Te faatiaraa a Mareko 7:1-37
7 Ruru maira te mau Pharisea e te tahi mau papai parau na Ierusalema mai ia Iesu ra.+
2 Ite aˈera ratou vetahi o ta ˈna mau pǐpǐ e tamaa ra ma te rima repo, oia hoi aita i horoihia.*
3 (Eita hoi te mau Pharisea e te ati Iuda atoa e tamaa aita anaˈe ratou i horoi i to ratou rima e tae roa ˈtu i te poro rima ia au i te peu a te mau tupuna,
4 e ia hoˈi mai ratou na te matete mai, eita ratou e tamaa aita anaˈe ratou i horoi ia ratou. E mea rahi atu â te peu tei tuuhia ia haapao ratou, mai te tutauraa i te mau auˈa, te mau pita e te mau pani veo i roto i te pape.)+
5 Ui maira ïa teie mau Pharisea e papai parau ia ˈna: “No te aha ta oe mau pǐpǐ e ore ai e haapao i te peu a te mau tupuna, a tamaa ˈi ratou ma te rima repo?”+
6 Pahono atura oia: “Haavarevare ma, ua tano Isaia i te tohuraa no nia ia outou, mai tei papaihia: ‘Te faatura nei te vaha o teie mau taata ia ˈu, to ratou râ aau, tei te atea ê ïa ia ˈu.+
7 Mea faufaa ore to ratou haamori-noa-raa mai ia ˈu, te haapii nei hoi ratou ia vetahi ê i te mau faaueraa a te taata.’+
8 Te haapae nei outou i te faaueraa a te Atua e te haapao nei i te peu a te taata.”+
9 Parau atura oia: “Mea ite roa outou i te haapae i te faaueraa a te Atua no te haapao i ta outou peu tumu.+
10 Ua parau hoi Mose: ‘A faatura i to metua tane e to metua vahine,’+ e: ‘O tei faaino* i to ˈna metua tane e metua vahine, ia haapohehia ïa.’+
11 Outou râ, te na ô nei ïa: ‘Ia parau te hoê taata i to ˈna metua tane e metua vahine: “E korebana (oia hoi e ô pûpûhia i te Atua) ta ˈu mau mea atoa o ta ˈu e nehenehe e faaohipa no te tauturu ia oe,”’
12 te faatia ra ïa outou ia ˈna eiaha e tauturu faahou i to ˈna metua tane aore ra metua vahine.+
13 Te haafaufaa ore ra ïa outou i te parau a te Atua na roto i ta outou peu tumu ta outou i tuu atu.+ Mea rahi te ohipa mai te reira te huru ta outou e rave ra.”+
14 Pii ihora oia i te nahoa ia tapiri mai ia ˈna e na ô atura: “A faaroo mai outou paatoa e ia taa ia outou te auraa o ta ˈu mau parau.+
15 E ere o ta te hoê taata e amu te haaviivii ia ˈna, o te mau mea râ no roto mai i te hoê taata te haaviivii ia ˈna.”+
16 *——
17 Vaiiho maira Iesu i te nahoa, tomo ihora i roto i te hoê fare e uiui maira ta ˈna mau pǐpǐ no nia i te faahohoˈaraa.+
18 Na ô atura oia: “Aita atoa outou e taa ra mai ia ratou? Aita outou i ite e e ere o ta te taata e amu te haaviivii ia ˈna,
19 e na roto atu hoi te reira, eiaha i to ˈna aau, i to ˈna râ opu a faaruehia ˈtu ai i te haumitiraa?” Te parau ra ïa Iesu e mea viivii ore te mau maa atoa.
20 Parau faahou atura oia: “O te mau mea no roto mai i te hoê taata te haaviivii ia ˈna,+
21 no roto mai hoi i te aau te mau manaˈo ino:+ te mau peu taotoraa tia ore,* te eiâ, te taparahi-pohe-raa,
22 te faaturi, te popore, te ohipa ino, te haavare, te peu faufau,* te mata nounou, te faaino, te teoteo e te maamaa.
23 No roto mai teie mau mea ino atoa i te aau o te hoê taata e o te haaviivii ia ˈna.”
24 Reva ˈtura Iesu e haere ihora i na tuhaa fenua o Turia e Sidona.+ Tomo ihora oia i roto i te hoê fare, aita hoi i hinaaro ia ite mai te taata ia ˈna, ua itehia râ oia.
25 Faaroo ihora te hoê vahine no nia ia Iesu, haere maira ia ˈna ra e tipapa ihora i to ˈna pae avae, ua uruhia hoi ta ˈna tamahine iti e te hoê varua viivii,+
26 e Heleni oia no* Phenikia i Suria. Taparu ihora taua vahine ra ia Iesu ia tiavaru i te demoni i rapae i ta ˈna tamahine.
27 Parau atura râ oia: “A vaiiho na i te mau tamarii ia paia na mua, e ere hoi mea maitai ia rave i te faraoa a te mau tamarii, a horoa ˈtu ai na te mau fanauˈa urî.”+
28 Pahono maira râ taua vahine ra: “Oia mau e te Fatu, e amu atoa râ te mau fanauˈa urî i raro aˈe i te amuraa maa i te huˈahuˈa faraoa a te mau tamarii.”
29 Parau atura Iesu: “A hoˈi i ǒ oe, no ta oe hoi i parau, ua faarue mai te demoni i ta oe tamahine.”+
30 Hoˈi atura taua vahine ra i to ˈna fare e ite ihora i te tamahine iti e tarava ra i nia i te roˈi, ua faarue mai te demoni.+
31 Faarue ihora Iesu i te tuhaa fenua o Turia e hoˈi atura i te miti o Galilea na Sidona ˈtu e na roto atu i te tuhaa fenua o Dekapoli.*+
32 Afai maira te tahi mau taata i te hoê tariˈa turi e mea fifi atoa no ˈna ia paraparau,+ e taparu maira ratou ia Iesu ia tuu i to ˈna rima i nia iho i taua taata ra.
33 Aratai ihora Iesu ia ˈna i te hiti ia atea ˈtu raua i te nahoa, tuu atura i to ˈna na manimani rima i roto i na tariˈa o taua taata ra. I muri iho i to ˈna tutuharaa, tapea ˈtura oia i to ˈna arero.+
34 E a hiˈo ai i nia i te raˈi, huti maitai ihora oia i te aho e na ô atura: “Ephata,” teie te auraa “Ia matara.”
35 Faaroo ihora to ˈna tariˈa,+ matara aˈera to ˈna arero e afaro atura ta ˈna paraparau.
36 Faaue ihora oia ia ratou eiaha e faaite i te taata.+ Tera râ, rahi atu â oia i te faaue ia ratou, rahi atu â ratou i te faaite haere.+
37 Maere roa ihora ratou+ e na ô aˈera: “E ohipa faahiahia anaˈe ta ˈna i rave, ia ˈna hoi e faaroo ai te tariˈa turi e e paraparau ai te vava.”+
Nota i raro i te api
^ Oia hoi ia au i te mau peu a te ati Iuda.
^ Aore ra “tuhi.”
^ Hiˈo i te tuhaa hau A3.
^ Aore ra “tei fanauhia i.”
^ Aore ra “o na oire hoê ahuru.”
