1, 2. E ani te mau metua i te tauturu ia vai no te haapii i ta ratou mau tamarii?

 “TE TAMARII ra, e tufaa ïa no ǒ ia Iehova ra,” ta te hoê metua mauruuru i ora na a 3 000 matahiti i teie nei, i parau. (Salamo 127:3) Oia mau, te oaoaraa i te tiaraa metua e fanaˈohia ra e te rahiraa o te feia faaipoipo, e haamaitairaa ïa no ǒ mai i te Atua ra. E ite vave râ te feia e tamarii ta ratou e e hopoi mai te tiaraa metua i te oaoa e te mau hopoia atoa hoi.

² I teie iho â râ mahana, e ohipa maere mau te haapaoraa i te tamarii. E rave rahi râ tei manuïa i te raveraa i te reira, e te faaite ra te taata papai salamo i te ravea, i te na ôraa e: “Ia ore Iehova e patu i te fare ra, e ohipa faufaa ore ta te feia i patu.” (Salamo 127:1) Ia pee maite anaˈe oe i te mau faaueraa a Iehova, e riro mai oe ei metua maitai aˈe. Te parau ra te Bibilia e: “E tiaturi ia Iehova ma to aau atoa ra; eiaha râ e tiaturi i to oe ihora haapao.” (Maseli 3:5) Ua ineine anei oe i te faaroo i te aˈoraa a Iehova a rave ai oe i ta oe opuaraa e haapii i ta oe tamarii e 20 matahiti te maoro?

3. Eaha te hopoia a te mau metua tane no nia i te haapiiraa i te mau tamarii?

³ I roto e rave rahi utuafare na te ao nei, te faariro nei te tane i te haapiiraa i te tamarii ei ohipa hoi na te vahine. Parau mau, te haafaufaa ra te Parau a te Atua i te tiaraa o te metua tane ei melo matamua no te faaamu i te utuafare. I reira, te parau-atoa-hia ra e te vai ra ta  ˈna mau hopoia i te fare. Te parau ra te Bibilia e: “E imi oe i ta oe ra mau ravea i te atea ê, a faaau maite ai ia au ta oe i rapae au; a faatia ˈi i to oe [utuafare] i muri aˈe.” (Maseli 24:27) Ia au i te manaˈo o te Atua, e apiti te metua tane raua te metua vahine no te haapiiraa i te tamarii.—Maseli 1:8, 9.

4. No te aha eita e tia ia tatou ia manaˈo e mea faahiahia aˈe te mau tamaroa i te mau tamahine?

⁴ Eaha to oe manaˈo no nia i ta oe mau tamarii? Te faaite ra te mau maimiraa i Asia e “e pinepine te metua i te mauruuru ore ia fanauhia mai te aiû tamahine.” Ia au i te mau maimiraa te ite-noa-hia ra te manaˈo pae tahi no nia i te mau tamahine i Marite Latino, e tae roa ˈtu i rotopu “i te mau utuafare maramarama.” Teie hoi te parau mau, e ere te mau tamahine i te mau tamarii no te hoê pǔpǔ haehaa aˈe. Ua faariro o Iakobo, te hoê metua tane tuiroo no te tau tahito, i te taatoaraa o ta ˈna mau tamarii, e tae noa ˈtu i te mau tamahine i fanauhia i taua taime ra, ei “tamarii ïa na te Atua i horoa mai na [ˈu].” (Genese 33:1-5; 37:35) Oia atoa, ua haamaitai Iesu i “te tamarii rii” atoa (te tamaroa e te tamahine) o tei hopoihia mai ia ˈna. (Mataio 19:13-15) Ia papu mau tatou e ua faaite o ˈna i te manaˈo o Iehova.—Deuteronomi 16:14.

5. Eaha te mau mea e tia ia ferurihia e nau hoa faaipoipo no te faaoti i te rahi o to raua utuafare?

⁵ E peu anei i to oe vahi ia titau te taata e ia fanau faarahi te hoê vahine i te tamarii? I te mea tano, na nau hoa faaipoipo ïa e faaoti ehia rahiraa tamarii ta raua. Eaha ˈtura ia ore anaˈe nau metua e nehenehe e faaamu, e faaahu, e e haapii i ta raua rahiraa tamarii? Papu maitai, e tia i nau hoa faaipoipo ia haapao i te reira ia faaoti raua i te rahi o to raua utuafare. E ani vetahi mau hoa faaipoipo o te maraa ore i te haapao i ta ratou iho tamarii e na te mau fetii e amo i te hopoia e faaamu i vetahi o ratou. E peu maitai anei te reira? Eita. Aita hoi  te reira e haamatara ra i te mau metua i ta ratou hopoia no nia i ta ratou iho mau tamarii. Te parau ra te Bibilia e: “O te taata hoi aore i hamani maitai i to ˈna ihora, e rahi atu â i to ˈna ihora utuafare, ua faarue ïa oia i te [“faaroo,” MN].” (Timoteo 1, 5:8) E tamata te mau hoa faaipoipo o te amo i ta ratou hopoia ia opua i te rahi o to ratou “utuafare” ia nehenehe ratou ‘e hamani maitai i to ratou iho utuafare.’ E nehenehe anei ratou e faataime i te fanauraa no te rave i te reira? Na te taata taitahi e faaoti atoa i te reira, e ia rave anaˈe nau hoa faaipoipo i teie faaotiraa, na raua atoa te parau no nia i te ravea ia ore ia hapû. “E riro hoi ta te taata nei hopoia ei nia ïa ia ˈna iho.” (Galatia 6:5) Teie râ, te faataimeraa i te fanau o te faatupu noa ˈtu i te tahi haamaruaraa tamarii, e patoi ïa te reira i te mau faaueraa tumu a te Bibilia. O te Atua ra o Iehova hoi “te tumu o te ora.” (Salamo 36:9) No reira, te faaoreraa i te hoê ora i tôhia, e faaite ïa te reira i te faatura ore rahi ia Iehova e e aifaito te reira i te hoê taparahiraa taata.—Exodo 21:22, 23; Salamo 139:16; Ieremia 1:5.

6. Afea e haamata ˈi i te haapii i te tamarii?

⁶ Te na ô ra te Maseli 22:6 e: “E haapii i te tamaiti i tana eˈa ia haere ra.” Te haapiiraa i te mau tamarii e hopoia faufaa rahi ïa na te mau metua. Afea râ te haapiiraa e haamata ˈi? I te haamataraa iho â. Ua tapao te aposetolo Paulo e ua haapiihia o Timoteo “mai to tamarii-rii-raa mai â.” (Timoteo 2, 3:15) E nehenehe te parau heleni e faaohipahia i ǒ nei e faataa i te hoê aiû iti aore ra i te hoê aiû i roto i te opu. (Luka 1:41, 44; Ohipa 7:18-20) No reira, e mea apî roa o Timoteo i te haapiiraahia—e mea maitai hoi. I te vai-tamarii-rii-raa ra, o te taime tano ïa no te haamata i te haapii i te hoê tamarii. E hiaai atoa te hoê aiû iti ia noaa ia ˈna te ite.

7. (a) No te aha e mea faufaa ia faatupu nau metua i te hoê taairaa piri e te aiû? (b) Eaha te taairaa e vai ra i rotopu ia Iehova e ta ˈna Tamaiti fanau tahi?

 ⁷ “I to ˈu ite-matamua-raa i ta ˈu aiû,” ta te hoê metua vahine e parau ra, “ua here roa vau ia ˈna.” Mai te reira iho â no te rahiraa o te mau metua vahine. E tupu i te rahi teie taairaa au rahi i rotopu i te metua vahine e ta ˈna aiû ia faaea raua raua anaˈe i muri aˈe i te fanauraa. Ia ote anaˈe oia i te û mama e piri roa teie taairaa. (A faaau e te Tesalonia 1, 2:7.) Ia hanihani te hoê metua vahine i ta ˈna aiû ma te paraparau ia ˈna, e mea faufaa roa no te haamâha i te mau manaˈo putapû o te aiû. (A faaau e te Isaia 66:12.) E no te metua tane ïa? E tia atoa ia ˈna ia faatupu i te hoê taairaa piri e ta ˈna aiû fanau apî. Ua riro hoi o Iehova iho ei hiˈoraa. I roto i te buka Maseli, e ite ai tatou i te taairaa e vai ra i rotopu ia Iehova e ta ˈna Tamaiti fanau tahi, o tei faataahia i te na ôraa e: “Ia Iehova ra vau i haamata ˈi oia i ta ˈna ohipa; . . . i te oaoa tamau-maite-raa i mua i tana aro.” (Maseli 8:22, 30; Ioane 1:14) E faatupu atoa ïa te hoê metua tane maitai i te hoê taairaa mahanahana e te here e ta ˈna tamarii mai te haamataraa mai â o to ˈna oraraa. “E faaite i te here ma te pipiri ore,” ta te hoê metua tane e parau ra. “Eita roa ˈtu te hoê tamarii e inohia ia tauahihia e ia apahia o ˈna.”

8. Eaha te mau mea o te faaanaanatae i te feruriraa o te mau aiû te tia i te mau metua ia horoa oioi?

⁸ E hau atu â râ ta te aiû e titau. Mai te fanauraahia mai â, ua ineine to ˈna roro i te farii e te haaputu i te haamaramaramaraa, e ua riro te mau metua ei tumu matamua no te reira. Ei hiˈoraa, a rave noa na i te parau no te reo. Te parau ra te feia maimi e ia ohie anaˈe te tamarii i te paraparau e te taio “te manaˈohia ra e e tuatiraa piri to te reira e te huru o te auraa e vai ra i rotopu i te aiû e to ˈna na metua i te haamataraa iho â.” A paraparau e a taio atu i ta oe tamarii a vai aiû noa ˈi oia. E hinaaro vave o ˈna i te pee i to oe huru, eita e maoro roa e haapii  oe ia ˈna i te taio. E ite ïa o ˈna i te taio hou oia e haere ai i te fare haapiiraa. E tauturu rahi te reira i te mau pae fenua iho â râ e mea varavara te mau orometua haapii e e mea rahi roa te tamarii i roto i te piha haapiiraa.

9. Eaha te tapao faufaa roa te tia i te mau metua ia haamanaˈo?

⁹ O te haamâharaa i te mau hinaaro i te pae varua o ta ratou mau tamarii te haapeapearaa matamua a te mau metua kerisetiano. (Hiˈo i te Deuteronomi 8:3.) Eaha te tapao e titauhia ra? Te tautururaa ïa i ta ratou mau tamarii ia faatupu i te huru taata e au i te Mesia, i te mea mau, ia “faataata apî.” (Ephesia 4:24) No te reira, e tia ia ratou ia feruri maite i te mau taoˈa paturaa e tano e te mau ravea paturaa e tano.

10. Eaha te mau huru maitatai te tia i te mau tamarii ia faatupu?

¹⁰ Te maitai o te hoê fare tei te huru ïa o te mau taoˈa e ravehia no te paturaa. Ua parau te aposetolo Paulo e te mau taoˈa paturaa maitai roa ˈˈe no te huru taata kerisetiano o “te auro, e te ario, e te ofai maitatai” ïa. (Korinetia 1, 3:10-12) Te faahohoˈa ra te reira i te mau huru maitatai mai te faaroo, te paari, te ite, te haapao maitai, te faatura, e te mauruuru î i te here no Iehova e ta ˈna ra mau ture. (Salamo 19:7-11; Maseli 2:1-6; 3:13, 14) Nafea te mau metua e tauturu ai i ta ratou mau tamarii mai te tamarii-rii-raa mai â ia faatupu i teie mau huru maitatai? Ma te pee i te hoê huru raveraa tei faataahia e mea maoro i teie nei.

11. Nafea te mau metua iseraela i te tautururaa ˈtu i ta ratou mau tamarii ia faatupu i te huru taata paieti?

¹¹ Hou iti aˈe te nunaa o Iseraela a tomo ai i te Fenua i tǎpǔhia, ua parau o Iehova i te mau metua iseraela e: “E teie nei mau parau ta ˈu e parau atu ia oe i teie nei mahana, ei roto i to [“mafatu,” MN] e vai ai: e e haapii tamau maite oe i to mau tamarii i taua mau parau nei; o ta oe ïa e parau ia parahi noa oe i roto i te fare, e ia haere  noa oe na te eˈatia ra, e ia taoto noa oe ra, e ia tia noa oe i nia ra.” (Deuteronomi 6:6, 7) Oia mau, e tia i te mau metua ia riro ei hiˈoraa, ei mau hoa, ei feia o te tauaparau, e ei feia haapii.

12. No te aha e mea faufaa ia riro te mau metua ei hiˈoraa maitai?

¹² Ia riro oia ei hiˈoraa. Na mua roa ˈˈe, ua parau o Iehova e: “E teie nei mau parau . . . ei roto i to [mafatu] e vai ai.” I muri iho hoi to ˈna parauraa ˈtu: “E haapii tamau maite oe i to mau tamarii i taua mau parau nei.” Ia itehia ïa na mua ˈˈe te mau huru o te Atua i roto i te mafatu o te mau metua. E tia i te metua ia here i te parau mau e ia ora ia au i te reira. I reira noa te mafatu o te tamarii e putapû ai. (Maseli 20:7) No te aha? No te mea e putapû hau atu te tamarii i ta ratou e ite ra i ta ratou e faaroo noa.—Luka 6:40; Korinetia 1, 11:1.

13. Ma te haapao maitai i ta ratou mau tamarii, nafea te mau metua kerisetiano ia pee i te hiˈoraa o Iesu?

¹³ Ia riro oia ei hoa. Ua parau Iehova i te mau metua no Iseraela e: ‘E paraparau i to mau tamarii ia parahi noa oe i roto i te fare, e ia haere noa oe na te eˈatia.’ E titau te reira ia horoahia te taime na te mau tamarii noa ˈtu te rahi o te ohipa a te mau metua. Ua manaˈo mau o Iesu e mea maitai ia horoa i to ˈna taime no te mau tamarii. I te mau mahana hopea o ta ˈna taviniraa, “ua hopoi maira [te taata] i te tamarii rii ia ˈna ra, ia faatiaia ˈtu oia ia ratou.” Mai te aha to Iesu huru? “Ua rave atura ia ratou, ua hii ihora . . . e ua [“haamaitai atura,” MN] oia ia ratou.” (Mareko 10:13, 16) A feruri na, te piri oioi maira hoi te hora o te poheraa o Iesu. Teie râ, ua horoa o ˈna i to ˈna taime ma te haapao maitai atu i teie mau tamarii. Auê ïa haapiiraa maitai e!

14. No te aha e mea maitai ia horoa nau metua i te taime na ta raua tamarii?

¹⁴ Ia riro oia ei taata o te tauaparau. Ia horoa oe i te taime no ta oe tamarii e ohie ïa oe i te tauaparau atu ia ˈna. Hau atu oe i te tauaparau, e hau atu ïa oe i te taa e nafea to ˈna huru i te tupuraa. A haamanaˈo râ, ua  hau atu te tauaparau i te aparau-noa-raa. “Ua haapii au i te faaroo maitai,” ta te hoê metua vahine no Beresilia i parau, “te faarooraa ma te mafatu tae.” Ua hoonahia oia i to ˈna faaoromairaa a haamata ˈi ta ˈna tamaiti i te faaite atu i to ˈna mau manaˈo putapû.

15. Eaha te tia ia haamanaˈohia no nia i te arearearaa?

¹⁵ E hinaaro te tamarii ei “taime to te ata . . . e taime to te ori,” ei taime ïa no te arearearaa. (Koheleta 3:1, 4; Zekaria 8:5) E mea faufaa roa ia arearea amui te metua e te tamarii. E mea peapea mau ia ite e i roto e rave rahi fare e faatueahia te arearearaa i te mataitairaa i te afata teata. I te mea e e faaanaanatae vetahi mau porotarama o te afata teata, e faaino râ e rave rahi i te mau  faufaa maitatai, e e mutu te tauaparauraa i roto i te utuafare ia mataitai-anaˈe-hia te afata teata. No te aha ïa e ore ai e rave i te tahi mea ê atu e ta orua mau tamarii? A himene, a hauti, a amuimui atu e te mau hoa, a haere e mataitai i te mau vahi au maitai. E tupu ohie te tauaparauraa i roto i teie mau huru raveraa.

16. Eaha te tia i te mau metua ia haapii i ta ratou mau tamarii no nia ia Iehova, e e nafea ratou?

¹⁶ Ia riro oia ei taata haapii. “E haapii tamau maite oe i to mau tamarii i taua mau parau nei,” o ta Iehova i parau. Te faaite ra te taatoaraa o te mau irava eaha e nafea oe ia haapii. Na mua, “e [here] atu oe i to Atua ia Iehova ma to [mafatu] atoa, e ma to [nephe] atoa, e ma to puai atoa.” (Deuteronomi 6:5; MN) I muri iho, “e teie nei mau parau . . . e haapii tamau maite oe.” Na roto i te haapiiraa ˈtu e tupu ai i te rahi te here ia Iehova e i ta ˈna mau ture ma te nephe taatoa. (A faaau e te Hebera 8:10.) Teie te auraa o te parau “haapii tamau maite,” o te haapiiraa ˈtu na nia iho e na nia iho noa. Te parau nei Iehova ia oe, e te ravea matamua no te tauturu i ta oe mau tamarii ia faatupu i te huru o te taata paieti, o te faaite-tamau-raa ˈtu ïa i te parau no nia ia ˈna. Ei haapiiraa bibilia tamau ïa ta ratou e tia ˈi.

17. Eaha te tia i nau metua ia faatupu i roto i ta raua tamarii? No te aha?

¹⁷ Ua ite te rahiraa o te mau metua e ere i te mea ohie ia ô te parau i roto i te mafatu o te hoê tamarii. Te faaitoito ra te aposetolo Petero i to ˈna mau hoa kerisetiano: “Ia hiaai maite outou, mai te tamarii fanau apî, i te û anoi-ore-hia ra i te parau.” (Petero 1, 2:2) Te horoa ra te tuuraa parau “hiaai maite” i te manaˈo e eita e rave rahi e hiaai i te maa pae varua. E titauhia ïa nau metua ia imi i te mau ravea ia tupu teie hiaai i roto i ta raua tamarii.

18. Eaha te tahi mau ravea haapiiraa a Iesu o te faaitoitohia ra e ia pee te mau metua?

¹⁸ Ua haaputapû o Iesu i te mafatu o te taata ma te  raveraa i te mau parabole. (Mareko 13:34; Luka 10:29-37) E mea faufaa mau teie huru raveraa i nia i te mau tamarii. A haapii atu i te mau faaueraa tumu a te Bibilia ma te faatia i te mau aamu anaanatae e rave rau mai te itehia ra i roto i te buka Ta ˈu Buka Aamu Bibilia. * A haaputa i te manaˈo o te mau tamarii. A vaiiho ia ratou ia hamani i te tahi mea, ma te papai i te hohoˈa e ma te hauti i te mau aamu o te Bibilia. Ua faaohipa atoa o Iesu i te mau uiraa. (Mataio 17:24-27) A pee i ta ˈna huru raveraa a faatere ai oe i te haapiiraa utuafare. Maoti i te horoa-noa-raa i te hoê ture a te Atua, a ani i te mau uiraa mai teie te huru, No te aha o Iehova i horoa mai ai i teie ture na tatou? Eaha te itehia mai ia haapao tatou i te reira? Eaha te tupu mai ia ore tatou e haapao? E tauturu teie mau uiraa i te hoê tamarii ia feruri e ia ite oia e mea faufaa e te maitai hoi te mau ture a te Atua.—Deuteronomi 10:13.

19. Ia pee anaˈe te mau metua i te mau faaueraa tumu a te Bibilia i te haapaoraa i ta ratou mau tamarii, eaha te mau faufaa rahi e fanaˈohia e te mau tamarii?

¹⁹ I te riroraa mai oe ei hiˈoraa, ei hoa, ei taata o te tauaparau, e ei taata haapii, e nehenehe oe e tauturu i ta oe tamarii mai te tamarii-rii-raa mai â ia faatupu i te hoê taairaa piri i rotopu ia ˈna e te Atua ra o Iehova. E faaitoito teie taairaa i ta oe tamarii e ia oaoa oia ei kerisetiano. E tutava ïa o ˈna no te ora ia au i to ˈna faaroo noa ˈtu e e faaruru oia i te faaheporaa a te mau hoa e te mau tamataraa. A tauturu tamau ia ˈna ia haafaufaa i teie taairaa here rahi.—Maseli 27:11.

20. Eaha te aˈo, e nafea ia faaohipa i te reira?

²⁰ Te aˈo, e haapiiraa ïa no te faaafaro i te feruriraa e te mafatu. E hinaaro tamau te tamarii i te reira. Te aˈo ra o Paulo i te mau metua tane ia “haapii râ [i ta ratou  mau tamarii] e ia paari ma te aˈo a [“Iehova,” MN] ra.” (Ephesia 6:4) E tia i te mau metua ia aˈo ma te here, mai ia Iehova ra te huru. (Hebera 12:4-11) E nehenehe te aˈo niuhia i nia i te here e horoahia ma te haaferuri. Te parauhia ra tatou “e faaroo mai i te aˈo.” (Maseli 8:33) Nafea ïa ia horoa ˈtu i te aˈo, e tia ˈi?

21. Eaha te mau faaueraa tumu e tia i te mau metua ia haamanaˈo ia aˈo ratou i ta ratou mau tamarii?

²¹ Te manaˈo ra vetahi metua e, no te aˈo i ta ratou mau tamarii, e ravai noa te mau parau haamǎtaˈu, ma te avau, aore ra ma te tuhi roa ˈtu ia ratou. No nia râ i teie â tumu parau, te faaara maira o Paulo e: “O outou hoi, e te feia metua ra, eiaha e faaooo atu i ta outou tamarii ia riri.” (Ephesia 6:4) Te faaitoitohia ra te mau kerisetiano atoa ia “mǎrû râ [ratou] i te taata atoa nei . . . ma te haapii mǎrû maite i te feia i mârô maira.” (Timoteo 2, 2:24, 25) E tamata te mau metua kerisetiano, o te ite hoi e e titauhia te aˈo etaeta, i te haamanaˈo i teie mau parau ia aˈo anaˈe ratou i ta ratou mau tamarii. I te tahi râ mau taime, eita e ravai te haaferuriraa, e e titauhia te tahi huru faautuaraa.—Maseli 22:15.

22. Mai te peu e e tia ia faautuahia te hoê tamarii, eaha te tia ia ˈna ia taa?

²² Ei huru aˈo taa ê te tano no tera e tera tamarii. Eita vetahi e “faaroo i te reo [“noa,” MN].” No ratou, e riro ïa te utua o te horoahia i taua taime ra no te faaroo ore i te faaora ia ratou. (Maseli 17:10; 23:13, 14; 29:19) E tia râ i te tamarii ia taa e no te aha o ˈna e faautuahia ˈi. “Na te papai e na te aˈo e haapaari atu.” (Maseli 29:15; Ioba 6:24) Hau atu, e mau otia to te utua. “E rave au ia oe ma te haapao maite,” ta Iehova i parau i to ˈna nunaa. (Ieremia 46:28b) Eita roa ˈtu te Bibilia e farii i te ruturaa ino ma te riri aore ra te tairi uˈana e haamamae e a pepe roa ˈi te hoê tamarii.—Maseli 16:32.

23. Eaha te tia i te hoê tamarii ia haroaroa ia faautuahia oia e to ˈna nau metua?

²³ I to Iehova faaararaa i to ˈna nunaa e, e aˈo hoi o ˈna  ia ratou, ua parau oia na mua ˈˈe: “Eiaha oe e mǎtaˈu . . . ei pihai atoa iho hoi au ia oe.” (Ieremia 46:28a) Oia atoa, eiaha roa te aˈo a te metua, noa ˈtu e mea tano, ia turai i te tamarii ia manaˈo e ua faaruehia o ˈna. (Kolosa 3:21) E tia râ i te tamarii ia haroaroa e ua horoahia mai te aˈo no te mea ‘tei pihai iho te metua ia ˈna,’ i to ˈna ra pae.

24, 25. Eaha te hoê haamǎtaˈuraa hairiiri e tia te mau tamarii ia paruruhia i teie mau mahana?

²⁴ E rave rahi feia paari o tei manaˈonaˈo i to ratou vai-tamarii-rii-raa mai te hoê tau oaoa. Te haamanaˈo ra ratou i te oraraa hau mahanahana, ma te manaˈo papu e e haapao iho â to ratou metua ia ratou noa ˈtu eaha te huru tupuraa. E hinaaro te metua e ia na reira atoa no ta ratou iho mau tamarii, i roto râ i teie ao viivii roa, e mea fifi aˈe i tei matauhia na, ia paruru i te tamarii.

²⁵ Te hoê haamǎtaˈuraa hairiiri mau tei maraa i teie mau matahiti i mairi aˈenei, o te hamani-ino-raa ïa i te tamarii i te pae taatiraa o te tino. I Malaisia, ua  tataimaha te rahiraa o te hamani-ino-raa i te pae taatiraa i nia i te tamarii i te roaraa ahuru matahiti. I Helemani te hamani-ino-hia ra e 300 000 tamarii i te pae taatiraa i te matahiti hoê, e i roto i te hoê fenua no Marite Apatoa, ia au i te hoê maimiraa i neneihia, e mea hitimahuta mau te numera e 9 000 000 i manaˈohia no te hoê matahiti! Ma te ati mau, te hamani-ino-hia ra te rahiraa o teie mau tamarii i roto i to ratou iho fare e te feia matauhia e o ta ratou hoi e tiaturi ra. E tia ïa, e ia vai to te mau tamarii ravea parururaa etaeta oia hoi to ratou iho mau metua. Nafea te mau metua ia riro ei feia o te paruru?

26. Eaha te tahi mau ravea no te paruru i te mau tamarii, e nafea te ite ia paruru i te hoê tamarii?

²⁶ Te faaite ra hoi te mau ohipa i tupu e e ohie te tamarii ite ore no nia i te taatiraa o te tino i te vare i te feia hamani ino, te hoê ravea faufaa no te paruru, o te haapiiraa ˈtu ïa i te tamarii, noa ˈtu e e mea apî roa. E riro te ite ei parururaa “ia ore [oia] e hape i te eˈa o te feia parau ino ra; i te mau taata e parau i te parau piˈo ra.” (Maseli 2:10-12) Teihea ïa ite? Te ite no nia i te mau faaueraa tumu a te Bibilia, te mea tia e te mea hape i te pae morare. Te ite-atoa-raa e, e rave vetahi feia paari i te ohipa ino e aita e titauhia ra i te hoê tamarii apî ia auraro ia ani noa ˈtu te taata ia ˈna ia rave i te mau ohipa tano ore. (A faaau e te Daniela 1:4, 8; 3:16-18.) Eiaha e horoa i teie huru haapiiraa i te hoê noa taime. E titau te rahiraa o te mau tamarii apî ia na nia iho noa i te haapii hou te reira e mau maitai ai. Ia paari anaˈe te tamarii, e tia i te hoê metua tane ia faatura ma te here i te tiaraa o ta ˈna tamahine i te faaea o ˈna anaˈe iho, e te hoê metua vahine i to ta ˈna tamaroa—ma te haapaari ïa i te manaˈo o te hoê tamarii no nia i te mea tano. E no reira, te parururaa maitai roa ˈˈe no nia i te hamani-ino-raa i te pae taatiraa o te hiˈopoa-maite-raa ïa a te mau metua.

27, 28. O vai te Tumu rahi roa ˈˈe o te tauturu o nau metua ia tautoo raua i te haapii i te hoê tamarii?

²⁷ Parau mau, e tautooraa te haapiiraa i te hoê tamarii mai te tamarii-rii-raa mai â, eita râ nau metua faaroo e faaruru i teie tautooraa raua anaˈe. I te mau mahana o te mau Tavana ra, i to te hoê taata o Manoa te iˈoa iteraa e, e riro oia ei metua tane, ua ani oia ia Iehova i te aratairaa no te haapii i ta ˈna tamaiti. Ua pahono o Iehova i ta ˈna mau pure.—Te mau Tavana 13:8, 12, 24.

²⁸ Oia atoa i teie mahana, ia haapii anaˈe te mau metua faaroo i ta ratou mau tamarii, e nehenehe atoa ratou e pure ia Iehova. E ohipa teimaha te riroraa ei metua, te vai nei râ te mau haamaitairaa rahi. Te parau ra nau hoa faaipoipo kerisetiano no Vaihi e: “E 12 matahiti e vai ra no te haapii i ta orua tamarii hou te tau peapea mau o te taurearearaa. Mai te peu râ, ua tutava orua i te faaohipa i te mau faaueraa tumu a te Bibilia, e taime ootiraa i te oaoa e te hau ia faaoti anaˈe ratou e te hinaaro ra ratou e tavini ia Iehova ma te mafatu tae.” (Maseli 23:15, 16) Ia rave anaˈe ta oe tamarii i teie faaotiraa, e hinaaro atoa ïa oe e parau e: “Te tamarii ra [tamaroa e tamahine], e tufaa ïa no ǒ ia Iehova ra.”