TA TE FEIA APÎ E UIUI NEI
Eaha ta to ˈu faaahuraa e faaite ra?
No te aha ia haapao oe i ta oe e oomo ra? No te mea e faaite to oe huru faaahuraa o vai mau na oe.
E toru marei no nia i te faaahuraa e e nafea ia ape i te reira
Marei #1: E vaiiho i te mau ravea haapurororaa e faaoti i ta oe huru faaahuraa.
“Te tahi mau taime, mea au roa na ˈu te tahi mau huru faaahuraa no te mea e rave rahi poroi faatianianiraa no nia i te reira,” ta te hoê taurearea o Theresa te iˈoa i parau. “Ia tamau noa oe i te ite i te mau taata e oomo ra i te tahi mau ahu, e turai te reira ia oe ia hoo atoa mai.”
E ere noa te mau tamahine o tei pee i te mau poroi faatianianiraa. “Te pee atoa ra te mau tamaroa i te reira” ta te buka The Everything Guide to Raising Adolescent Boys e parau ra. “Noa ˈtu mea apî roa ratou, ua ohipa atoa te poroi faatianianiraa i nia ia ratou.”
Te faaotiraa maitai: Te parau ra te Bibilia: “E tiaturi te taata vare hanoa i te mau parau atoa, e haapao maitai râ te taata feruriraa haroˈaroˈa i to ˈna mau taahiraa tataitahi.” (Maseli 14:15) Ia au i teie faaueraa, a haapii i te hiˈopoa maite eaha ta oe e mataitai i roto i te mau poroi faatianianiraa. Ei hiˈoraa, ia mataitai oe i roto i te mau poroi faatianianiraa no te mau ahu mea “vî i nia i te tino,” “vai tahaa noa te tino,” “mea poto,” a uiui na ia oe iho:
‘O vai te hiˈo mai ia pee vau i teie huru faaahuraa?’
‘E faaauhia to ˈu faaahuraa i teihea huru oraraa?’
‘Te tano ra anei teie huru oraraa no ˈu e no ta ˈu e manaˈo ra?’
Manaˈo tauturu no nia i te faaahuraa: I roto hoê hebedoma, a hiˈo maitai i te mau ahu i roto i te mau poroi faatianianiraa e te tahi mau ravea haapurororaa no nia i te faaahuraa. Eaha te huru oraraa ta te reira e faaitoito mai? Te vai ra anei te tahi mau poroi o tei faanahohia no te turai ia oe ia manaˈo e te hinaaro ra oe e pee i tera huru oraraa? Te parau ra te hoê taurearea o Karen te iˈoa: “Mea teimaha i te hinaaroraa e riro ei taata nehenehe, e oomo i te ahu nehenehe e e faaite i te hoê tino ‘nehenehe.’” “Ua ite te mau taata o te hamani i te mau poroi faatianianiraa i te reira, mea ohie ïa no ratou i te faahema i te feia apî.”
Marei #2: Te oomoraa i te ahu mai te taatoaraa.
“Mai te peu te vai ra te tahi mau ahu mea oomo-roa-hia,” ta Manuel ïa e parau ra, “e oomo atoa te taatoaraa i te reira. Ia ore râ oe e na reira, e haava te taata ia oe.” Ua farii te hoê taurearea o Anna te iˈoa i te reira. Te parau ra oia, “e ere noa te huru faaahuraa o te turai ia vetahi ê ia na reira, o te riro atoa ra mai te taatoaraa.”
Te faaotiraa maitai: Te parau ra te Bibilia: “Eiaha atoa outou ia faaau faahou i to outou haerea i to teie nei ao.” (Roma 12:2) Ia au i teie aˈoraa, a hiˈo maitai i roto i to oe mau ahu e a uiui ia oe iho:
‘Na te aha e turai na mua roa ta ˈu mau faaotiraa no nia i te faaahuraa?’
‘Mea faufaa anei no ˈu te mau ahu moni?’
‘E faatietie anei au i mua ia vetahi to ˈu mau ahu?’
Manaˈo tauturu no nia i te faaahuraa: Eiaha e feruri i nia noa e piti manaˈo: e pee i te huru faaahuraa (e fariihia) aore ra eiaha e pee i te huru faaahuraa (e patoihia), a feruri râ i nia i te toru o te manaˈo: Te tiaturiraa ia oe iho ia ore te manaˈo o vetahi ia ohipa mai i nia ia oe. Rahi noa ˈtu oe i te tiaturi ia oe iho, e iti mai ïa te hinaaro e riro mai te taatoaraa.
Marei #3: A haamanaˈo, ‘piri noa ˈtu â te ahu i nia i te tino, mea au roa ˈtu â ïa.’
“I te tahi taime, e hinaaro iho â oe e oomo i te mau ahu e ere i te mea tano, mea poto aore ra mea piri roa i nia i te tino,” ta Jennifer ïa i faˈi.
Te faaotiraa maitai: Te parau ra te Bibilia: “Eiaha ei faanehenehe rapaeau noa to outou, . . . ei faanehenehe râ i te rotoraa o to outou aau.” (Petero 1, 3:3, 4) Ia au i teie aˈoraa, a feruri na eaha te mea au aˈe: te nehenehe o rapae aore ra te nehenehe o roto.
Manaˈo tauturu no nia i te faaahuraa: Te ‘faaunauna’ e vai ra ia oe ra, o te tura ïa. Parau mau, e ere teie taˈo i te mea matauhia i teie mahana. A feruri na ra i teie hiˈoraa:
Ua aparau aˈena anei oe i te hoê taata mea paraparau roa oia no nia noa ia ˈna iho? Te mea peapea roa ˈtu â, aita teie taata e haapao ra e aita oe e tâuˈa ra ia ˈna!
Te faaahuraa, mai te paraparauraa, o te faaite ra e te hinaaro ra oe ia hiˈohia mai oe e e nehenehe te reira e faaatea ê te taata ia oe
Aita anaˈe oe e faaahu ia oe ma te tura, e riro oe mai tera taata. E faaite to oe faaahuraa i teie poroi ‘a hiˈo mai ia ˈu,’ a manaˈohia ˈi e aita oe e tiaturi ia oe iho aore ra e mana’o noa oe ia oe iho. A manaˈo-atoa-hia ˈi e te hinaaro ra oe ia hiˈohia mai oe: oia atoa e ere anaˈe i te mea tano.
Mea au aˈe ia faaite i te tura, i te faaiteiteraa i te mau mea eita oe e hoo atu. “Te tura, e ere ïa i te faaahuraa mai to oe mama ruau,” ta Monica ïa i parau. “Te auraa ia faatura oe ia oe iho e ia vetahi ê.”
E au atoa outou . . .
TO RATOU MANAˈO
No te aha vau e haapeapea rahi ai no to ˈu huru rapaeau?
A haapii e nafea ia haavî i to outou feruriraa.
TO RATOU MANAˈO
Te manaˈo o te mau taurearea no nia i te rapaeau o te taata
No te aha mea fifi no te mau taurearea ia vai aifaito noa no nia i te huru hiˈoraa i te rapaeauraa o te taata? Eaha te nehenehe e tauturu?
