Eita. E poro iho â matou na te mau fare. Aita râ matou e manaˈo nei e maoti te reira e faaorahia ˈi matou. (Ephesia 2:8) No te aha?

 A feruri na e e parau te hoê taata maitai e e horoa oia i te tahi ô moni rahi na te feia atoa e haere i te tahi vahi i te mahana ta ˈna i faataa. Mai te peu e mea tiaturi na oe ia ˈna, e faaroo oe i ta ˈna parau. E faaite atoa paha oe i te reira i to oe mau hoa e fetii ia fanaˈo atoa ratou i taua ô ra. E ere râ no te haereraa i tera vahi i te mahana faataahia e fanaˈo ai oe i te reira, no te mea râ ua horoahia mai te reira.

 Te tiaturi nei te mau Ite no Iehova i ta te Atua parau fafau. Oia hoi e ora te feia atoa e faaroo ia ˈna e a muri noa ˈtu. (Roma 6:23) Te faaitoito nei matou i te faaite i to matou faaroo ia vetahi ê ia fanaˈo atoa ratou i ta te Atua i fafau. Aita râ matou e manaˈo nei e maoti ta matou pororaa e faaorahia ˈi matou. (Roma 1:17; 3:28) Noa ˈtu eaha ta te taata e rave, e ore roa ïa e navai no te fanaˈo i te haamaitairaa faahiahia mau a te Atua. Te na ô ra te Tito 3:5: “Ua faaora oia ia tatou, eiaha no te parau-tia i ravehia e tatou nei, no to ˈna ra râ aroha.”