I Atete 2013, ua ite te mau Ite no Iehova i Philipino i te hoê tupuraa faufaa: Ua oti te porotarama paturaa otahi a patuhia ˈi te 1 000raa o te Piha o te Basileia i ǒ. Mai i te fenua e rave rahi, e pinepine eita te mau amuiraa i Philipino e nehenehe e patu i ta ratou iho Piha a te Basileia o ratou anaˈe. Te fifi? Aita i navai te moni aore ra te taata aravihi. E rave rahi matahiti, ua putuputu vetahi i te fare o te tahi utuafare e vetahi ê i roto i te mau fare nainai hamanihia e te ofe.

Mai i te fenua e rave rahi, te rahi noa ˈtura te Ite no Iehova i Philipino. Te rahi noa ˈtura ïa te hinaaro i te Piha a te Basileia. No reira, i 1999, ua haamau te Tino aratai a te mau Ite no Iehova i te hoê porotarama no te patu i te mau Piha a te Basileia i te mau fenua navai ore. I raro aˈe i tera faanahoraa, e horoa te mau Ite no Iehova no tera mau fenua i tei maraa ia ratou a amuihia ˈtu ai te moni ta te tahi atu mau fenua i horoa. E faanahohia te mau taata aravihi i te pae o te paturaa ei pǔpǔ no te tauturu i te mau amuiraa ia patu i ta ratou iho Piha a te Basileia. I Novema 2001, ua haamata teie porotarama paturaa i Philipino.

E Ite no Iehova Iluminado i Marilao, i Bulacan, i reira te paturaahia te 1 000raa o te Piha a te Basileia. Ua parau o ˈna: “Tei roto mau vau i te hoê fetii taeae Kerisetiano. Mea rahi mau tei haere mai e tauturu, te tane e te vahine, tei apî e tei paari. Ua ohipa amui matou i raro aˈe i te mahana puai. Noa ˈtu e ua rohirohi matou i muri aˈe i te ohiparaa i te roaraa o te mahana, mea oaoa mau ia ite eaha ta matou i rave amui.”

Ua maere atoa te feia e ere i te Ite no Iehova a ite ai i te ohipa a te mau rima tauturu. Ua parau te hoê taata na ˈna te pereoo pani tei afai atu i te one e te iriiri i te vahi paturaa: “Mea rahi mau outou, e au iho â outou i te ro! O te taatoaraa te tauturu ra. Aita vau i ite aˈenei i te reira.”

Mai te tiaraa mai iho â te paturaa, aita i naea e ono hebedoma ia faaoti te mau rima tauturu i te Piha a te Basileia. Mea vitiviti! Ma te na reira, ua tia i te amuiraa ia apiti noa ma te itoito rahi i te ohipa faufaa: Te pororaa i te parau apî oaoa o te Basileia o te Atua.—Mataio 24:14.

Te na ô ra Ellen, te tahi atu Ite no Iehova no ǒ: “I na mua ˈˈe, aita matou pauroa i ô i roto i ta matou Piha a te Basileia e mea rahi o matou tei parahi noa i rapae. Mea nehenehe te Piha a te Basileia apî e mea au mau. E faufaahia ˈtu â ïa matou paatoa i te haapiiraa e te mau faaitoitoraa e horoahia ra i ta matou mau putuputuraa.”