E Ite no Iehova o Brooke o te ora ra i Marite. I te roaraa o te maˈi pee COVID-19, ua poro oia na roto i te papairaa i te rata. E rave rahi rata ta ˈna i hapono i te hebedoma. I muri aˈe râ hoê matahiti e te afa, ua toaruaru oia. Hoê anaˈe hoi taata tei pahono e tei parau mai eiaha e papai faahou atu. Ua manaˈo Brooke mea faufaa ore ta ˈna mau tutavaraa.

 I muri mai râ, ua faatia o Kim, Ite no Iehova atoa, ia Brooke no nia i ta ˈna aparauraa e te tahi taata o tei haere mai i te fare moni i reira o ˈna e ohipa ˈi. Ua parau mai tera taata ia Kim ua tae mai te tahi rata papai-rima-hia e te tahi Ite no Iehova. I roto i te aparauraa o Kim i te taaraa na Brooke i papai i tera rata! Hoê hebedoma i muri iho, hoˈi faahou mai nei tera taata i te fare moni. A aparau noa ˈi e o Kim, ua ani tera taata mai te peu e nehenehe ta ˈna e apiti mai i ta tatou mau putuputuraa. I tera taime, e faatupuhia na te reira na roto i te natirara.

 Tau taime i muri aˈe, ua faatia o David, Ite no Iehova atoa, ia Brooke, ua tae atu hoê o ta ˈna mau rata i te tahi o to ˈna mau hoa ohipa. Ua faahiahia roa tera taata mea papai-rima-hia taua rata ra. Ua parau atu oia: “Ahani mea rahi aˈe te taata o te tâuˈa ia vetahi ê mai tera te huru!” Ua paraparau rii atu â raua no nia i te Bibilia e ua pûpû atu o David i te tahi papai e ua farii maitai to ˈna hoa ohipa i te reira.

 Eita paha tatou e ite ua tupu mai anei te tahi huero o te parau mau ta tatou i ueue. (Koheleta 11:5, 6) I te taime râ a faatiahia ˈi ia Brooke tei tupu, i reira o ˈna i te iteraa mea faufaa ta ˈna mau tutavaraa i roto i te taviniraa.—Korinetia 1, 3:6.