i te tâuˈa ore i te ture a te Atua. Ua maiti ïa raua ma te ite papu i te orure hau, i te patoi i te Atua ra o Iehova. Ei taata tia roa, ua ite raua eaha ta raua e rave ra, e aita e otoheraa.

 ⁵ Taa ê roa ia Adamu e ia Eva, mea rahi te taata tia ore o tei faaroo i to ratou manaˈo haava. Ei hiˈoraa, ua tia i te taata haapao maitai ra o Ioba ia parau: “Tau parau-tia ta ˈu e tapea nei, e ore e tuu; e ore tau aau e pari mai ia ˈu nei e pohe noa ˈtu vau.” a (Ioba 27:6) Ua faaroo maitai Ioba i to ˈna manaˈo haava, ma te vaiiho i te reira ia aratai i ta ˈna mau ohipa e faaotiraa. No reira i tia ˈi ia ˈna ia parau ma te oaoa mau e aita to ˈna manaˈo haava i haamauiui ia ˈna i te haama e te manaˈo faahapa. A tapao na i te taa-ê-raa i rotopu ia Ioba e ia Davida. I to Davida ereraa i te faatura ia Saula, te arii faatavaihia a Iehova, “ua faahapa . . . to Davida aau ia ˈna iho” i muri aˈe. (Samuela 1, 24:5) Eita e ore e ua faufaahia Davida i tera mau faahaparaa uˈana a to ˈna manaˈo haava, o tei haapii ia ˈna ia ore e na reira faahou a muri aˈe.

6. Eaha te faaite ra e e manaˈo haava to te mau taata atoa?

⁶ No te mau tavini a Iehova anaˈe anei teie ô o te manaˈo haava? A hiˈo na i ta te aposetolo Paulo i papai i raro aˈe i te aratairaa a te varua o te Atua: “Ia rave hoi te mau taata o te mau nunaa ěê i ta te ture e parau ra noa ˈtu e aita ratou i ite i taua ture ra, te faaite ra ïa te reira e to roto ia ratou te ture. O ratou mau te haapapu ra e ua papaihia ta te ture e faaue ra i roto i to ratou aau, a riro atoa ˈi to ratou manaˈo haava ei ite no ratou, na roto hoi i to ratou mau manaˈo e parihia ˈi aore ra e faatiahia ˈi ratou.” (Roma 2:14, 15) E nehenehe te feia atoa aita roa ˈtu i ite i te mau ture a Iehova e turaihia i te tahi taime e to ratou manaˈo haava ia haa ia au i te mau aratairaa a te Atua.

7. No te aha te manaˈo haava e nehenehe ai e hape i te tahi taime?

⁷ E nehenehe râ te manaˈo haava e hape i te tahi taime. No  te aha? Ia tuuhia te hoê aveia i pihai iho i te hoê auri ovahine, eita ïa te nira e tohu faahou i te apatoerau. E aita anaˈe e hohoˈa fenua tano roa, aita ïa e faufaa rahi to te aveia. Oia atoa, ia ohipa roa te mau hinaaro miimii o to tatou aau, e nehenehe to tatou manaˈo haava e tohu mai i te hoê aveia hape. E aita anaˈe te aratairaa papu a te Parau a te Atua ia faaohipa tatou i te reira, eita e haere ia tatou ia faataa ê i te mea maitai i te mea ino i roto e rave rahi tuhaa faufaa. Oia mau, ia ohipa maitai to tatou manaˈo haava, e hinaaro mau â tatou i te aratairaa a te varua moˈa o Iehova. Ua papai Paulo: “Te arataihia nei to ˈu manaˈo haava e te varua moˈa.” (Roma 9:1) E nafea râ e papu ai ia tatou e te tuati ra to tatou manaˈo haava i te varua moˈa o Iehova? Maoti ïa te haapiiraa.

8. (a) E nafea te aau e ohipa ˈi i nia i te manaˈo haava, e eaha te mea faufaa roa ˈˈe i roto i ta tatou mau faaotiraa e tia ˈi? (b) No te aha e ore ai e navai noa te hoê manaˈo haava maitai no te hoê Kerisetiano? (A hiˈo i te nota i raro i te api.)

⁸ E nafea oe e rave ai i te hoê faaotiraa tei niuhia i nia i te manaˈo haava? E au ra e e hiˈopoa noa vetahi i to ratou mau manaˈo e huru aau o roto, a faaoti atu ai i ta ratou e rave. E na ô paha ratou i muri iho: “Aita paˈi to ˈu manaˈo haava e hauti ra.” E nehenehe te mau hinaaro o te aau e puai roa, a ohipa ˈtu ai i nia i te manaˈo haava. Te na ô ra te Bibilia: “E haavare rahi to te aau i te mau mea atoa nei, e ua ino roa; o vai te ite?” (Ieremia 17:9) No reira, e ere o te mau hinaaro o to tatou aau ta tatou e feruri na mua roa. Ia feruri râ tatou na mua eaha ta te Atua ra o Iehova e au. b

9. Eaha te mǎtaˈu i te Atua, e e nafea te reira e ohipa ˈi i nia i to tatou manaˈo haava?

 ⁹ Mai te peu e ua niu-mau-hia te hoê faaotiraa i nia i to tatou manaˈo haava haapiihia, e faaite ïa te reira i to tatou mǎtaˈu i te Atua, eiaha to tatou iho mau hinaaro. E rave tatou i te hoê hiˈoraa. E tiaraa to te tavana haapao maitai ra o Nehemia e titau i te tahi mau tuhaa moni e tute i te nunaa i Ierusalema. Aita râ oia i na reira. No te aha? Mea riri na ˈna te manaˈo e faatupu i te au ore o Iehova ma te haavî i to ˈNa nunaa. Ua na ô oia: “Aita . . . vau i na reira, no te mea, te mǎtaˈu ra vau i te Atua.” (Nehemia 5:15) Mea faufaa roa te mǎtaˈu aau tae i te Atua, te mǎtaˈu aau atoa e faariri i to tatou Metua i te raˈi. E turai tera mǎtaˈu faatura ia tatou ia imi i te aratairaa i roto i te Parau a te Atua ia rave tatou i te mau faaotiraa.

10, 11. Eaha te mau aratairaa Bibilia no nia i te inuraa i te ava, e e nafea e noaa ˈi ia tatou te aratairaa a te Atua no te faaohipa i te reira?

¹⁰ A rave na ei hiˈoraa i te parau o te ava. Teie te hoê faaotiraa e mea tia ia rave e rave rahi o tatou i te mau taime faaanaanataeraa: E inu anei au aore ra eita? Na mua, e titauhia ia haapii tatou ia tatou iho. Eaha te mau aratairaa Bibilia e tano i roto i teie tuhaa? Aita iho â te Bibilia e faahapa ra i te inu faaau i te ava. Te arue ra te Bibilia ia Iehova no te ô o te uaina. (Salamo 104:14, 15) Te faahapa ra râ te Bibilia i te inu hua e te arearearaa ahoahoa. (Luka 21:34; Roma 13:13) Hau atu â, te faahiti ra te Bibilia i te taeroraa ava i rotopu i te mau hara ino roa, mai te mau peu taotoraa tia ore. c—Korinetia 1, 6:9, 10.

¹¹ Ua haapiihia e ua haamatarohia te manaˈo haava o te hoê Kerisetiano i taua mau aratairaa ra. No reira ia faaoti tatou e inu aore ra eita i te hoê oroa, e ui tatou ia tatou iho i  teie mau uiraa: ‘Eaha te huru oroa e faanahohia ra? E nehenehe anei te reira e faarahi, a riro atu ai ei arearearaa ahoahoa? Eaha to ˈu iho mau hinaaro? Te hiaai ra anei au i te ava, e tîtî anei au no te reira, e inu anei au no te tamǎrû ia ˈu? E haere anei ia ˈu ia haavî ia ˈu iho no te taotia i ta ˈu inu?’ A feruri ai tatou i te mau aratairaa Bibilia e te mau uiraa ta te reira e horoa mai, e mea maitai ia pure ia Iehova no te aratai ia tatou. (A taio i te Salamo 139:23, 24.) Ma te na reira, te ani nei ïa tatou ia Iehova ia aratai ia tatou maoti to ˈna varua moˈa. Te haapii atoa nei tatou i to tatou manaˈo haava ia faatano i nia i te mau aratairaa a te Atua. Te vai ra râ te tahi atu mea e titauhia ia feruri maitai tatou i roto i ta tatou mau faaotiraa.

12, 13. Eaha te tahi mau tumu e taa ê ai te mau manaˈo haava Kerisetiano, e eaha to tatou huru i mua i taua mau taa-ê-raa ra e tia ˈi?

¹² E maere paha oe i te tahi taime i te faito e taa ê ai te mau manaˈo haava Kerisetiano. E huru ê te hoê taata i te hoê peu aore ra peu tumu. Area te tahi atu, mea au ïa na ˈna, e aita e tumu e faahapahia ˈi te reira. No nia i te inuraa i te hoê po tamaaraa, ei hiˈoraa, mea au na te hoê e inu maa ava e te tahi mau hoa a faafaaea rii noa ˈi. Area te tahi atu ra, e huru ê ïa. No te aha tera mau taa-ê-raa, e e nafea te reira ia ohipa i nia i ta tatou mau faaotiraa e tia ˈi?

¹³ Mea rahi te tumu e mea taa ê ai te mau taata. E ere hoê â tupuraa to ratou. Ua ite maitai vetahi, ei hiˈoraa, i te hoê paruparu ta ratou i aro na na mua ˈˈe, peneiaˈe aita ratou i upootia noa. (Te mau arii 1, 8:38, 39) Mai te peu e ava taua paruparu ra, e haapao maitai roa ïa taua mau taata ra. Ia haere atu te hoê o ratou i ǒ oe, e turai paha to ˈna manaˈo haava ia ˈna ma te tano ia patoi i te ava ta oe e pûpû atu. E inoino anei oe? E onoono anei oe? Eita. Noa ˈtu e ua ite oe i ta ˈna mau tumu aore ra aita, te mau tumu ta ˈna e maiti  paha i te tapea noa na ˈna i roto i teie tupuraa, e turai te here taeae ia oe ia faatura ia ˈna.

14, 15. No nia i teihea tumu parau i taa ê ai te mau manaˈo haava o to te amuiraa no te senekele matamua, e eaha te aˈoraa a Paulo?

¹⁴ Ua ite te aposetolo Paulo e e pinepine mea taa ê roa te manaˈo haava o tera e tera Kerisetiano i te senekele matamua. I taua tau ra, i huru ê na te tahi mau Kerisetiano i te tahi mau maa tei pûpûhia ei tusia na te mau idolo. (Korinetia 1, 10:25) Aita te manaˈo haava o Paulo i patoi i taua mau maa ra o tei hoohia i muri iho i te matete. No ˈna, mea faufaa ore te mau idolo. Eita roa ˈtu e tia i te mau idolo ia fatu i te maa no ǒ mai ia Iehova ra e na ˈNa hoi te reira. Ua taa râ ia Paulo e aita te tahi atu e manaˈo ra mai ia ˈna no nia i te reira. Peneiaˈe mea haamori roa vetahi i te idolo hou a riro ai ei Kerisetiano. No ratou, mea au ore roa te mau mea atoa tei taaihia na mua ˈˈe i te haamori idolo. Eaha ïa te ravea?

¹⁵ Ua parau Paulo: “Area tatou o tei puai i roto i te faaroo, ia turu ïa tatou i tei ere ra i te puai a faaruru ai ratou i te paruparu e eiaha ia imi noa i to tatou iho maitai e tia ˈi. Aita atoa hoi te Mesia i imi i to ˈna iho maitai.” (Roma 15:1, 3) Te haaferuriraa a Paulo, oia ïa ia tuu tatou i te mau hinaaro mau o to tatou mau taeae na mua ˈˈe i to tatou iho e tia ˈi, mai te Mesia. I roto i te tahi atu aparauraa, ua parau Paulo e e ore roa oia e amu i te puaa ia ore ia turori te hoê mamoe poihere-roa-hia, no ˈna hoi te Mesia i horoa ˈi i to ˈna ora.—A taio i te Korinetia 1, 8:13; 10:23, 24, 31-33.

16. No te aha eiaha ˈi te feia e manaˈo haava taotia ˈtu â to ratou e faaino i te feia e manaˈo haava ê to ratou?

¹⁶ Area te feia e manaˈo haava taotia ˈtu â to ratou, eiaha ïa e faaino ia vetahi ê, ma te onoono e ia hiˈo te taatoaraa mai ia ratou i te mau mea tei taaihia i te manaˈo haava. (A taio i te Roma 14:10.) Oia mau, e mea maitai ia faaohipa i to tatou manaˈo haava no te haava ia tatou iho, eiaha no te haava ia vetahi ê. A haamanaˈo i te mau parau a Iesu: “A faaea i te haava ia ore outou ia haavahia.” (Mataio 7:1) E mea maitai  ia ore te mau mero atoa o te amuiraa e mârô i nia i te mau mea e na te taata tataitahi e faaoti ia au i to ˈna manaˈo haava. E imi râ tatou i te mau ravea no te paturu i te here e te auhoêraa, ma te faaitoito te tahi i te tahi, eiaha râ ma te vavahi te tahi i te tahi.—Roma 14:19.

17. Ua aha te manaˈo haava o te taata e rave rahi i teie tau?

¹⁷ Ua papai te aposetolo Petero: “Ei manaˈo haava maitai noa to outou.” (Petero 1, 3:16) E ô faahiahia roa te hoê manaˈo haava mâ i te aro o te Atua ra o Iehova. E ere mai te mau manaˈo haava o e rave rahi roa i teie tau. Ua faahiti Paulo i te feia ua tapaohia to ratou manaˈo haava i te auri ama. (Timoteo 1, 4:2) E paapaa te iˈo ia tapaohia i te auri ama, a puta  roa ˈtu ai te hohoˈa o te tapao i nia iho, e a etaeta ˈtu ai te iˈo. Oia mau, mea rahi te taata ua pohe to ratou manaˈo haava, eita e hauti faahou, a ore atu ai e horoa faahou i te mau faaararaa, te mau patoiraa, te faahaparaa aore ra e faatupu i te haama no te ino i ravehia. I teie tau, mea rahi aita roa ˈtu e tâuˈa ra i to ratou mau manaˈo faahapa.

18, 19. (a) Eaha te maitai o te mau manaˈo faahapa aore ra te haama? (b) Eaha ta tatou e nehenehe e rave ia tamau to tatou manaˈo haava i te faautua ia tatou no te mau hara tahito ua tatarahapa aˈena hoi tatou?

¹⁸ I te tanoraa, e nehenehe te mau manaˈo faahapa e riro ei faaararaa a te manaˈo haava ia tatou e ua rave tatou i te tahi mea ino. Ia turai tera mau manaˈo i te hoê taata hara ia tatarahapa, e nehenehe te hara ino roa ˈˈe e faaorehia. A hiˈo na i te arii Davida tei rave i te hara ino mau, o tei faaorehia  râ no te mea iho â râ ua tatarahapa mau oia. No to ˈna au ore i to ˈna haerea ino e ta ˈna faaotiraa papu e faaroo i te mau ture a Iehova mai reira mai, ua ite mata roa oia e mea “maitai” Iehova e te “tia” ia ˈna ia “faaore mai i te hara.” (Salamo 51:1-19; 86:5) E nafea râ ia tamau noa te mau manaˈo faahapa uˈana e te haama i muri aˈe i to tatou tatarahaparaa e te faaoreraahia ta tatou hapa?

¹⁹ I te tahi taime, e nehenehe te manaˈo haava e faautua roa ino i te hoê taata hara, a faahapa maoro atu ai oia ia ˈna iho aita hoi e tumu faufaa. I roto i tera mau tupuraa, e titauhia paha ia haapapu i to tatou aau faahapa ia tatou iho e ua rahi aˈe Iehova i te mau huru aau atoa o te taata. E titauhia ia tiaturi e ia farii tatou i to ˈna here e ta ˈna faaoreraa hapa, mai ta tatou e faaitoito ra ia vetahi ê ia na reira. (A taio i te Ioane 1, 3:19, 20.) Area te manaˈo haava tamâhia, e hopoi mai ïa i te hau o roto, te haapeapea ore e te oaoa rahi mea varavara i roto i teie nei ao. Ua ite e rave rahi o tei hara ino mau na, i teie tamǎrûraa faahiahia e e manaˈo haava maitai to ratou i teie nei a tavini ai i te Atua ra o Iehova.—Korinetia 1, 6:11.

20, 21. (a) Ua faaineinehia teie buka no te tauturu ia oe ia aha? (b) Ei Kerisetiano, te fanaˈo ra tatou i teihea tiamâraa, ia nafea râ tatou ia faaohipa i te reira e tia ˈi?

²⁰ Ua faaineinehia teie buka no te tauturu ia oe ia ite i taua oaoa ra, ia maitai noa to oe manaˈo haava i te roaraa o te mau mahana hopea arepurepu o te faanahoraa o te ao nei a Satani. Parau mau, eita ta teie buka e nehenehe e tatara huˈahuˈa i te taatoaraa o te mau ture e aratairaa Bibilia e titauhia ia feruri oe e ia faaohipa i roto i te mau huru tupuraa e fa mai i te mahana taitahi. Hau atu â, eiaha oe e tiai ia tuuhia mai te mau faatureraa taa maitai e te ohie no nia i te mau mea tei taaihia i te manaˈo haava. Te tumu o teie buka, o te tautururaa ïa ia oe ia haapii e ia haamataro i to oe manaˈo haava ma te hiˈopoa e nafea ia faaohipa i te Parau a te  Atua i roto i to oe oraraa i te mau mahana atoa. Taa ê roa i te ture a Mose, te ani ra “te ture a te Mesia” i te feia e pee ra i te reira ia faaau atu â i nia i te manaˈo haava e te mau aratairaa Bibilia, eiaha râ i nia i te mau ture papaihia. (Galatia 6:2) Te horoa ra ïa Iehova na te mau Kerisetiano i te hoê tiamâraa faahiahia roa. Teie râ, te haamanaˈo mai ra ta ˈna Parau e eiaha roa ˈtu e faaohipa i te reira “no te huna i te ohipa ino.” (Petero 1, 2:16) E ravea faahiahia râ taua tiamâraa ra no te faaite i to tatou here no Iehova.

²¹ Ma te feruri i roto i te pure i te maitai rahi ia pee i te mau aratairaa Bibilia e ia faaohipa i ta oe mau faaotiraa, e tamau ïa oe i te hoê ohipa faufaa roa tei haamata i te taime matamua a ite ai oe ia Iehova. O te haapiiraa ïa i “te faaohipa noa i to [oe] haroˈaroˈa.” (Hebera 5:14) E maitai oe i to oe manaˈo haava haapiihia i te Bibilia i te mau mahana atoa o to oe oraraa. Mai te aveia o te aratai i te ratere, e tauturu to oe manaˈo haava ia oe ia rave i te mau faaotiraa e au to oe Metua i te raˈi. E ravea papu teie e tamau ai oe i te rave i te mau mea e here ai te Atua ia oe.