PENE 25

Nafea vau e faaea ˈi i te peu mirimiriraa i te mero atiraa?

“I te vaˈuraa o to ˈu matahiti ua haamata vau i te peu mirimiriraa i te mero atiraa. I muri iho, ua haapii au eaha to te Atua manaˈo no nia i te reira. Ua peapea roa vau i te mau taime atoa a rave ai au i te reira. ‘Nafea te Atua e nehenehe ai e here i te hoê taata mai ia ˈu?’ Ta ˈu ïa i uiui ia ˈu iho.”​—Luiz.

IA taurearea oe e puai mai te hinaaro e taati. Ei faahopearaa e nehenehe te peu mirimiriraa i te mero atiraa e riro mai ei peu matau no oe. a E rave rahi te parau e ere i te mea ino. E parau ratou: “Eita tera e haafifi ia vetahi ê.” Tera râ te vai ra te tumu faufaa roa no te haapae i teie peu. Ua papai te aposetolo Paulo: “No reira, a haapohe i te mau mero o to outou tino . . . to roto hoi . . . te hinaaro faufau vî ore.” (Kolosa 3:5) Eita te peu mirimiriraa i te mero atiraa e haapohe i te hinaaro faufau vî ore, e haapuai râ te reira i taua hinaaro ra. Hau atu â, e ere tera noa:

● E faatupu te peu mirimiriraa i te mero atiraa i te hoê feruriraa miimii. Ei hiˈoraa, e haapao noa te taata e mirimiri ra ia ˈna i to ˈna iho mau hinaaro.

● E faatupu te peu mirimiriraa i te mero atiraa i te hoê hiˈoraa hape i nia i te tahi atu taata ma te faariro i taua taata ra mai te hoê ohipa no te haamâha i to ˈna hinaaro.

● E haafifi te peu mirimiriraa i te mero atiraa i te taatiraa i te pae tino i roto i te faaipoiporaa.

Maoti te peu mirimiriraa i te mero atiraa no te haamâha i te hinaaro e taati, a haavî ia oe. (Tesalonia 1, 4:4, 5) No te tauturu ia oe ia na reira, te faaue ra te Bibilia ia haapae te mau tupuraa e nehenehe e faatupu mai te hinaaro i te pae tino. (Maseli 5:8, 9) Nafea, mai te peu e riro oe ei tîtî no teie peu? Peneiaˈe, ua tamata oe i te faaea, aita râ oe i manuïa mai. Mea ohie ia faaoti e eita oe e taui e eita oe e nehenehe e ora ia au i te mau ture aveia a te Atua. Tera ta te hoê tamaroa o Pedro te iˈoa i manaˈo no ˈna iho. “Ia topa vau, e peapea roa vau,” ta ˈna ïa i parau. “Ua manaˈo vau eita ta ˈu hara e faaorehia ia rave au i te reira peu. E mea fifi roa no ˈu ia pure.”

Mai te peu tera ta oe manaˈo, a faaitoito. E ere ïa te auraa aita e ravea, e rave rahi feia apî e taata paari tei faatauma i taua fifi ra. E nehenehe atoa oe!

A faatauma i te manaˈo faahapahapa

Mai tei faahitihia, te feia tei topa i roto i teie peu e faahapahapa ratou ia ratou iho. Eita e ore, e nehenehe te “otoraa au i te hinaaro o te Atua” e tauturu ia oe ia faaea i te rave i teie peu. (Korinetia 2, 7:11) Mai te peu râ, e faahapahaparaa rahi e nehenehe te faahopearaa e taui. E nehenehe te reira e faatoaruaru ia oe a ore atu ai e hinaaro faahou e tutava.—Maseli 24:10.

A faatupu i te hoê manaˈo aifaito. E peu viivii te peu mirimiriraa i te mero atiraa. O te faariro ia oe ‘ei tîtî o te mau hinaaro e rave rau e te mea navenave’ o te faatupu i te hoê feruriraa tano ore. (Tito 3:3) Tera râ eita te peu mirimiriraa i te mero atiraa e ô i roto i te mau peu taotoraa tia ore. (Iuda 7) Mai te peu te fifi ra oe i teie peu, eiaha oe e faaoti ua rave oe i te hoê hara eita e nehenehe e faaorehia. Te ravea, o te haavîraa i teie hinaaro e eiaha roa oe e tuu!

Mea ohie ia toaruaru ia hema oe. Ia tupu anaˈe te reira, a haafaufaa i te mau parau o te Maseli 24:16: “E nehenehe hoi te taata parau-tia e topa e hitu taime, e e tia faahou mai oia, e turori râ te taata ino no te ati.” Te hemaraa i te tahi mau taime, eita te reira e faariro ia oe ei taata ino, eiaha ïa e tuu. A imi eaha te tumu e topa ˈi oe e a tamata i te faaea i te reira.

A rave i te taime no te feruriruri i nia i te here e te aroha hamani maitai o te Atua. Ua parau te papai salamo o Davida tei ite eaha te auraa o te paruparu: “Mai te hoê metua tane e faaite ra i te aroha hamani maitai i ta ˈna mau tamaiti, te faaite atoa ra Iehova i te aroha hamani maitai i te feia e mǎtaˈu ra ia ˈna. Ua ite maitai hoi oia i to tatou hamaniraa, te haamanaˈo ra hoi oia e e repo tatou.” (Salamo 103:13, 14) Oia mau, te haafaufaa ra Iehova i to tatou tiaraa taata hara e ua ineine oia i ‘te faaore i to tatou mau hara.’ (Salamo 86:5) I te tahi aˈe pae, te hinaaro ra oia ia tutava tatou ia maitai mai. No reira, eaha te mau taahiraa faufaa ta oe e nehenehe e rave no te haavî i teie peu?

A hiˈopoa i ta oe mau faaanaanataeraa. Te mataitai ra anei oe i te mau teata, te mau faanahoraa teata aore ra te mau reni natirara o te faaaraara i te hinaaro e taati? Ma te paari ua pure te taata papai salamo i te Atua: “A fariu ê i to ˈu mata i te mea faufaa ore.” b—Salamo 119:37.

A tiatonu i nia i te tahi mau ohipa. Te parau ra te hoê Kerisetiano o William te iˈoa: “Hou a taoto ai, a taio i te tahi mea niuhia i nia i te Bibilia. Te mea faufaa roa ia tamau noa i te haafaufaa i te manaˈo pae varua.”—Philipi 4:8.

A paraparau i te tahi atu taata no nia i tera fifi. E tapea paha te haama ia oe ia faaite i to oe fifi i te hoê taata. Tera râ e nehenehe te reira e tauturu ia oe ia faaea i teie peu! Ta te hoê Kerisetiano o David te iˈoa i ite: “Ua paraparau vau i to ˈu metua tane e aita vau i haamoˈe i ta ˈna i parau mai.” Ei mata oaoa ua parau mai oia: ‘Oaoa roa vau ia oe.’ Ua ite oia i te itoito i anihia ia ˈu no te paraparau ia ˈna no nia i te reira. Tera te faaitoitoraa ta ˈu i hinaaro o tei tauturu ia ˈu ia tamau i te rave i te mea maitai.

”I muri iho, ua faaite mai to ˈu metua tane i te tahi mau irava no te tauturu ia ˈu ia ite eita vau i te taata ino, e te tahi atu â mau irava no te haapapu e ua taa ia ˈu to ˈu haerea ino. Ua parau oia ia haavî ia ˈu te tahi maa taime iti e ua paraparau faahou mâua no nia i te reira. Ua paraparau mai oia ia ˈu eiaha e haaparuparu ia topa faahou vau ia faaoromai râ ma te ore e topa faahou i muri mai.” Ua faaoti David ma te parau: “Te tauturu rahi ia ˈu te iteraa ïa te vai ra te hoê taata tei ite i to ˈu fifi.” c

I ROTO I TE PENE I MURI NEI

Eita te taatiraa i te pae tino no te tahi noa taime i te ohipa hauti. A hiˈo no te aha.

[Nota i raro i te api]

IRAVA FAUFAA

“A horo ê i te mau hinaaro o te apîraa, a tapi râ i te parau-tia, te faaroo, te here, te hau e te feia atoa e tiaoro ra i te Fatu ma te aau mâ.”​—Timoteo 2, 2:22

MANAˈO TAUTURU

A pure na mua ˈˈe te hinaaro e puai mai ai. A ani i te Atua ra Iehova ia horoa mai i “te puai o te hau ê” no te faaoromai i mua i taua tamataraa ra.​—Korinetia 2, 4:7.

UA ITE ANEI OE . . . ?

O te taata paruparu te topa no to ratou hinaaro vî ore i te pae tino. Titauhia râ ia riro ei tane aore ra ei vahine paari i te pae feruriraa no te haavî i te reira noa ˈtu o ˈna anaˈe.

TA ˈU E RAVE!

Ta ˈu e nehenehe e rave no te tamau i te haafaufaa i te mau mea maitai mai te peu e ․․․․․

Ta ˈu e tia ia rave ia ore to ˈu mau hinaaro vî ore e hoˈi faahou mai ․․․․․

Eaha ta ˈu e hinaaro e ani i to ˈu nau metua no nia i te reira ․․․․․

EAHA TO OE MANAˈO?

● No te aha mea faufaa ia haamanaˈo ua ineine Iehova “i te faaore i te hara”?—Salamo 86:5.

● Mai te peu te parau atoa ra te Atua, tei poiete i te mau hinaaro pae tino, ia oe ia haavî ia oe iho, eaha to ˈna manaˈo no nia ia oe?

[Parau iti faaôhia]

I to ˈu manuïaraa i mua i tera fifi ua noaa mai ia ˈu i te hoê manaˈo haava mâ i mua ia Iehova, e aita vau e hinaaro e taui i te reira i te tahi noa ˈˈe mea!”​—Sarah

[Hohoˈa]

Ia topa oe i te hoê hororaa e ere te auraa e haamata api faahou oe i te reira, eita atoa te toparaa no te peu mirimiriraa i te mero atiraa e faaore i ta oe mau tutavaraa no te manuïa