No te rahi o te mau aniraa Bibilia paa etaeta e Bibilia anaana, ua tamaumau te mau Ite no Iehova i te mau matini tahoêraa buka apî i ta ratou fare neneiraa i Ebina, Tapone.

Ua haapeapea rii ratou i te omuaraa. I faahepohia na hoi ia tâpû i te uira i te tahi taime no te aueueraa fenua e te miti faaî tei tairi ia Tapone i te 11 no Mati 2011.

Ua haamata râ teie ohipa i Tetepa 2011. Aita i toru avaˈe, ua matara mai te mau Bibilia matamua o te Huriraa o te ao apî na roto i te reo Tinito i nia i teie mau matini apî.

Na te matini, te naea 400 metera i te roa, e rave pauroa. A tere noa ˈi te mau api i neneihia, e tahoêhia ratou, e taumihia e e haaputuhia i roto i te mau afata o te tapirihia.

I titauhia na ia faanaho maitai i te ohipa e ia haa amui ia manuïa te reira. Ei hiˈoraa, e mea tia ia tuu i teie mau matini i roto i te mau afata. Ua tuuhia te reira i muri iho i nia i te pahi i Europa, i roto e 34 afata vairaa taihaa rarahi, no te hapono atu i Tapone.

Ua reva ahuru melo o te piha ohipa a te mau Ite no Iehova no Marite i Tapone no te tauturu atu. Ua faaea vetahi i ǒ e ono avaˈe no te faaite i te mau rave ohipa no ǒ e nafea ia faaohipa e ia tataî i te mau matini.

Ua faarooroo te feia aravihi Tapone i te pae o te tahoêraa buka, te neneiraa e te piaraa e ua tae mai teie mau matini apî. I te 19 no Mati 2012, ua hau atu i te hoê hanere o ratou tei haere atu e mataitai i te fare neneiraa. Ua maere roa ratou.

Hou ratou a hoˈi ai, ua fanaˈo ratou taitahi hoê Huriraa o te ao apî piahia e te matini apî.

Na ta matou ïa mau amaa i Marite, Beresilia e Tapone e pia nei i te mau Bibilia vehî etaeta no te mau Ite no Iehova.

Ua oaoa te mau Ite no Iehova e te feia o te tahi atu mau taiete i te ohipa amui. Ua parau te hoê taata e ere i te Ite no Iehova: “E au outou i to ˈu utuafare.”

I te mahana hopea o tera ohipa, ua parau te tahi atu taata e ere i te Ite no Iehova: “Mea fifi mau to muri mai ohipa no te mea e ere ratou mai te feia a te Watchtower!”