Ua faaite anei to oe hoa faaipoipo ia oe i to ˈna haapeapea no ta oe ohipa inu? Mai te peu e e, teie te tahi mau manaˈo tauturu.

I roto i teie tumu parau

•  E tuino te inu-hua-raa i te ava i te faaipoiporaa

•  Ua rahi roa ˈtu â anei ta oe ohipa inu?

•  Eiaha e imi i te otoheraa

•  E nafea ïa?

 Ua rau te maˈi e tupu i te inu-hua-raa i te ava, te maˈi mafatu anei, te maˈi upaa e te mariri ai taata. E ere râ tera anaˈe. E fifi-atoa-hia te faaipoiporaa, inaha e tupu mai te rave-ino-raa i te utuafare, te fifi i te pae moni, te faaturi e te taa-roa-raa na hoa faaipoipo.

 Te parau ra te Bibilia “e hohoni” te inu-hua-raa i te ava “mai te ophi e e faatupu i te taero mai te ophi taero.” (Maseli 23:32) E nafea oe e ite ai ua rahi roa ˈtu â anei ta oe ohipa inu?

 A feruri ïa i teie mau uiraa:

•   Mea fifi anei no oe ia inu tanotano noa?

•   Pinepine anei oe i te feruri afea oe e inu faahou ai?

•   E inu anei oe noa ˈtu te fifi e tupu mai i nia ia oe, i rotopu atoa ia orua to oe hoa faaipoipo?

•   E ino anei oe ia tamata oe i te faaea i te inu?

•   Mea tatamaˈi anei orua to oe hoa faaipoipo no ta oe ohipa inu?

•   Ua matau roa anei to oe tino i te ava i teie nei?

•   Mea inu tapunipuni anei oe aore ra mea huna anei oe i te ava i te fare aore ra i te ohipa?

 Mai te peu tei roto oe i tera mau tupuraa, tapao faaite ïa ua rahi roa ˈtu â ta oe ohipa inu. Mea inu hua ïa oe i te ava.

 Ua faaite anei to oe hoa faaipoipo ia oe i to ˈna haapeapea no ta oe ohipa inu? Eaha ïa ta oe i parau atu? Peneiaˈe ua imi oe i te otoheraa e ua faahapa atoa ia vetahi ê, tae noa ˈtu i to oe hoa faaipoipo, a na ô ai:

•   “Ahani mea maitai oe i nia ia ˈu, eita ïa vau e inu.”

•   “E inu atoa oe ahani ta oe paoti ohipa mai ta ˈu ra.”

•   “Mea rahi te taata ta ˈu i matau mea inu aˈe ratou ia ˈu.”

 Aita anei teie mau huru parau e faaite ra e mea nounou aˈe na oe te ava i to orua oraraa faaipoipo oaoa? Eaha hoi te mea faufaa roa ˈˈe?

 Aratairaa Bibilia: “E haapeapea . . . te tane faaipoipo . . . e nafea ta ˈna iho vahine e nehenehe ai e mauruuru ia ˈna.”—Korinetia 1, 7:33.

•   A tâuˈa i te haapeapea o to oe hoa faaipoipo. E nehenehe ta oe e rave i te mau tauiraa, noa ˈtu e ua rahi roa te haapeapea o to oe hoa faaipoipo. Ia ore râ oe e taui, a ore ai e tâuˈa ˈtu ia ˈna, tapao faaite ïa e taata inu iho â oe.

   Aratairaa Bibilia: “Ia imi te taata tataitahi, eiaha i to ˈna iho maitai, i to vetahi ê râ.”—Korinetia 1, 10:24.

•   A rave i te mau maimiraa. E upootia te hoê faehau mai te peu ua ite o ˈna e nafea te enemi e aro mai ai. E nehenehe atoa oe e upootia i nia i to oe enemi, oia hoi te ava. E titauhia ia rave oe i te maimiraa i nia i te inu-hua-raa i te ava e no te aha te taata e topa ˈi i roto i tera fifi. Mea faufaa atoa ia ite oe eaha te mau ravea e matara mai ai oe i tera fifi, a ore atu ai e topa faahou i roto.

   Aratairaa Bibilia: “Ia haapae i te mau hinaaro tia ore o te tino e aro ra ia outou.”—Petero 1, 2:11.

•   A imi i te tauturu. Mea rahi te ravea tauturu no te feia mea inu roa, mai te mau fare maˈi, te mau pu rapaauraa e te mau pu o te tauturu ia faaea i te inu. E nehenehe atoa oe e ani i te tauturu a te hoê hoa feruriraa paari. Na ˈna ïa e faataa ia oe aita anei e tumu ê atu e inu hua ˈi oe. E a pii ia ˈna ia hiaai noa ˈtu oe e inu faahou.

   Aratairaa Bibilia: “E faaite te hoê hoa mau i te here i te mau taime atoa e e taeae oia tei fanauhia no te taime ahoaho.”—Maseli 17:17.

 E fifi rahi te inu-hua-raa i te ava. Eita teie fifi e afaro ma te taio noa i te hoê tumu parau poto aore ra ma te parau noa “E faaiti mai au i ta ˈu inu.” Mea faufaa râ ia taa ia oe e faahopearaa ino to te reira i nia ia oe e i roto i to orua faaipoiporaa. Tei te huru ïa o ta oe e rave i mua i tera fifi.

 No te ite atu â: A taio i to muri nei mau tumu parau e faataa ra mea nafea vetahi i te faaearaa i te inu hua i te ava.

 “E ere faahou vau i te taata ino”

 “Aita vau e haama faahou ia ˈu iho”

 “Aita faahou to ˈu e fare!”

 A mataitai atoa i te video ‘Ua tâhiti roa vau i to ˈu oraraa’