Te haa rahi nei te mau Ite no Iehova i Bulgarie no te haapii atu ia vetahi ê i te parau mau no nia i te Atua e ta ˈna Parau, te Bibilia. No te tauturu ia ratou, ua haere hanere Ite no Iehova no te tahi atu mau fenua i Bulgarie mai te matahiti 2000. Eaha te mau fifi te faaruruhia a haere ai i te fenua ê no te poro atu? No te aha mea hoona te mau tutavaraa? Teie te tahi mau manaˈo o te feia tei haere i Bulgarie.

 Te parau ra Darren, tei ora i Beretane: “I haamau noa na mâua i tera fa, oia hoi ia tavini i te fenua ê, e hinaaro-rahi-hia te feia poro. I to ˈu faaipoiporaa ia Dawn, ua haere mâua i Londres no te tauturu i roto i te haapiiraa ia vetahi ê i te Bibilia na roto i te reo Rusia. Tau taime i muri iho, ua opua mâua i te haere i te tahi atu fenua. Tera râ, no te tumu e rave rau, aita mâua i nehenehe e tere atu. E au ra e ua taora mâua i te tauera. Ua tauturu mai râ hoê hoa ia taa ia mâua e ua taui to mâua tupuraa e e nehenehe faahou mâua e naea i ta mâua i opua aˈe.” Ua haamata o Darren e Dawn i te imi i te hoê fenua e hinaaro-rahi-hia te feia poro e e mea papu no raua ia haere atu. I 2011, ua tere raua i Bulgarie.

 Maoti te hiˈoraa oaoa o te feia tei haere i te tahi atu mau tuhaa o te fenua, ua itoitohia vetahi ia na reira atoa, noa ˈtu aita ratou i haamau i tera fa na mua ˈˈe. Te na ô ra o Giada, tei ora i Italia e ta ˈna tane o Luca: “Ua farerei au i te mau Ite no Iehova itoito rahi tei tavini ma te oaoa i Marite apatoa e i Afirika. Ua putapû roa to ˈu aau i to ratou oaoa e te mau aamu ta ratou i faatia mai. Ua tauturu te reira ia ˈu ia faatano i ta ˈu mau fa.”

 I ora na o Tomasz e Veronika i Repupirita Tchèque e ua haere raua e tavini i Bulgarie i 2015, e ta raua na tamarii o Klara e Mathias te iˈoa. Eaha tei turai ia ratou ia na reira? Te pahono ra Tomasz: “Ua hiˈopoa maite matou i te hiˈoraa o te feia tei haere i te fenua ê, oia atoa te hiˈoraa o to matou mau fetii, e ua feruri maite matou i nia i te tahi mau aamu faatiahia. Ua putapû roa matou i to ratou oaoa e ua aparau matou no nia i te reira i te fare.” I teie nei, te poro ra te mau mero o tera utuafare oaoa i te tuhaa fenua apî no Montana, te hoê oire i Bulgarie.

 O Linda te tahi atu Ite no Iehova tei haere e tavini i Bulgarie. Te parau ra o ˈna: “E rave rahi matahiti na mua ˈtu, ua tere au i Équateur e ua farerei au i te tahi mau Ite no Iehova tei haere e poro i ǒ. Ua manaˈo atura vau e i te hoê mahana, e tavini atoa vau i te vahi e hinaaro-rahi-hia te feia poro.” Ua feruriruri atoa o Petteri e Nadja, na hoa faaipoipo no Filelane, i nia i te hiˈoraa maitai o vetahi. Ua parau raua: “I to mâua amuiraa tumu, e rave rahi taata poro tei haere i te tahi atu mau fenua no te tauturu i te taata ia haapii i te Bibilia. Ua oaoa noa ratou a aparau ai no nia i tera mau matahiti i roto i tera taviniraa. Ua parau ratou e o te mau matahiti maitai roa ˈˈe o to ratou oraraa.”

 Mea faufaa ia faaineine maite ia tatou iho, hou a haere ai e tavini i te fenua ê. (Luka 14:28-30) Te haamanaˈo ra o Nele, no Beletita: “I to ˈu feruriraa e haere e tavini i te tahi atu fenua, ua pure au e ua imi au i te mau tumu parau i roto i ta tatou mau papai no nia i te taviniraa na te fenua ê. Ua hiˈopoa vau i te reira e ua tamata vau i te imi i te mau manaˈo tauturu no te faaineine ia ˈu no tera tere.”

 No Poronia o Kristian e Irmina e ua ora raua i Bulgarie hau atu i te iva matahiti. Ua taa ia raua e ua tauturu rahi ta raua apitiraa i te pûpû reo Bulgarie i Poronia ia raua hou a haere ai i te fenua. Ua faaitoito te pûpû ia raua e ua tauturu atu ia haapii i te reo. Te parau ra o Kristian e Irmina: “Ua taa ia mâua e ia rave tatou i te faanahoraa no te tavini atu â ia Iehova, e haapao iho â Iehova i ta tatou e hinaaro mau ra. Auê i te mea oaoa ia ite i te reira! A parau ai ia Iehova ma te aau atoa: ‘Teie au! A tono ia ˈu!’ e rave oe i te mau ohipa ta oe i ore i manaˈo aˈe e maraa ia oe.”—Isaia 6:8.

 No te faaineine ia raua e no te haaputu i te moni, ua faaoti na hoa faaipoipo o Reto raua Cornelia, no Helevetia, ia faaohie i to raua oraraa. Te faataa ra raua: “Hoê matahiti hou te revaraa, ua haere mâua i Bulgarie no hoê hebedoma, ia taa ia mâua mai te aha te oraraa i ǒ. Ua tauaparau mâua i te tahi mau mitionare aravihi i Bulgarie e ua horoa mai ratou i te mau aˈoraa tano maitai.” Ua faaohipa maitai o Reto raua Cornelia i tera mau aˈoraa. Te tavini ra raua i Bulgarie hau atu i te 20 matahiti i teie nei.

 Ua titauhia i te feia tei haere i te fenua ê ia faatano i to ratou huru oraraa i te mea apî e peneiaˈe i te mau fifi apî ta ratou i faaruru. (Ohipa 16:9, 10; Korinetia 1, 9:19-23) Te fifi matamua no te rahiraa, o te haapiiraa ïa i te reo ê. Te na ô ra Luca, tei faahitihia na mua ˈˈe: “I te mau putuputuraa, mea au roa na mâua te horoaraa i te mau pahonoraa na roto i ta mâua iho mau parau. No te hoê râ taime, mea fifi roa no mâua ta ˈu vahine e faaineine hoê noa pahonoraa ohie na roto i te reo Bulgarie. E au mâua i te tamarii. Te mea papu, mea au aˈe te mau pahonoraa ta te mau tamarii no Bulgarie i horoa i ta mâua.”

 Te na ô ra o Ravil, no Heremani: “Mea rohirohi roa ia haapii i te reo. Ua tamau ra vau i te manaˈo: ‘Haere mǎrû, haere papu. Ia hape oe, a ata noa ˈtu.’ Ua hiˈo atura vau i tera tupuraa, eiaha mai te hoê fifi, mai te hoê tuhaa râ o ta ˈu taviniraa moˈa na Iehova.”

 Ua parau Linda, faahitihia na mua ˈˈe: “E ere au i te mea aravihi no te haapii i te mau reo. E ere i te mea ohie ia haapii i te reo Bulgarie e e rave rahi taime to ˈu hinaaroraa e taora i te tauera. E moˈemoˈe iho â oe aita anaˈe oe e nehenehe e paraparau e e taa i ta vetahi ê mau parau. Ia puai noa to ˈu auhoaraa e o Iehova, ua hiˈopoa vau i te mau tuhaa haapiiraa atoa na roto i te reo Tuete. Maoti te tauturu a to ˈu mau taeae e tuahine here, ua haere ia ˈu e haapii i tera reo apî.”

 Te tahi atu fifi te nehenehe e faaruru, o te mihiraa ïa i te fenua tumu. A haere ai e tavini i te fenua ê, te faarue ra vetahi i to ratou mau fetii here e to ratou mau hoa. Te parau ra Eva, tei haere e tavini i Bulgarie e ta ˈna tane o Yannis: “I te omuaraa, ua moˈemoˈe roa vau. No te faaruru i te reira, ua tamau vau i te tauaparau e to ˈu mau hoa e fetii i te fenua tumu e ua noaa mai ia mâua te mau hoa apî i Bulgarie.”

 Te vai ra te tahi atu mau fifi faaruruhia. Te faataa ra o Robert e Liana, no Helevetia: “Te fifi rahi no mâua, o te reo e te taˈere apî. Aita mâua i ineine i te faaruru i te tau toetoe rahi i ǒ.” Tera râ, ua tapea raua i te huru feruriraa maitai e te ataata. Ua tauturu te reira ia raua ia tavini i Bulgarie ma te taiva ore 14 matahiti i teie nei.

 Te faaitoito rahi atu nei o Lilly ia haere e poro i te fenua e hinaaro-rahi-hia te feia poro: “Ua nehenehe au e ite i ta Iehova tauturu na roto e rave rau ravea, ta ˈu i ore paha e ite i to ˈu fenua tumu. Mea rahi te ohipa no te tauturu ia vetahi ê e ua tauturu mai te reira ia faafatata ˈtu â ia Iehova. Ua ite atoa vau i te oaoa e te oraraa fanaˈo.” Tera atoa ta Ravil, ta ˈna tane, e manaˈo ra. Ua parau o ˈna: “Tera te oraraa maitai roa ˈˈe. E ravea otahi te reira no te haamatau i te mau Kerisetiano itoito rahi no e rave rau fenua. Mea aravihi roa ratou i roto i te haapiiraa ia vetahi ê. E rave rahi ta ˈu i haapii na muri ia ratou.”

 Maoti to ratou hinaaro e tavini na te ara e te mau faanahoraa ta ratou i rave, ua nehenehe “te parau apî oaoa o te Faatereraa arii [e porohia] e ati aˈe te fenua.” (Mataio 24:14) No to ratou hinaaro e haere i te fenua ê no te tauturu ia vetahi ê, ua ite te feia tei haere i Bulgarie e nafea Iehova e farii ai i te mau hinaaro o to ratou aau e e haamanuïa ˈi i ta ratou mau opuaraa atoa.—Salamo 20:1-4.