Mea piri to matou nohoraa i te oire o Roma, ua paari au i roto i te hoê utuafare riirii. Mea fifi roa to matou oraraa, aita vau i ite aˈenei i to ˈu mama fanau e ere mâua to ˈu papa i te mea afaro roa. No reira vau i tia noa ˈi i roto i te mau aroa.

I te ahururaa o to ˈu matahiti, ua haamata aˈena vau i te eiâ. I te 12raa, ua faarue au i te fare. E rave rahi taime to papa haereraa mai e tii ia ˈu i te aua mutoi no te faahoˈi ia ˈu i te fare. Mea pinepine au i te peapea e o vetahi ê, mea ino e mea iria hoi au i nia i te mau taata atoa. I te 14raa o to ˈu matahiti, i reira vau i te faarue-roa-raa i te fare e haamata ˈtura i te rave i te raau taero e i te ora i roto i te aroa. Aita to ˈu e vahi taotoraa, e tomo ïa vau i roto i te hoê pereoo a faarue atu ai i te reira i te aahiata. I muri iho, e imi au i te hoê vahi e nehenehe au e hopu i te pape.

Ua riro mai au ei taata aravihi no te eiâ, mai te haruraa i te pute e tae noa ˈtu i te eiâraa i roto i te fare e te nohoraa o te feia taoˈa rahi i te po. Ua tui atura to ˈu roo no te raveraa i te ohipa ino, e anihia mai nei ia faaô i roto i te hoê pǔpǔ taata ohipa iino matau-maitai-hia. Mea na reira vau i te haamataraa i te eiâ i te mau fare moni. No to ˈu ino, ua riro mai au ei taata faaturahia i roto i teie pǔpǔ. E afai na vau i ta ˈu pupuhi i te mau vahi atoa, e noa ˈtu e taoto vau, tei raro aˈe te pupuhi i te turua. Te taparahiraa taata, te raau taero, te eiâraa, te parau ino e te ohipa taiata, tera ïa to ˈu oraraa! Mea pinepine te mau mutoi i te imi ia ˈu, e rave rahi taime to ˈu tapearaahia, hopea ore au i te haere i roto e i rapae i te fare auri!

I te hoê mahana i to ˈu matararaa mai i te fare auri, haere atura vau e farerei i to ˈu tati, aita râ vau i ite ua riro mai o ˈna, oia atoa e piti o ta ˈna mau tamarii ei Ite no Iehova. Titau manihini mai nei ratou ia ˈu ia apiti i te hoê o ta ratou putuputuraa. No to ˈu hinaaro e ite, apee atura vau ia ratou. I te taeraa ˈtu matou i te fare putuputuraa a te mau Ite no Iehova, ua hinaaro vau e parahi i te hoê vahi mea fatata i te opani, ia nehenehe au e hiˈopoa o vai te tomo mai e te haere i rapae. I tera taime, tei nia ia ˈu ta ˈu pupuhi!

Ua taui roa tera putuputuraa i to ˈu oraraa! Ua manaˈo roa vau tei nia vau i te tahi atu paraneta, ua farii-maitai-hia vau ma te mata ataata. Eita roa e moˈe ia ˈu tera taime, aita te mau Ite no Iehova i hiˈo ino ia ˈu! Mea taa ê roa ratou i te feia ta ˈu i matau!

Ua haamata vau i te haapii i te Bibilia e te mau Ite no Iehova. A haere noa ˈi ta ˈu haapiiraa i mua, ua taa ia ˈu mea titauhia ia taui i to ˈu oraraa taatoa. Ua pee au i te aˈoraa e vai ra i roto i te Maseli 13:20 e na ô ra: “O tei amui atoa to ˈna haerea i to te feia paari ra, e paari atoa ïa; o tei amui râ i te feia maamaa ra, e pohe ïa.” Ua taa ia ˈu mea titauhia ia faaea vau i te amuimui i te pǔpǔ ohipa iino. E ere i te mea ohie, ua tia râ maoti te tauturu a Iehova!

Ua tamâ atoa vau ia ˈu. E tutavaraa rahi ta ˈu i rave no te faaea i te puhipuhi i te avaava e i te rave i te raau taero. Ua tâpû atoa i to ˈu rouru roa, ua tatara i to ˈu mau tapea tariˈa e ua faaea atoa i te parau ino. A tahi ra vau e rave ai i te faaotiraa maitai i roto i to ˈu oraraa!

Aita vau i matau i te taio e i te haapii, e ere ïa i te mea ohie ia mau to ˈu feruriraa i nia i te mea ta ˈu e haapii ra i roto i te Bibilia. Ua tutava noa râ vau, haamatara ˈtura vau i te here ia Iehova, e hoê ohipa taa ê tei tupu i roto ia ˈu! Ua haamata to ˈu manaˈo haava i te hauti! Pinepine au i te faahapa ia ˈu iho ma te manaˈo eita paha Iehova e faaore i te mau hara ino atoa ta ˈu i rave. Ua tamahanahana rahi mai râ te huru o Iehova i nia i te arii Davida a rave ai oia i te hara ino mau.—Samuela 2, 11:1–12:13.

Ua taiâ atoa vau i te poro i tera e tera fare, aˈunei hoi au e farerei ai i te hoê taata ta ˈu i taparahi aore ra i haamauiui. Ua ore mǎrû noa râ tera mǎtaˈu to ˈu, e ite atura vau i te oaoa ia faataa ia vetahi ê i te maitai rahi o to tatou Metua i te raˈi o tei ineine noa i te faaore i ta tatou mau hara.

Auaa vau i haapii i te parau mau no nia ia Iehova, ahiri aita, tei roto vau i te fare auri, aore ra mai te rahiraa o to ˈu mau hoa tahito, ua pohe ïa! I teie mahana, e oraraa oaoa to ˈu e e tiaturiraa papu atoa to ˈu no a muri aˈe. Ua haapii au i te riro ei taata haehaa e te auraro, e i te haavî atoa i to ˈu huru ino. I teie nei, mea maitai au i nia i te taata e e faaipoiporaa oaoa to mâua Carmen. Te oaoa nei mâua i te tauturu ia vetahi ê ia haapii i te Bibilia.

Te tahi vahi maitai atoa i teie nei, e haerea afaro to ˈu! Te haere tamau noa ra vau i roto i te mau fare moni, i teie nei râ, e ere no te eiâ, no te tamâ râ.