Exodo 21:1-36
21 “Teie te mau faaotiraa haavaraa ta oe e faatae ia ratou:+
2 “Ia hoo mai oe i te hoê tavini Hebera,+ e tavini oia e ono matahiti, i te hitu râ o te matahiti, e faatiamâhia oia ma te tamoni ore.+
3 Mai te peu e o ˈna anaˈe i te haereraa mai, ia haere atu ïa oia o ˈna anaˈe. Mai te peu e vahine faaipoipo ta ˈna, ia haere atu ïa ta ˈna vahine faaipoipo na muri ia ˈna.
4 Ia horoa to ˈna fatu i te hoê vahine faaipoipo na ˈna a fanau mai ai oia i te tamaiti aore ra te tamahine, e riro te vahine faaipoipo e ta ˈna mau tamarii na to ˈna fatu, e o ˈna anaˈe te haere atu.+
5 Ia mârô râ te tavini a na ô ai: ‘Mea here na ˈu to ˈu fatu, ta ˈu vahine faaipoipo e ta ˈu mau tamarii. Aita vau e hinaaro ra ia faatiamâhia vau,’+
6 e hopoi ïa to ˈna fatu ia ˈna i mua i te Atua mau. E aratai oia ia ˈna i te opani aore ra i te pou opani, e e patia to ˈna fatu i to ˈna tariˈa i te hoê pine e ia puta, e e riro oia ei tavini na ˈna e pohe noa ˈtu oia.
7 “Ia hoo atu te hoê taata i ta ˈna tamahine ei tavini, eita oia e tiamâ i te hoê â huru e te hoê tavini tane.
8 Ia ore to ˈna fatu e au ia ˈna, e ia ore e faariro ia ˈna ei vahine faaipoipo na ˈna, ua tuu atu râ ia ˈna ia hoohia mai e te tahi atu, aita to ˈna e mana e hoo ia ˈna i te hoê taata ê, ua taiva hoi oia ia ˈna.
9 Ia faaoti oia e horoa ia ˈna na ta ˈna tamaiti, e faafanaˈo ïa oia ia ˈna i te tiaraa e au i te tamahine.
10 Ia rave mai oia na ˈna i te tahi atu vahine faaipoipo, eiaha ia faaitihia te maa a te vahine faaipoipo matamua e to ˈna ahu, e ia taoto+ noa oia ia ˈna.
11 Ia ore oia e faafanaˈo ia ˈna i taua na mea e toru ra, e nehenehe oia e tiamâ ma te tamoni ore.
12 “Te taata e tairi i te tahi atu a pohe atu ai, ia haapohehia oia.+
13 Ia na reira râ oia ma te opua ore e ua vaiiho te Atua mau i te reira ia tupu, e faaite au ia oe i te hoê vahi e horo ê ai oia.+
14 Ia riri roa te hoê taata i to ˈna taata tupu a haapohe atu ai ia ˈna ma te opua,+ ia pohe ïa taua taata ra noa ˈtu e no pihai iho i ta ˈu fata e rave mai ai oe ia ˈna.+
15 Te taata e tairi i to ˈna metua tane aore ra to ˈna metua vahine, ia haapohehia oia.+
16 “Ia haru te tahi i te hoê taata+ a hoo atu ai ia ˈna, aore ra ua itehia ˈtu oia tei ia ˈna ra,+ ia haapohehia oia.+
17 “Te taata o te faaino* i to ˈna metua tane aore ra to ˈna metua vahine, ia haapohehia oia.+
18 “Teie te tupu ia mârô e piti taata, e ia tupai hoê i to ˈna taata tupu i te hoê ofai aore ra i te poro rima,* e aita oia i pohe, e tarava noa râ oia i nia i to ˈna roˈi:
19 Ia nehenehe ta ˈna e tia i nia a hahaere atu ai na rapae ma te turutootoo, eiaha te taata tei tupai ia ˈna ia faautuahia. Ia horoa oia i te tahi faahoˈiraa no te roaraa noa i ore ai te taata pepe i rave i te ohipa e maitai noa mai ai oia.
20 “Ia tairi te hoê taata i ta ˈna tavini tane aore ra ta ˈna tavini vahine a pohe atu ai oia i to ˈna rima, ia tahoohia oia.+
21 Tera râ, ia ora ˈtu oia hoê aore ra e piti mahana, eiaha oia e tahoohia, no te mea ua hoohia mai oia i te moni a to ˈna fatu.
22 “Ia taputô te tahi mau taata a pepe atu ai te hoê vahine hapû, e fanau maira oia aita â i tia ˈtura te avaˈe,*+ aita râ e ati pohe,* ia aufau te taata hara i te faahoˈiraa tei titauhia mai ia ˈna e te tane faaipoipo a te vahine, e ia aufau oia i te reira mai ta te mau haava i faaoti.+
23 Ia tupu râ te hoê ati pohe, e ora ta oe e horoa no te ora e tia ˈi,+
24 e mata ei mata ïa, e niho ei niho, e rima ei rima, e avae ei avae,+
25 e paapaa ei paapaa, e pepe ei pepe, e moto ei moto.
26 “Ia tairi te tahi i te mata o ta ˈna tavini tane aore ra te mata o ta ˈna tavini vahine a po atu ai to ˈna mata, ia faatiamâ oia i ta ˈna tavini ei faahoˈiraa no to ˈna mata.+
27 Ia marua ia ˈna te niho o ta ˈna tavini tane aore ra to ta ˈna tavini vahine, ia faatiamâ oia i ta ˈna tavini ei faahoˈiraa no to ˈna niho.
28 “Ia tui te tahi puaatoro i te hoê tane aore ra te hoê vahine a pohe atu ai oia, ia pehihia te puaatoro i te ofai+ e eiaha to ˈna iˈo ia amuhia. Eita râ te fatu o te puaatoro e faautuahia.
29 Ia matau râ te tahi puaatoro i te tui, e ua faaarahia to ˈna fatu e aita râ oia i tapea ia ˈna a pohe atu ai te hoê tane aore ra te hoê vahine i taua puaatoro ra, ia pehihia te puaatoro i te ofai e ia haapohe-atoa-hia to ˈna fatu.
30 Ia titauhia mai te tahi hoo ia ˈna, e aufau oia i tei tuuhia mai ia ˈna ei hoo i to ˈna ora.
31 Hoê tamaiti anei aore ra hoê tamahine tei tuihia, e ravehia i nia i te fatu o te puaatoro ia au i tera faaotiraa haavaraa.
32 Ia tui te puaatoro i te tahi tavini tane aore ra te tahi tavini vahine, e horoa oia i te tino moni e 30 sekela* i te fatu o te tavini, e e pehihia te puaatoro i te ofai.
33 “Ia vaiiho te tahi taata i te hoê apoo mai tera noa aore ra ia ô oia i te hoê apoo e ia ore e tapoˈi i te reira a topa ˈtu ai te hoê puaatoro aore ra te hoê asini i roto,
34 e horoa te taata na ˈna te apoo i te tahi faahoˈiraa.+ E horoa oia i te tino moni i te fatu, e e riro ia ˈna te animara pohe.
35 Ia faaû ta te tahi taata puaatoro i ta te tahi atu puaatoro, e hoo raua i te puaatoro ora e e tufa i te moni te noaa mai. E tufa atoa raua i te animara pohe.
36 Aore ra ua matauhia e tui na te hoê puaatoro aita râ to ˈna fatu i taamu ia ˈna, e faahoˈi oia i te hoê puaatoro no te puaatoro, e e riro tei pohe ia ˈna.
Nota i raro i te api
^ Aore ra “faatae i te ino i nia.”
^ Huri-atoa-hia “hoê mauhaa.”
^ Heb: “e haere maira ta ˈna mau tamarii i rapae.”
^ Aore ra “i pepe roa.”
^ 1 sekela: 11,4 g. Hiˈo i te tuhaa hau B14.
