I te 14 no Tenuare 2024, hoê ahuru matahiti i teie nei te haamauraahia te ohipa tivira ei monoraa i tau faehau i Aramenia. Maoti teie ravea, ua nehenehe te feia o te faaite i te tiaraa amui ore e tauturu i te huiraatira na roto e rave rau ohipa i te raveraa i te tau faehau, mai te ohipa paturaa, te faaneheneheraa i te mau aua, te tautururaa ia vetahi ê aore ra te raveraa i te tahi mau ohipa tivira. Mai te haamauraahia te reira, ua hau atu i te 450 feia apî Ite no Iehova, e tane anaˈe ratou, tei rave i te faaotiraa e apiti i teie faanahoraa.

I roto i te ohipa tivira ei monoraa i te tau faehau, te rave ra taeae Samuel Petrosyan i te ohipa ei taata faanehenehe aua. Te na ô ra o ˈna: “Ua tutava vau i te faaite i te hoê roo maitai. Ei hiˈoraa, ua rave maitai au i ta ˈu ohipa e e faaite atoa vau i te hoê haerea tano. E no reira, ua hamani maitai noa mai ta ˈu mau raatira e ua faatura atoa mai ia ˈu.”

I roto i te ohipa tivira ei monoraa i te tau faehau, ua ohipa taeae Artur Martirosyan e toru matahiti i te fare maˈi. Te na ô ra o ˈna: “Mea au roa na ˈu e tauturu i te taata o te hinaaro i te reira. Ua tauturu mai te reira ia ˈu ia riro mai ei taata feruriraa paari. Ua haapii atoa mai te reira ia ˈu, ia faaite i te huru au noa, ia faaoromai tamau e ia paraparau ia vetahi ê.”

Hou te matahiti 2014, e rave rahi taeae apî no Aramenia tei tapeahia i te fare auri no to ratou tiaraa amui ore no te mea ua patoi ratou e rave i te tau faehau. No te manuïaraa o te ohipa tivira ei monoraa i te tau faehau, ua na ô te hoê taata mana: “I te haamataraa, ua patoi au i te ohipa tivira ei monoraa i te tau faehau no te parururaa o te nunaa e faaohiparaa tano ore. . . . Tera râ, i te roaraa o te tau ua hape au. Tau matahiti i muri iho, ua papu ia ˈu . . . eita te mau Ite no Iehova e haafifi i te parururaa i te nunaa a rave ai ratou i te ohipa tivira ei monoraa i te tau faehau. Maoti râ teie [faanahoraa], e taata itoito ratou i roto e rave rahi tuhaa ohipa.”

Te na ô atoa ra te hoê mero o te Tomite repupirita no nia i te ohipa tivira ei monoraa i te tau faehau: “Hoê ahuru matahiti i teie nei te haamauraahia te ohipa tivira ei monoraa i te tau faehau i Aramenia . . . ua taa ia matou e faaotiraa maitai te ohipa tivira ei monoraa i te tau faehau i to matou fenua. Ia haere anaˈe matou e hiˈopoa i te vahi i reira e ravehia ˈi te ohipa tivira e ite matou i te feia itoito e te oaoa. Pauroa te matahiti, te haponohia mai ra te rata no nia i te mau ohipa maitai ta te mau Ite no Iehova e rave ra no te huiraatira maoti te ohipa tivira. No te feia faatere e rave ohipa maitai roa ratou.”

Ua oaoa te mau Ite no Iehova no Aramenia i te tauturu i te huiraatira maoti te ohipa tivira e i te faahanahana ia Iehova na roto i ta ratou “ohipa maitai.”—Petero 1, 2:12.