Iosua 22:1-34
22 Titau atura Iosua i te ati Reubena, te ati Gada e te afaraa o te opu o Manase
2 e parau atura ia ratou: “Ua rave outou i te mau mea atoa ta Mose te tavini a Iehova i faaue ia outou,+ e ua faaroo outou i to ˈu reo i te mau mea atoa ta ˈu i faaue ia outou.+
3 Aita outou i faarue i to outou mau taeae i tera mau mahana atoa tae roa mai i teie mahana.+ Ua haapao outou i te faaueraa a Iehova to outou Atua.+
4 I teie nei ua horoa Iehova to outou Atua i te faafaaearaa i to outou mau taeae, mai ta ˈna i fafau ia ratou.+ E nehenehe ïa outou e hoˈi i teie nei i ǒ outou i te fenua ta Mose te tavini a Iehova i horoa ei fenua no outou i te tahi atu pae* o Ioridana.+
5 Tera noa râ, a haapao maitai i te faaohipa i te faaueraa e te Ture ta Mose te tavini a Iehova i horoa ia outou,+ a here ai ia Iehova to outou Atua,+ a haere ai na to ˈna mau eˈa atoa,+ a haapao ai i ta ˈna mau faaueraa,+ a ati maite ai ia ˈna+ e a tavini ai ia ˈna+ ma to outou aau atoa e ma to outou ora* atoa.”+
6 Haamaitai atura Iosua ia ratou, tuu atura ia ratou ia haere, e hoˈi aˈera ratou i ǒ ratou.
7 E na te afaraa o te opu o Manase, ua horoa Mose i te tahi tuhaa i Basana,+ e no te tahi atu afaraa o te opu, ua horoa Iosua i te fenua i te pae tooa o te râ o Ioridana+ i rotopu i to ratou mau taeae. Hau atu â, i to Iosua tuuraa ia ratou ia hoˈi i ǒ ratou, haamaitai atura oia ia ratou
8 e parau atura: “A hoˈi i ǒ outou ma te faufaa e rave rahi, ma te animara e rave rahi, te ario e te auro, te veo e te auri e te ahu e rave rahi roa.+ A rave i te mau taoˈa haruhia+ i to outou mau enemi, e a tufa i te reira na outou e to outou mau taeae.”
9 I muri iho, reva ˈtura te ati Reubena, te ati Gada e te afaraa o te opu o Manase mai rotopu i te tahi atu ati Iseraela, mai Silo i te fenua o Kanaana, e hoˈi aˈera ratou i te fenua o Gileada,+ te fenua e fatuhia ra e ratou, i reira ratou i te faaearaa ia au i te faaueraa a Iehova na roto ia Mose.+
10 I to ratou taeraa i te mau tuhaa fenua o Kanaana i pihai iho ia Ioridana, hamani aˈera te ati Reubena, te ati Gada e te afaraa o te opu o Manase i te tahi fata i reira i pihai iho ia Ioridana, e fata rahi mau â.
11 I muri iho, faaroo aˈera te tahi atu ati Iseraela i te reira+ e na ô atura: “Inaha, ua hamani te ati Reubena, te ati Gada e te afaraa o te opu o Manase i te tahi fata i te otia fenua o Kanaana i te mau tuhaa fenua o Ioridana i te pae e fatuhia ra e te ati Iseraela.”
12 I to te ati Iseraela faarooraa i te reira, ruru maira te amuiraa taatoa o te ati Iseraela i Silo+ no te aro ia ratou.
13 Tono aˈera te ati Iseraela ia Phinehasa+ te tamaiti a Eleazara te tahuˈa i te ati Reubena, te ati Gada e te afaraa o te opu o Manase i te fenua o Gileada.
14 Hoê ahuru raatira tei na muri ia ˈna, hoê raatira o te opu fetii tataitahi o te mau opu atoa o Iseraela, e upoo ratou tataitahi no te utuafare o to ratou mau metua i rotopu i te mau tausani* o Iseraela.+
15 I to ratou taeraa i ǒ te ati Reubena, te ati Gada e te afaraa o te opu o Manase i te fenua o Gileada, parau atura ratou:
16 “Teie ta te amuiraa taatoa a Iehova i parau: ‘Eaha teie ohipa taiva+ ta outou i rave i te Atua o Iseraela? Ua fariu ê outou ia Iehova i teie mahana ma te hamani i te tahi fata na outou e ma te orure hau ia Iehova.+
17 Aita anei i navai te hara ta tatou i rave i Peora? Aita â tatou i tamâ ˈtura ia tatou i te reira tae roa mai i teie mahana, noa ˈtu ua roohia te amuiraa a Iehova+ i te ati.
18 E outou, e fariu ê outou ia Iehova i teie mahana a ore atu ai e pee ia ˈna! Ia orure hau outou ia Iehova i teie mahana, ananahi oia e riri ai i te amuiraa taatoa o Iseraela.+
19 E mai te peu no te viivii o te fenua e fatuhia ra e outou, a haere mai ïa i teie pae nei i te fenua e fatuhia ra e Iehova+ i reira e vai ai to Iehova sekene+ e a parahi i rotopu ia matou. Eiaha râ e orure hau ia Iehova, e eiaha e faariro ia matou ei orure hau a hamani ai i te tahi fata na outou hau atu i te fata a Iehova to tatou Atua.+
20 I to Akana+ te tamaiti a Zera raveraa i te tahi ohipa taiva no nia i tei faataahia no te haamouraa, aita anei te riri i tae mai i nia i te amuiraa taatoa o Iseraela?+ E e ere o ˈna anaˈe tei pohe no ta ˈna hara.’”+
21 Pahono maira te ati Reubena, te ati Gada e te afaraa o te opu o Manase i te mau upoo o te mau tausani* o Iseraela:+
22 “Te Atua o te mau atua e Iehova! Te Atua o te mau atua e Iehova!+ Ua ite oia, e e ite atoa o Iseraela. Ahani ua orure hau e ua taiva matou ia Iehova, eiaha e faaherehere ia matou i teie mahana.
23 Ahani ua hamani matou i te tahi fata na matou no te fariu ê ia Iehova a ore atu ai e pee ia ˈna e no te pûpû i te tusia taauahi, te tusia huero maa e te tusia no te hau i nia iho, e faautua mai Iehova.+
24 E ere, e tumu ê i na reira ˈi matou, ua na ô hoi matou: ‘A muri aˈe, e parau ta outou mau tamarii i ta matou mau tamarii: “No te aha hoi outou e haamori ai ia Iehova te Atua o Iseraela e o matou?”*
25 Ua tuu Iehova ia Ioridana ei otia i rotopu ia matou e ia outou, te ati Reubena e te ati Gada. Aita ta outou e tuhaa ia Iehova.” E e tapea ta outou mau tamarii i ta matou mau tamarii ia haamori* ia Iehova.’
26 “Na ô atura ïa matou: ‘E hamani anaˈe i te tahi fata na tatou, eiaha no te tusia taauahi aore ra te tahi atu tusia,
27 ei ite râ i rotopu ia outou e ia matou+ e to tatou huaai* i muri mai ia tatou e e haapao matou i ta matou taviniraa ia Iehova i mua ia ˈna na roto i ta matou mau tusia taauahi e te tahi atu mau tusia+ e ta matou mau tusia no te hau, ia ore ta outou mau tamarii ia parau i ta matou mau tamarii a muri aˈe: “Aita ta outou e tuhaa ia Iehova.”’
28 Na ô atura matou: ‘Ia na reira ratou i te parau ia matou e to matou huaai* a muri aˈe, e parau ïa matou: “A hiˈo i te hohoˈa fata a Iehova ta to matou mau tupuna i hamani, eiaha no te tusia taauahi aore ra te tahi atu tusia, ei ite râ i rotopu ia outou e ia matou.”’
29 Aita matou i manaˈo noa ˈˈe e orure hau ia Iehova e e fariu ê ia Iehova+ i teie mahana ma te hamani i te tahi fata no te tusia taauahi, te tusia huero maa e te tahi atu tusia, hau atu i te fata a Iehova to tatou Atua e vai ra i mua i to ˈna sekene!”+
30 I te faarooraa Phinehasa te tahuˈa, te mau raatira o te amuiraa e te mau upoo o te mau tausani* o Iseraela na muri ia ˈna i ta te huaai o Reubena, to Gada e to Manase i parau, mauruuru aˈera ratou.+
31 Parau atura ïa Phinehasa te tamaiti a Eleazara te tahuˈa i te huaai o Reubena, to Gada e to Manase: “I teie mahana ua ite matou tei rotopu Iehova ia tatou, no te mea aita outou i rave i teie ohipa taiva ia Iehova. I teie nei, ua faaora outou i te ati Iseraela i te rima o Iehova.”
32 Vaiiho aˈera Phinehasa te tamaiti a Eleazara te tahuˈa e te mau raatira i te ati Reubena e te ati Gada i te fenua o Gileada, hoˈi aˈera i Kanaana, e faatia ˈtura i te tahi atu ati Iseraela.
33 Mauruuru aˈera te ati Iseraela i te faatiaraa. Arue aˈera te ati Iseraela i te Atua, e aita ˈtura ratou i opua faahou e aro i te ati Reubena e te ati Gada e e haamou i te fenua ta ratou e parahi ra.
34 Topa aˈera ïa te ati Reubena e te ati Gada i te tahi iˈoa no te fata,* no te mea “e ite te reira i rotopu ia tatou e o Iehova te Atua mau.”
Nota i raro i te api
^ Oia hoi te pae hitia o te râ.
^ Aore ra “opu.”
^ Aore ra “opu.”
^ Heb: “Eaha ta outou ia Iehova te Atua o Iseraela.”
^ Heb: “mǎtaˈu.”
^ Heb: “to tatou mau uˈi.”
^ Heb: “to matou mau uˈi.”
^ Aore ra “opu.”
^ Mai tei faataahia, e au ra e ua topahia te fata i te iˈoa Ite.
