Te hinaaro ra Iehova ia tapea maite te feia faaipoipo i ta ratou euhe o te faaipoiporaa. I to ˈna faaipoiporaa i te tane e te vahine matamua, ua parau Iehova e e ati te hoê tane i ta ˈna vahine, e e riro hoi raua ei hoê. I muri aˈe, ua faahiti faahou Iesu Mesia i taua parau ra e ua na ô: “No reira, o ta te Atua i taati, eiaha ïa te taata e faataa ê.” (Genese 2:24; Mataio 19:3-6) No Iehova  raua Iesu, e taairaa no te oraraa taatoa ïa te faaipoiporaa o te hope noa ia pohe hoê o na apiti. (Korinetia 1, 7:39) I te mea e e faanahoraa moˈa te faaipoiporaa, e ere ïa te faataaraa i te ohipa hauti. Inaha, mea riri na Iehova te mau faataaraa aita e tumu Bibilia.—Malaki 2:15, 16.

Eaha te hoê tumu Bibilia no te faataa? Mea riri na Iehova te faaturi e te mau peu taotoraa tia ore. (Genese 39:9; Samuela 2, 11:26, 27; Salamo 51:4) No te mea hoi e mea au ore roa na ˈna te mau peu taotoraa tia ore, te vaiiho ra oia i te reira ei tumu no te faataa. (Ei faahohonuraa i te auraa o tera mau peu, a hiˈo i te pene 9, paratarafa 7, i reira te faataaraahia te reira.) Te horoa ra Iehova na te apiti hapa ore i te maitiraa e faaoti e faaea noa e to ˈna hoa faaipoipo tei hapa aore ra e ani i te faataaraa. (Mataio 19:9) No reira, ia faaoti te hoê apiti hapa ore e ani i te faataaraa, eita Iehova e riri i taua faataaraa ra. I taua atoa râ taime ra, eita te amuiraa Kerisetiano e turai i te tahi taata ia ani i te faataaraa. No te tahi mau tupuraa, e nehenehe hoi te apiti hapa ore e faaea noa e to ˈna hoa faaipoipo tei hapa, mai te peu iho â râ e te tatarahapa mau ra oia. I te pae hopea, na te feia e tumu Bibilia ta ratou no te faataa e faaoti no ratou iho, a faaruru atu ai i te mau tupuraa atoa e fa mai i muri iho.—Galatia 6:5.

I roto i te tahi mau tupuraa ino roa, ua faaoti te tahi mau Kerisetiano e faataa ê aore ra e faataa i to ratou apiti tei ore hoi i rave i te mau peu taotoraa tia ore. I roto i tera tupuraa, te parau maitai ra te Bibilia e ia faataa ê noa ˈtu te hoê apiti, “eiaha oia ia faaipoipo faahou, aore ra ia hau faahou raua” to ˈna hoa faaipoipo. (Korinetia 1, 7:11) Eita ta taua Kerisetiano ra e nehenehe e haamatau i te tahi atu taata no te faaipoipo faahou. (Mataio 5:32) E hiˈo mai tatou i ǒ nei i te tahi noa mau tupuraa ino roa ta vetahi i manaˈo e e tumu ïa no te faataa ê.

Te oreraa e aupuru ma te opua i te utuafare. E nehenehe te hoê utuafare e veve roa, a ere atu ai i te mau mea faufaa roa no te ora, no te mea aita te tane faaipoipo e aupuru ra ia ratou e e nehenehe hoi ta ˈna. Te na ô ra te Bibilia: “Ia ore hoi te tahi ia aupuru . . . i te mau mero . . . o to ˈna utuafare, ua ere oia i te faaroo e ua hau aˈe to ˈna ino i to te taata aita e faaroo to ˈna.” (Timoteo 1, 5:8) Ia ore tera huru taata e taui, e nehenehe ta ˈna  vahine e faaoti e e ere anei mea tia ia ani oia i te faataa ê ia au i te ture no te paruru ia ˈna e i ta ˈna mau tamarii. Parau mau, e titauhia ia hiˈopoa maitai te mau matahiapo i te pariraa e aita te hoê Kerisetiano e aupuru ra i to ˈna utuafare. E nehenehe te hoê taata o te ore e aupuru i to ˈna utuafare e tiavaruhia.

Te hamani-ino-raa uˈana. E nehenehe te hoê apiti haavî e hamani ino i to ˈna hoa faaipoipo, a fifi atu ai to ˈna ea e to ˈna ora atoa. Mai te peu e e Kerisetiano te apiti haavî, e titauhia ia hiˈopoa te mau matahiapo o te amuiraa e e parau mau anei te mau pariraa. Te iria e te hoê huru haavî uˈana tamau, e tumu ïa no te tiavaru.—Galatia 5:19-21.

Te fifi-mau-raa te ea pae varua. E tamata noa paha te hoê apiti i te haafifi i to ˈna hoa faaipoipo ia haamori ia Iehova aore ra e faahepo atoa paha ia ˈna ia ofati i te mau faaueraa a te Atua i roto i te tahi mau tuhaa. I roto i tera tupuraa, e nehenehe te apiti o te haafifihia ra e faaoti e e ere anei o te aniraa i te faataa ê ia au i te ture te ravea hoê roa no te “auraro [i te Atua ei faatere] e tia ˈi eiaha te taata.”—Ohipa 5:29.

I roto i te mau hiˈoraa atoa tei taaihia i te mau tupuraa ino roa mai ta tatou i faahiti mai nei, eiaha te tahi noa ˈˈe taata e onoono i te apiti hapa ore ia faataa ê aore ra ia faaea noa e to ˈna hoa faaipoipo. E nehenehe te mau hoa feruriraa paari i te pae varua e te mau matahiapo e horoa ˈtu i te tauturu e te mau aˈoraa niuhia i nia i te Bibilia, aita râ ratou i ite i te mau mea atoa e tupu ra i rotopu i te hoê tane faaipoipo e ta ˈna vahine. O Iehova anaˈe tei ite. Parau mau, aita te hoê Kerisetiano e faatura ra i te Atua aore ra i te faanahoraa o te faaipoiporaa mai te peu e e faarahi o ˈna i to ˈna mau fifi i te fare no te fa noa e faataa ê i to ˈna hoa faaipoipo. Ua ite maitai Iehova i te mau opuaraa ino atoa i muri mai i te hoê faataa-ê-raa, noa ˈtu te mau tamataraa atoa i te huna i te reira. Inaha, “mea mahora hoi te mau mea atoa e te ite-maitai-hia e ana, ia ˈna hoi tatou e faˈi ai i ta tatou i rave.” (Hebera 4:13) Mai te peu râ e e maoro atu â te hoê tupuraa atâta roa ino, eiaha te tahi noa ˈˈe taata e faaino i te hoê Kerisetiano o te faaoti i te pae hopea e faataa ê. I te pae hopea, “e tia paatoa hoi tatou i mua i te terono haavaraa o te Atua.”—Roma 14:10-12.