Exodo 23:1-33
23 “Eiaha roa oe e haaparare* i te hoê parau e ere i te mea mau.+ Eiaha e apiti i te taata ino ma te riro ei ite opuaraa ino.+
2 Eiaha roa oe e pee i te nahoa no te rave i te ino, e eiaha roa oe e faahuru ê i te parau-tia ma te haapapu i te tahi parau no te pee i te nahoa.
3 Eiaha roa oe e maitiiti i te taata ia faaôhia te hoê taata veve i roto i te tahi mârôraa.+
4 “Ia ite noa ˈtu oe i te puaatoro oni a to oe enemi aore ra ta ˈna asini e overe ra, e faahoˈi oe i te reira ia ˈna.+
5 Ia ite atu oe i te asini a te tahi taata mea hae na ˈna ia oe ua piˈo roa no te teiaha o ta ˈna hopoia, eiaha oe e mata ê a haere atu ai. E tauturu oe ia ˈna ia haamâmâ i te animara.+
6 “Eiaha oe e faahuru ê i te haavaraa o te taata veve i rotopu ia oe ia haavahia oia.+
7 “Eiaha oe e apiti i te hoê pariraa* haavare, e eiaha oe e haapohe i te taata hara ore e te taata parau-tia, eita hoi au e faariro i te taata ino ei taata parau-tia.*+
8 “Eiaha e farii ia petahia oe, e matapo roa hoi te taata haroˈaroˈa i te peta, e e nehenehe te reira e faahuru ê i te parau a te taata parau-tia.+
9 “Eiaha oe e faahepo i te taata ê e noho ra i rotopu ia outou. Ua ite outou eaha te huru ia parahi i te tahi vahi ei* taata ê, no te mea i parahi na outou ei taata ěê i te fenua o Aiphiti.+
10 “E ueue oe i te huero maa i nia i to oe fenua e e ooti mai oe i ta ˈna mau hotu e ono matahiti.+
11 Tera râ i te hitu o te matahiti, e vaiiho oe i te fenua mai tera ma te ore e faaapu, e na te feia veve i rotopu i to oe nunaa e amu i te reira, e ta ratou e vaiiho mai, na te animara oviri e amu. E na reira oe i ta oe faaapu vine e faaapu olive.
12 “E ono mahana e rave ai oe i ta oe ohipa. I te hitu râ o te mahana, e faaea oe i ta oe ohipa, ia faafaaea hoi ta oe puaatoro oni e ta oe asini e te tamaiti a ta oe tavini vahine e ia tamǎrû te taata ěê e noho ra i rotopu ia outou ia ratou.+
13 “A haapao maitai ia rave outou pauroa ta ˈu i parau ia outou,+ e eiaha outou e faahiti i te iˈoa o te tahi atu mau atua, eiaha ia faaroohia te reira i roto i to outou vaha.+
14 “E toru taime i te matahiti e faatupu ai oe i te oroa no ˈu.+
15 E haapao oe i te Oroa pane hopue ore.+ E amu oe i te pane hopue ore e hitu mahana, mai ta ˈu i faaue ia oe, i te taime faataahia i te avaˈe no Abiba,*+ i tera hoi taime i haere mai ai oe i rapae i Aiphiti. Eiaha hoê ia tia i mua ia ˈu aita e faufaa i roto i te rima.+
16 Oia atoa, e haapao oe i te Oroa ootiraa* i te mau hotu paari matamua o ta oe faaapu, i ta oe i ueue i nia i te fenua,+ e te Oroa haapueraa* i te hopea o te matahiti, e haapue oe i te hotu no roto i te faaapu, te hopearaa ïa o ta oe mau ohipa.+
17 E toru taime i te matahiti te mau tane atoa i rotopu ia outou e tia ˈi i mua i te Fatu mau, o Iehova.+
18 “Eiaha roa oe e pûpû i te toto o ta ˈu tusia e tei hopue atoa. Eiaha te mau tusia mii tei pûpûhia i ta ˈu mau oroa e toe i te po e poipoi noa ˈtu.
19 “E hopoi oe i te mau hotu paari matamua maitai roa ˈˈe o to oe fenua i te fare o Iehova to oe Atua.+
“Eiaha oe e tunu i te tahi fanauˈa puaaniho i roto i te û o te maiaa.+
20 “Te tono nei au i te hoê melahi na mua ia outou+ no te tiai ia outou i to outou tere e no te hopoi ia outou i te vahi ta ˈu i faaineine.+
21 A haapao maitai ia ˈna, e a auraro i to ˈna reo. Eiaha e orure hau ia ˈna, eita hoi oia e faaore i ta outou mau hapa,+ no te mea to roto ia ˈna to ˈu nei iˈoa.
22 Tera râ, ia auraro maite oe i to ˈna reo e ia rave pauroa ta ˈna e parau ra, e riro vau ei enemi no to oe mau enemi e e patoi au i te feia e patoi ra ia oe.
23 E haere hoi ta ˈu melahi na mua ia outou, e aratai oia ia outou i te ati Amori, te ati Heta, te ati Perizi, te ati Kanaana, te ati Hevi e te ati Iebusi, e e haamou vau ia ratou.+
24 Eiaha oe e piˈo i raro i mua i to ratou mau atua aore ra e umehia e tavini ia ratou, e eiaha oe e pee i ta ratou mau peu.+ Tera râ, e haamou oe ia ratou e e vavahi oe i ta ratou mau pou haamoriraa.+
25 E tavini outou ia Iehova to outou Atua,+ e e haamaitai oia i ta outou maa e ta outou pape.+ E faaore au i te maˈi i rotopu ia outou.+
26 Eita e itehia i to oe fenua te vahine ua marua te tamarii aore ra te vahine fanau ore,+ e e rave au ia ora maoro outou.
27 “E tuu vau i te mǎtaˈu ia ˈu na mua ia outou,+ e faarapu vau i te mau nunaa atoa ta outou e farerei, e e rave au ia horo ê to outou mau enemi tei pau* ia outou.+
28 E tuu vau i te manaˈo haaparuparu* na mua ia outou,+ e e tiahi au i te ati Hevi, te ati Kanaana e te ati Heta mai mua ia outou.+
29 Eita vau e tiahi ia ratou mai mua ia outou i roto hoê noa matahiti, ia ore te fenua ia vai ano a aere atu ai te animara taehae.+
30 E tiahi riirii au ia ratou mai mua ia outou, e ia rahi atu ta outou mau tamarii a fatu atu ai outou i te fenua.+
31 “E haamau vau i to oe otia mai te miti Uteute e tae roa i te miti o te mau Philiseti e mai te medebara e tae roa i te Anavai.*+ E tuu hoi au i te feia e parahi ra i tera fenua i roto i to oe rima, e e tiahi oe ia ratou mai mua ia oe.+
32 Eiaha oe e faaau i te hoê faufaa ia ratou aore ra i to ratou mau atua.+
33 Eiaha ratou e parahi i to oe fenua, ia ore ratou e turai ia oe ia hara ia ˈu. Ia tavini noa ˈtu oe i to ratou mau atua, e riro mau â te reira ei marei no oe.”+
Nota i raro i te api
^ Heb: “hopoi haere.”
^ Heb: “parau.”
^ Aore ra “e faaore i te hara a te taata ino.”
^ Aore ra “te oraraa o te hoê.”
^ Hiˈo i te tuhaa hau B15.
^ Parau-atoa-hia te Oroa patiaraa tiahapa.
^ Parau-atoa-hia te Oroa hebedoma aore ra Penetekose.
^ Aore ra “ia huri tua to outou mau enemi.”
^ Huri-atoa-hia “mehameha,” “riaria.”
^ Oia hoi Eupharate.
