Te opere ra te mau Ite no Iehova i te Bibilia Huriraa o te ao apî o te mau Papai moˈa i te taata atoa e hinaaro ra e taio i te reira.

E miria Bibilia e e rave rahi huriraa tei neneihia na te mau totaiete Bibilia rau. Tera râ, mea rahi te taata te ore e fanaˈo ra i te Bibilia na roto i to ratou reo no te veve e no te mau manaˈo oti noa i te pae faaroo. No reira te mau Ite no Iehova i pia ˈi i te Huriraa o te ao apî na roto hau atu 115 reo.

Teie te tahi mau hiˈoraa:

• Rwanda: Te faataa ra o Silvestre raua Venantie, e maha tamarii ta raua: “Mea veve roa matou. Eita ta matou e nehenehe e hoo mai i te Bibilia na te melo taitahi o to maua utuafare. I teie nei râ, e Huriraa o te ao apî ta matou taitahi na roto i te reo Kinyarwanda e e taio amui matou i te reira i te mau mahana atoa.”

  I taua fenua ra, ua na ô te hoê tia no te Ekalesia Beretane: “E Bibilia teie ta ˈu e taa ra. Mea maitai aˈe teie huriraa i te tahi atu mau Bibilia ta ˈu i taio. Te anaanatae mau ra iho â te mau Ite no Iehova i te taata!”

• République démocratique du Congo: Aita te tahi mau haapaoraa i farii i te hoo atu i te Bibilia na te mau Ite no Iehova na roto i te reo Lingala, hoê o te mau reo paraparau-roa ˈˈe-hia i taua vahi ra.

  E ere ïa i te mea maere e, mai te matararaa mai te Huriraa o te ao apî o te mau Papai moˈa na roto i te reo Lingala, ua faaohipa e ua opere atu â te mau Ite no Iehova no Congo i te reira! A faaitehia ˈi e ua mataraa mai te Huriraa o te ao apî o te mau Papai moˈa na roto i te reo Lingala i te hoê tairururaa rahi a te mau Ite no Iehova o tei tupu i te hoê tahua tuaro, ua oaoa roa te taatoaraa. Ua haere atoa te mau mutoi i reira e tii i ta ratou iho Bibilia.

• Fiti: I na mua aˈe, mea moni roa te Bibilia na roto i te reo Fiti. Ua faaohipa ïa te Ite no Iehova e rave rahi i te Huriraa o te ao apî na roto i te reo Beretane. I 2009 râ, ua fanaˈo te taata no Fiti i te Huriraa o te ao apî o te mau Papai Heleni Kerisetiano (Faufaa apî) na roto i to ratou reo.

  Mea maramarama mau te Huriraa o te ao apî na roto i te reo Fiti. Tera te maereraa rahi o te hoê taata o tei ani i te hoê Bibilia na ˈna. Teie râ, ua faataa ˈtu te mau Ite no Iehova no ǒ e e mea tia ia tiai hoê avaˈe ia tae faahou mai te mau Bibilia i roto i to ˈna oire. Aita o ˈna i hinaaro e tiai. Ua farii ïa o ˈna i te farerei i te hoê Ite no Iehova e 35 kilometera i te atea o te nehenehe e horoa i te hoê Huriraa o te ao apî na ˈna. Ua na ô teie taata: “Mea maitai aˈe teie huriraa i ta matou e faaohipa nei. Mea papu e mea ohie ia taa.”

• Malawi: A haamata ˈi Davide i te haapii i te Bibilia e te mau Ite no Iehova, ua haere atu te tahi mau melo o te faaroo Bapetizo i roto i to ˈna fare e ua haru mai i te Bibilia ta ratou i horoa ˈtu na ˈna. Tera râ, ua tupu roa ta Davide i moemoeâ noa na a mataraa mai ai te Huriraa o te ao apî na roto i te reo Chichewa.

  I te mea e mea moni roa te Bibilia i Malawi, i uiui na Davide e nafea e noaa ˈi ia ˈna te tahi atu Bibilia. A fanaˈo ai oia i te Huriraa o te ao apî, ua parau oia: “Mea maitai aˈe teie Bibilia i ta ˈu Bibilia tahito!”

Ua matara mai te tuhaa matamua o te Huriraa o te ao apî na roto i te reo Beretane a hau atu e 60 matahiti i teie nei. I tera tairururaa rahi i te oire no New York, teie tei faaitoitohia i te feia i tae mai: “A taio pauroa. A haapii i te reira . . . A tuu i te reira i roto i te rima o vetahi ê.” Ia naea tera fa, ua nenei te mau Ite no Iehova hau atu 175 mirioni Huriraa o te ao apî. Hau roa ˈtu â, e nehenehe outou e taio i te Bibilia i nia i teie reni na roto hau atu i te 50 reo.