Ta vai te haamoriraa ta te Atua e farii?
Pene 5
Ta vai te haamoriraa ta te Atua e farii?
1. Eaha ta te hoê vahine samaria i hinaaro e ite no nia i te haamoriraa?
AITA anei oe i uiui aˈenei e, ‘Ta vai te haamoriraa ta te Atua e farii?’ Ua ô mai te hoê uiraa mai teie te huru i roto i te feruriraa o te tahi vahine ia ˈna i paraparau atu ia Iesu Mesia i pihai iho i te Mouˈa ra no Gerizima i Samaria. Ma te huti i te manaˈo i nia i te hoê taa-ê-raa e vai ra i rotopu i te haamoriraa a to Samaria e a te mau ati Iuda, ua parau atura oia e: “I haamori na hoi to matou hui metua i nia i teie nei mouˈa; e te parau nei outou, tei Ierusalema te vahi e tia ˈi ia haamori te taata.” (Ioane 4:20) Ua parau anei o Iesu i taua vahine no Samaria ra e e farii te Atua i te mau haamoriraa atoa? Aore ra ua parau anei oia e e titauhia te tahi mau ohipa taa maitai e fariihia mai ai e te Atua?
2. Ei pahonoraa i te vahine samaria, eaha ta Iesu i parau?
2 Teie te pahonoraa maere mau a Iesu: “Ua fatata te hora e ore e tae mai ai outou i teie nei mouˈa, e e ore hoi e haere i Ierusalema, haamori ai i te Metua.” (Ioane 4:21) Mea maoro to te mau Samaria haamoriraa ia Iehova e te tahi atu mau atua i te Mouˈa ra i Gerizima. (Te mau arii 2, 17:33) I teie nei, te parau ra o Iesu Mesia e eita taua vahi ra e eita atoa o Ierusalema i te mea faufaa roa i roto i te haamoriraa mau.
HAAMORI MA TE VARUA E TE PARAU MAU
3. (a) No te aha te mau Samaria i ore ai i ite papu o vai mau na te Atua? (b) Nafea te mau ati Iuda haapao maitai e te tahi atu i nehenehe ai e ite e o vai te Atua?
3 Ua parau atura Iesu i te vahine samaria e: “Aore outou i ite i ta outou e haamori nei, ua ite matou i ta matou e haamori nei, no te ati Iuda mai te ora.” (Ioane 4:22) E mau manaˈo hape to te mau Samaria i te pae no te faaroo e ua farii noa ratou i na buka matamua e pae o te Bibilia ei mau buka faauruahia—e te reira i roto i ta ratou iho mau buka i hiˈopoa-faahou-hia oia hoi na buka e pae no Samaria. No reira, aita ratou i ite mau e o vai mau na te Atua. Tera râ, ua tuuhia mai i te mau ati Iuda te ite no nia i te mau Papai. (Roma 3:1, 2) Ua horoa mai te mau Papai na te mau ati Iuda haapao maitai e na te tahi atu mau taata farii i te mea e hinaarohia e ratou ia noaa te ite i te Atua.
4. Ia au i ta Iesu i parau, eaha ta te mau ati Iuda e ta te mau Samaria e tia ia rave e fariihia ˈi ta ratou haamoriraa e te Atua?
4 Inaha, te faaite ra o Iesu i te mau ati Iuda e i to Samaria e e tia ia ratou ia faatano i ta ratou huru haamoriraa ia fariihia mai ratou e te Atua. Ua na ô atura oia e: “Ua fatata râ, e teie nei hoi taua hora, e haamori ai i te Metua te feia haamori mau ra, ma te varua e te parau mau: o te huru ïa o te feia haamori ta te Metua e titau nei. E Varua te Atua, e te feia e haamori ia ˈna ra, e haamori ïa ma te varua e te parau mau e tia ˈi.” (Ioane 4:23, 24) No te haamori i te Atua “ma te varua,” e tia ia tatou ia fanaˈo i to ˈna varua e ia arataihia e taua varua ra. E nehenehe e haamori i te Atua ‘ma te parau mau’ na roto i te haapiiraa i ta ˈna Parau, te Bibilia, e te haamoriraa ia ˈna ia au i ta ˈna parau mau i faaitehia ra. Te hinaaro mau ra anei oe e na reira?
5. (a) Eaha te auraa o te parau ra “haamori”? (b) Eaha te tia ia tatou ia rave mai te peu e e hinaaro tatou ia farii mai te Atua i ta tatou haamoriraa?
5 Ua haapapu maira o Iesu e te hinaaro maira te Atua i te haamoriraa mau. Te faaite maira te reira e te vai ra te mau huru haamoriraa eita o Iehova e farii. Haamori i te Atua, te auraa ra te faaiteraa ïa ia ˈna i te hanahana tura e te horoaraa i te taviniraa moˈa. Mai te peu e e hinaaro oe e faaite i te tura i te hoê taata faatere puai mau, e oioi atoa ïa oe i te tavini ia ˈna e i te rave i te mea e fariihia mai e ana. Papu maitai atoa, e hinaaro tatou ia farii mai te Atua ia tatou. Maoti hoi i te parau noa e, ‘Mea au na ˈu ta ˈu haapaoraa,’ e tia ïa ia tatou ia papu e te tuea nei ta tatou haamoriraa e te mau titauraa a te Atua.
TE RAVERAA I TE HINAARO O TE METUA
6, 7. No te aha o Iesu i ore ai e farii vetahi mau taata e parau ra e e mau pǐpǐ ratou na ˈna?
6 E taio anaˈe na i te Mataio 7:21-23 e e hiˈo atu ai e e nehenehe anei ta tatou e taa e eaha te mea e haapapu mai e farii anei te Atua i te mau haamoriraa atoa. Teie ta Iesu i parau: “E ore te feia e parau mai ia ˈu ra e, E te fatu, e te fatu, e hope paatoa i te tae i te basileia ra o te ao, o te taata râ i haapao i te hinaaro o tau Metua i te ao ra. E rave rahi te parau mai ia ˈu ia tae i taua mahana ra, E te Fatu, e te Fatu, e ere anei ua haapii matou ma to oe iˈoa, e ua tatai i te mau demoni [mau varua iino] i to oe iˈoa, e ua rave i te semeio e rave rahi i to oe iˈoa? O ta ˈu ïa e parau atu, Aita roâ vau i ite ia outou. E haere ê atu outou, e te feia rave parau ino.”
7 Te fariiraa ia Iesu Mesia ei Fatu, mea faufaa roa ïa i roto i te haamoriraa mau. Te faaite ra râ te reira e te erehia ra te tahi mea i roto i te haamoriraa a te rahiraa o te feia e parau ra e o ratou te mau pǐpǐ a Iesu. Te parau ra oia e e faatupu vetahi pae “i te semeio,” mai te mau faaoraraa semeio e parauhia ra. Tera râ, eita ratou e rave i ta Iesu i parau e mea faufaa roa. Eita ratou e “haapao i te hinaaro o [to ˈna] Metua.” Mai te peu e e hinaaro tatou ia farii mai te Atua ia tatou, e tia ia tatou ia haapii eaha mau na te hinaaro o te Metua e ia faaohipa i te reira.
TE ITE MAU—E PARURU
8. Mai te peu e e tia ia tatou ia rave i te hinaaro o te Atua, eaha te titauhia, e eaha te mau manaˈo hape te tia roa ia tatou ia haapae?
8 E titau te faatupuraa i te hinaaro o te Atua i te ite mau no nia i te Atua ra o Iehova e ia Iesu Mesia. E aratai taua ite ra i te ora mure ore. Papu maitai atura ïa e hinaaro tatou paatoa i te ravea e noaa ˈtu ai ia tatou i te ite mau no roto mai i te Parau a te Atua, te Bibilia. Te parau ra vetahi e aita to te reira e faufaa mai te peu e e aau rotahi to tatou e mea itoito tatou i roto i ta tatou haamoriraa. Te parau ra te tahi atu e, ‘Mai te peu e mea iti roa to oe ite, mea iti atoa ïa te titauhia ia oe.’ Te faaitoito maira râ te Bibilia e ia rahi to tatou ite no nia i te Atua e i ta ˈna mau opuaraa e tia ˈi.—Ephesia 4:13; Philipi 1:9; Kolosa 1:9.
9. Nafea te ite mau ia paruru ia tatou, e no te aha tatou e hinaaro ai i taua huru paruru ra?
9 E riro taua huru ite nei ei paruru ia tatou i te mea e haaviivii i ta tatou nei haamoriraa. Ua faahiti te aposetolo Paulo i te parau no te tahi varua tei faahua faariro ia ˈna ‘ei melahi no te maramarama.’ (Korinetia 2, 11:14) Ma te huna i to ˈna huru mau, e tamata teie varua—o Satani—i te haavare ia tatou no te rave i te mau mea tei taa ê roa i te hinaaro o te Atua. Ua haaviivii atoa te tahi atu mau varua tei tahoê ia Satani i te haamoriraa a te taata inaha, te na ô ra o Paulo e: “Ta te Etene i faatusia ra, i faatusia ïa na te mau demoni, e ere na te Atua.” (Korinetia 1, 10:20) Oia atoa, mea rahi tei manaˈo e mea tano ta ratou huru haamoriraa, noa ˈtu â ïa e aita ratou i rave i ta te Atua e hinaaro ra. Ua topa ratou i roto i te haamoriraa hape viivii mau. E haapii hau atu â tatou no nia ia Satani e te mau demoni a muri aˈe, tera râ ua haaviivii roa teie mau enemi o te Atua i te haamoriraa a te huitaata nei.
10. Eaha ta oe e rave ia faataero te hoê taata ma te opua mau hoi, i ta oe pape, e eaha ta te ite mau no nia i te Atua e rave no te faaineine ia tatou?
10 Mai te peu e ua ite oe e ua faataero te hoê taata i ta oe pape, e tamau noa anei oe i te inu i te reira? Papu maitai, e haavitiviti oe i te haere e paimi i te pihaa maitai, i te pape viivii ore. Oia mau, e faaineine te ite mau no nia i te Atua ia tatou ia itea mai te haapaoraa mau e ia faarue roa i te mau mea viivii e riro ai te haamoriraa i te farii-ore-hia e te Atua.
MAU FAAUERAA A TE TAATA EI HAAPIIRAA
11. Eaha te mea hape i roto i te haamoriraa a te mau ati Iuda e rave rahi?
11 Ia Iesu i parahi i te fenua nei, aita te mau ati Iuda e rave rahi i haa ia au maite e te ite mau no nia i te Atua. Ua erehia hoi ratou i te ravea e noaa ˈi ia ratou i te hoê tiaraa viivii ore i mua i te aro o Iehova. No nia ia ratou, teie ta Paulo i papai: “O vau te ite ia ratou, e itoito to ratou i ta te Atua, e ere râ i te itoito ite.” (Roma 10:2) Ua opua ratou no ratou iho nafea râ ia haamori i te Atua maoti hoi i te faaroo i ta ˈna i parau mai.
12. Na te aha i haaviivii i te haamoriraa a Iseraela, e eaha te faahopearaa?
12 Ua faaohipa te mau ati Iseraela i te omuaraa ra i te haapaoraa viivii ore ta te Atua i horoa mai, ua viivii aˈera râ hoi te reira i te mau haapiiraa e te mau manaˈo philosopho a te taata nei. (Ieremia 8:8, 9; Malaki 2:8, 9; Luka 11:52) Noa ˈtu â ïa e ua manaˈo te mau aratai faaroo ati Iuda oia hoi te mau Pharisea e te farii maira te Atua i ta ratou haamoriraa, ua na ô atura Iesu ia ratou e: “E te mau haavare e, te au maite na outou i ta Isaia i parau mai ia outou na, a na ô mai ai oia ra e, Te faatura mai nei te vaha o teie nei feia ia ˈu, area to ratou aau ra tei te atea ê ïa. E haamoriraa faufaa ore râ ta ratou ia ˈu, tei haapii ratou i tei tuuhia mai e te taata anaˈe ra.”—Mareko 7:6, 7.
13. Nafea tatou ia rave mai te mau Pharisea?
13 E nehenehe anei tatou e rave mai te mau Pharisea? E nehenehe te reira e tupu ia pee tatou i te mau parau tutuu faaroo i vaiihohia mai e to tatou mau tupuna maoti hoi i te tuatapapa eaha ta te Atua i parau no nia i te haamoriraa. Ma te faaara mai no nia i teie nei ati atâta mau, teie ta Paulo i papai: “Te parau papu maira râ te [v]arua, e ia tae i te mau tau a muri atu e faarue ai te tahi pae i te faaroo nei, i te faarooraa ˈtu i te mau varua haavare, e te parau o te mau demoni ra.” (Timoteo 1, 4:1) No reira, eita e navai te parau-noa-raa e te farii maira te Atua i ta tatou haamoriraa. Mai te vahine samaria i farerei ia Iesu, eita e ore ua noaa atoa ia tatou i te huru haamoriraa no roto mai i to tatou mau metua. E tia râ ia tatou e ia papu maitai e te rave ra anei tatou i te mau mea ia au i te hinaaro o te Atua.
E ARA EIAHA E FAAOOO I TE ATUA
14, 15. Mai te peu e ua noaa ia tatou i te tahi maa ite no nia i te hinaaro o te Atua, no te aha tatou e tia ˈi ia haapao maitai?
14 Ia ore tatou e haapao maitai, e riro tatou i te rave i te hoê ohipa eita e fariihia mai e te Atua. Ei hiˈoraa, ua tipapa aˈera te aposetolo Ioane i te pae avae o te hoê melahi “e haamori ia ˈna.” Ua faaara ˈtura râ te melahi e: “[A haapao maitai!] Eiaha oe e na reira: e taetaeae tavini hoi au no oe, e no to mau taeae e faaite i te parau o Iesu ra: o te Atua te haamori.” (Apokalupo 19:10) No reira te ite ra anei oe i te faufaaraa ia papu mau oe e aita anei ta oe haamoriraa i viivii i te tahi huru haamoriraa idolo?—Korinetia 1, 10:14.
15 A haamata ˈi vetahi mau kerisetiano i te faaohipa i te mau peu faaroo tei ore hoi i fariihia e te Atua, ua ui aˈera o Paulo e: “Eaha outou i hoˈi faahou atu ai i taua mau â rii tia ore i ta outou e hinaaro na e ia tavini faahou â outou i te reira? Te haapao na hoi outou i te mahana, e te avae, e te tau, e te matahiti. Te mǎtaˈu nei au ia outou, o te riro ta ˈu ohipa ia outou na ei mea faufaa ore.” (Galatia 4:8-11) Ua noaa i taua feia nei i te hoê ite no nia i te Atua, ua hape râ ratou i muri iho i te haapaoraa ratou i te peu faaroo e te mau mahana moˈa o tei ore roa ˈtu hoi i fariihia e Iehova. Mai ta Paulo i parau, mea hinaaro na tatou “ia itea . . . [i] te mea au i te Fatu ra.”—Ephesia 5:10.
16. Nafea te Ioane 17:16 e te Petero 1, 4:3 ia tauturu ia tatou ia faaoti e te farii maira anei te Atua i te mau mahana oroa e te mau peu?
16 E tia ia tatou ia papu e te ape mau ra tatou i te mau mahana oroa e te tahi atu mau peu e ofati ra i te mau faaueraa tumu a te Atua. (Tesalonia 1, 5:21) Ei hiˈoraa, ua na ô atura o Iesu i ta ˈna mau pǐpǐ e: “E ere ratou i to teie nei ao, mai ia ˈu nei hoi e ere i to teie nei ao.” (Ioane 17:16) Te vai ra anei i roto i ta oe haapaoraa te mau oroa e te mau mahana oroa e ofati ra i te faaueraa tumu no nia i te oreraa e amui atu i roto i te mau ohipa a to teie nei ao? Aore ra te apiti ra anei te mau melo o ta oe haapaoraa i te tahi mau taime i roto i te mau peu e te mau oroa e tuati noa i te haerea ta te aposetolo Petero i faataa mai? Teie hoi ta ˈna i papai: “To tatou hoi maa taime i mairi aˈe i to tatou oraraa nei, atire ïa i te raveraa i to te Etene hinaaro, a rave ai i te peu tiaâ ra, e te hinaaro tia ore ra, e te inu rahi i te uaina ra, e te amuiraa hauti ra, e te faataero i te ava ra, e te mau peu atâta a te idolo ra.”—Petero 1, 4:3.
17. No te aha tatou e haapae ai i te mau mea atoa e faaite mai i te huru feruriraa o teie nei ao?
17 Te haapapu ra te aposetolo Ioane e e tia ia haapae roa i te mau peu e faaite ra i te huru feruriraa o te ao paieti ore e haaati ra ia tatou nei. Ua papai o Ioane e: “Eiaha e hinaaro i teie nei ao, e te mau mea atoa o teie nei ao. O te taata i hinaaro i teie nei ao ra, aore te hinaaro i te Metua ra i roto ia ˈna. O te mau mea atoa o teie nei ao, o te hinaaro tia ore o te tino nei, e te hinaaro tia ore o te mata nei, e te ahaaha o te oraraa nei, e ere ïa i to ǒ mai i te Metua ra, no teie nei ao anaˈe ïa. E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.” (Ioane 1, 2:15-17) Ua tapao mai anei oe e e tia i te taata ‘e haapao i to te Atua ra hinaaro’ i te vairaa e a muri noa ˈtu? Oia mau, mai te peu e e rave tatou i to te Atua hinaaro e e haapae tatou i te mau ohipa e faatupu ra i te huru feruriraa o teie nei ao, e nehenehe ïa e noaa ia tatou i te tiaturiraa o te ora mure ore!
IA MAU MAITE I TE MAU TURE TEITEI A TE ATUA
18. Mea nafea vetahi mau Korinetia i te haperaa i te pae no te haerea, e eaha ta tatou e haapii mai i te reira?
18 Te hinaaro ra te Atua ei feia haamori na ˈna te feia e faaau ia ratou i ta ˈna mau ture morare teitei mau. Ua manaˈo vetahi mau Korinetia i tahito ra ma te hape hoi e e farii te Atua i te haerea taiata. E nehenehe tatou e ite i to ratou hape ia taio tatou i roto i te Korinetia 1, 6:9, 10. Ia haamori tatou i te Atua ma te au, e tia ia mauruuru oia i ta tatou e parau nei e ta tatou e rave nei. Te faaitoito ra anei ta oe huru haamoriraa ia na reira oe?—Mataio 15:8; 23:1-3.
19. Nafea te haamoriraa mau ia ohipa i nia i ta tatou faaauraa ia vetahi ê?
19 Ia faaite atoa to tatou mau auraa e te tahi atu mau taata e te haapao mau ra tatou i te mau ture a te Atua. Ua faaitoito mai o Iesu Mesia ia tatou ia faaau ia vetahi ê mai ta tatou e hinaaro ra e ia na reira-atoa-hia tatou, inaha e tuhaa hoi teie no te haamoriraa mau. (Mataio 7:12) A tapao na eaha atoa ta ˈna i parau no nia i te faaiteraa i te here autaeae: “O te mea teie e ite ai te taata atoa e, e pǐpǐ outou na ˈu, ia [here] outou ia outou iho.” (Ioane 13:35) E tia i te mau pǐpǐ a Iesu ia here te tahi e te tahi e ia hamani maitai i to ˈna mau hoa haamoriraa e te tahi atu mau taata.—Galatia 6:10.
TE HAAMORIRAA MA TE MAFATU TAATOA
20, 21. (a) Eaha te huru haamoriraa ta te Atua e titau maira? (b) No te aha o Iehova i ore ai e farii i te haamoriraa a Iseraela i te tau o Malaki?
20 I roto i to oe mafatu, e hinaaro paha oe e haamori i te Atua ma te fariihia mai. Mai te peu e e, ia noaa ïa ia oe i te manaˈo o Iehova no nia i te haamoriraa e tia ˈi. Te haapapu ra te pǐpǐ ra o Iakobo e o te manaˈo o te Atua te mea faufaa roa, eiaha to tatou. Te na ô ra o Iakobo e: “O te paieti mau e te ino ore i mua i te aro o te Atua, o to tatou Metua ra, o teie ïa, O te hamani maitai i te otare e te mau vahine ivi i to ratou ra ati, e te tiai maitai ia ˈna iho, eiaha ia viivii i teie nei ao.” (Iakobo 1:27) Ma te hinaaro mau e ia fariihia mai tatou e te Atua, e tia ia tatou tataitahi ia hiˈopoa i ta tatou haamoriraa ia papu ia tatou e aita anei i viivii i te mau peu paieti ore aore ra aita anei tatou i haapae i te mea o ta ˈna e faariro ra ei mea faufaa roa.—Iakobo 1:26.
21 O te haamoriraa viivii ore anaˈe ma te mafatu taatoa ta Iehova e farii. (Mataio 22:37; Kolosa 3:23) A ere ai te nunaa Iseraela i teie huru haamoriraa i te Atua, ua na ô atura oia e: “E faatura te tamaiti i te metua tane, e te tavini i tana fatu: e teie nei, e metua vau ra, teihea taua tura no ˈu ra? e e fatu hoi au ra, teihea vau i te mǎtaˈuraahia?” Ua faaino ratou i te Atua ma te pûpû atu na ˈna ei tusia, i te mau animala matapo, pirioi e te maˈimaˈi, e aita hoi oia i farii i taua mau huru ohipa haamoriraa ra. (Malaki 1:6-8) Mea faufaa roa na Iehova i te huru haamoriraa viivii ore e mea hinaaro na ˈna ia haamorihia oia anaˈe ra.—Exodo 20:5; Maseli 3:9; Apokalupo 4:11.
22. Mai te peu e e hinaaro tatou e ia farii mai te Atua i ta tatou haamoriraa, eaha ta tatou e haapae, e eaha ta tatou e rave?
22 Mai te huru ra ïa e mea anaanatae mau na te vahine samaria i paraparau atu ia Iesu, i te haamori i te Atua ia au i te haerea e fariihia mai e ana. Mai te peu e te reira atoa to tatou hinaaro, e haapae ïa tatou i te mau haapiiraa e te mau peu viivii. (Korinetia 2, 6:14-18) Ei monoraa, e faaitoito tatou ia noaa ia tatou i te ite mau no nia i te Atua e ia faatupu tatou i to ˈna hinaaro. E faaohipa maite tatou i ta ˈna mau titauraa ia nehenehe ta tatou haamoriraa ia fariihia mai. (Timoteo 1, 2:3, 4) Te tutava nei te mau Ite no Iehova i te na reiraraa, e te faaitoito nei ratou ia oe ma te mahanahana ia apiti mai ia ratou no te haamoriraa i te Atua “ma te varua e te parau mau.” (Ioane 4:24) Teie ta Iesu i parau: “O te huru ïa o te feia haamori ta te Metua e titau nei.” (Ioane 4:23) Te tiaturihia ˈtu nei e o oe taua huru taata ra. Mai taua vahine samaria ra, eita e ore e e hinaaro oe e ora e a muri noa ˈtu. (Ioane 4:13-15) Tera râ, te ite nei oe i te taata i te ruauraa e te poheraa. E faataa mai te pene i mua nei e no te aha.
A HIˈOPOA NA I TO OE ITE
Mai tei faaitehia i roto i te Ioane 4:23, 24, eaha te haamoriraa ta te Atua e farii?
Nafea tatou e nehenehe ai e papu e te farii ra anei te Atua vetahi mau peu e mau oroa?
Eaha vetahi mau titauraa e fariihia mai ai te haamoriraa?
[Uiraa haapiiraa]
[Hohoˈa api taatoa i te api 44]
