Ua raea tatou i te huru tia ore no ǒ mai i te taata matamua, o Adamu ra. No reira te Bibilia e parau ai, e taata hara tatou pauroa. I te tahi mau taime, e rave tatou i te mau ohipa iino o ta tatou e tatarahapa i muri iho. Maoti râ te hoo ta Iesu Mesia i aufau, e nehenehe ta tatou mau hara e faaorehia. Eita anei tatou e mauruuru no teie ô no ǒ mai i te Atua?—A taio i te Roma 3:23, 24.

Ua rave vetahi i te hara rahi e te manaˈo ra ratou eita paha te Atua e faaore i te reira. Aua ˈˈe râ te faaite mai ra te Parau a te Atua: “E tamâ te toto o Iesu ta ˈna Tamaiti ia tatou i te mau hara atoa.” (Ioane 1, 1:7) Mai te peu e tatarahapa mau tatou, e farii Iehova i te faaore i ta tatou mau hara noa ˈtu e hara rahi.—A taio i te Isaia 1:18.

Ia hinaaro tatou e faaorehia ta tatou mau hara e te Atua ra o Iehova, e titauhia ia haapii tatou o vai o ˈna, ia taa i ta ˈna mau aratairaa, aˈoraa e titauraa. (Ioane 17:3) E faaore o Iehova i te mau hara a te feia o te tatarahapa i to ratou haerea ino e o te taui.—A taio i te Ohipa 3:19.

Ua ite Iehova i to tatou mau paruparu. E Atua hamani maitai oia e te î i te here! Eita anei te reira e turai ia oe ia haapii eaha te titauhia ia rave no te fanaˈo i ta ˈna farii maitai?—A taio i te Salamo 103:13, 14.