E oraraa fanaˈo to Madián raua Marcela i Medellín, Colombie. E ohipa aufau-maitai-hia ta Madián e e nohoraa nehenehe to raua. Tera râ, na te hoê tupuraa e haaferuri ia raua no nia i te mea faufaa roa ˈˈe, no te mea e tavini raua no te Atua ra Iehova. Ua faataa raua: “I 2006, ua haere mâua i te mahana tairururaa taa ê “A tapea i te mata maitai.” Ua faaitoitohia e rave rahi oreroraa parau ia faaohie i to tatou nei oraraa no te tavini hau atu â i te Atua. I to mâua faarueraa i te tairururaa, taa ˈtura e ere roa ˈtu tera ta mâua i rave. Ua haamâuˈa rahi mâua i te moni e e mea rahi atoa ta mâua tarahu.”

 I muri aˈe i to raua feruri-maitai-raa, ua haamata Madián raua Marcela i te faaohie i to raua oraraa. Te na ô ra raua: “Ua faaiti na mua mâua i te mau haamâuˈaraa. Ua rave i te hoê nohoraa nainai aˈe, ua hoo atu i to mâua pereoo e ua rave mai i te hoê faurao piti huira.” Ua faaea atoa raua i te haere i te mau fare toa rarahi no te hoo haere i te mau mea atoa. Ua faaohipa maitai i to raua taime no te tauaparau i to raua taata tapiri no nia i te Bibilia. Ua amui atoa raua i te tahi mau hoa itoito mau o te tavini ra i te Atua ra o Iehova ei pionie taa ê. a

 I muri iti noa ˈˈe, ua faaoti Madián raua Marcela i te haere i te vahi atea no te turu i te hoê amuiraa nainai tei hinaarohia i te tauturu. Ia nehenehe raua ia na reira, ua faarue Madián i ta ˈna ohipa. Aita to ˈna paoti i taa no te aha o ˈna i na reira ˈi, e ohipa maitai hoi ta ˈna. Ua haaferuri Madián ia ˈna ma te parau: “Mea rahi ta oe moni, tera râ ua oaoa anei oe?” Ua faˈi o ˈna e eita roa ˈtu, mea rahi hoi to ˈna mau fifi e aita o ˈna i ite e nafea ia faatitiaifaro i te reira. Ua na ô faahou Madián ia ˈna: “Te mea faufaa roa ˈˈe, e ere ehia moni e noaa ia oe, te mea faufaa roa ˈˈe râ, o te imiraa ïa eaha te faaoaoa ia oe. No ˈu e ta ˈu vahine, te oaoa nei mâua i te haapii i te taata no nia i te Atua e te hinaaro nei mâua ia oaoa atu â ma te faataa rahi i te taime no teie ohipa.”

 Ua oaoa roa Madián raua Marcela i te tavini i te Atua, no te mea tera te mea faufaa roa ˈˈe i roto i to raua oraraa. A 13 matahiti i teie nei i to raua tavini-noa-raa i te pae apatoerau tooa o te râ o Colombie, i roto i te mau amuiraa tei hinaaro-rahi-hia i te tauturu. I teie nei, te oaoa nei raua i te tavini ei pionie taa ê.