Eita te Bibilia e parau inafea te Atua i haamata ˈi i te poiete i te ao nui aore ra ehia maororaa te reira i te tupuraa. Te faaite-noa-hia ra: “I te haamataraa, poiete ihora te Atua i te raˈi e te fenua.” (Genese 1:1) Eita te Bibilia e haapapu inafea “te haamataraa” i te tupuraa. Tera râ, te tuu ra te anairaa o te mau tupuraa faahitihia i roto i te Genese i te reira na mua roa i na ono tau aore ra “mahana,” o te poieteraa.

•  Na ono mahana o te poieteraa e 24 hora anei i nia i te 24?

•  Eaha tei tupu i te roaraa o na ono mahana o te poieteraa?

•  Te tupuraa i roto i te Genese, mea papu anei i te pae o te ihi?

•  Inafea te mahana, te avaˈe e te mau fetia i te poieteraahia?

•  Ia au i te Bibilia, ehia matahiti to te fenua?

 Aita. I roto i te Bibilia, e nehenehe te taˈo “mahana” e faaauhia i te rauraa o te roaraa tau, tei te huru o te tupuraa. Ei hiˈoraa, ua faataahia te taatoaraa o te area tau o te poieteraa mai hoê noa mahana.—Genese 2:4.

 Ua faariro te Atua i te ‘vai-ano-raa o te fenua’ mai te tahi vahi e nehenehe ai te mau mea ora e ora. (Genese 1:2) I muri iho, ua poiete oia i te ora i nia i te fenua. Te faataa ra te Bibilia i na ono tuhaa o te mau tupuraa tei tupu i te roaraa o te mau mahana aore ra area tau o te poieteraa:

•  Mahana 1: Ua poiete te Atua i te maramarama tei tae roa i nia i te fenua, te faanahoraa ïa no te po e te ao.—Genese 1:1-5.

•  Mahana 2: Ua hamani te Atua i te reva, aore ra hoê faataa-ê-raa i te mau pape i raro aˈe i te reva i te mau pape i nia ˈˈe i te reva.—Genese 1:6-8.

•  Mahana 3: Ua haamǎrô te Atua i te fenua ia faura mai te fenua. Ua faatupu atoa oia i te mau raau tupu.—Genese 1:9-13.

•  Mahana 4: Ua hamani te Atua i te mahana, te avaˈe e te mau fetia e itehia ei tiarama mai te fenua mai.—Genese 1:14-19.

•  Mahana 5: Ua poiete te Atua i te mau animara ora i roto i te mau pape e te mau animara e rere ra.—Genese 1:20-23.

•  Mahana 6: Ua poiete te Atua i te mau animara o te fenua e te mau taata.—Genese 1:24-31.

 I muri aˈe i na ono mahana, ua faafaaea te Atua i ta ˈna mau ohipa aore ra ua faaea i ta ˈna i poiete.—Genese 2:1, 2.

 Eita te aamu o te poieteraa o te ao nei i roto i te Bibilia e faahua parau ra e tuatapaparaa faataa-maitai-hia i te pae o te ihi te reira. Te faahitihia ra râ te poieteraa ia ohie no te taata taio oia atoa no te tau tahito ra ia taa i te anairaa o te mau tupuraa. Eita te aamu no nia i te poieteraa e patoi ra i te mau haapapuraa o te ihi. Te papai ra te aivanaa ra Robert Jastrow: “Mea taa ê te mau faataaraa atoa, area râ te tuhaa faufaa no te ihi reva teitei e te mau aamu o te Genese, hoê â ïa. Te anairaa o te mau tupuraa o tei tae roa mai i te taata, mea tupu taue i te tahi taime taa maitai.”

 I vai na te mahana, te avaˈe e te mau fetia “i te raˈi” i poietehia “i te haamataraa.” (Genese 1:1) Aita râ te maramarama o te reira i tae mai i nia i te fenua no te mea mea meumeu te reva mataˈi. (Genese 1:2) No reira, noa ˈtu ua itehia te maramarama i te mahana matamua, aita i itehia nohea mai te reira. I te maharaa râ o te mahana, ua ite-maitai-hia te reva mataˈi. Te parau ra te Bibilia ua haamata te mahana, te avaˈe e te mau fetia i “te turama i te fenua,” ma te faataa nafea te reira e ite-maitai-hia mai te fenua mai.—Genese 1:17.

 Eita te Bibilia e faaite ra ehia matahiti to te fenua. Te faataa noa ra te Genese 1:1 e haamataraa to te ao nui, oia hoi to tatou fenua. Eita teie faahitiraa e patoi i te mau haapapuraa i te pae o te ihi oia atoa ta te mau aivanaa i manaˈo no nia i te matahiti o te fenua.