Te faaite ra te Bibilia e ere i te mea ino ia here oe ia oe iho, tera râ e titauhia ia vai aifaito noa oe. Mea tano ia aupuru e ia faatura oe ia oe iho. A haamanaˈo atoa e mea faufaa oe. (Mataio 10:31) Aita râ te Bibilia e faaitoito ra ia haapao noa oe ia oe iho.

O vai ta tatou e here na mua?

1.   O te Atua te tia ia here na mua roa. Te faaueraa faufaa roa ˈˈe ta te Bibilia e haapii ra oia hoi: “Ia here oe ia Iehova to oe Atua ma to oe aau atoa.”—Mareko 12:28-30; Deuteronomi 6:5.

2.   Te piti o te faaueraa faufaa roa ˈˈe: “Ia here oe i to oe taata tupu mai ia oe iho.”—Mareko 12:31; Levitiko 19:18.

3.   Noa ˈtu aita te Bibilia e faaue ra ia here oe ia oe iho, te haapapu ra râ teie faaueraa “ia here oe i to oe taata tupu mai ia oe iho,” e mea faufaa ia faatura e ia here oe ia oe iho ma te aifaito noa.

O vai ta Iesu i here na mua?

 Ua faaite Iesu mea nafea ia here i te Atua, i to ˈna taata tupu e ia ˈna iho. Ua faaue ïa o ˈna i ta ˈna mau pǐpǐ ia pee i to ˈna hiˈoraa.—Ioane 13:34, 35.

1.   O te Atua ra o Iehova ta ˈna i here na mua roa e ua horoa o ˈna ia ˈna iho no te rave i te ohipa a to ˈna Metua. Ua na ô o ˈna: “Ia ite to te ao e mea here na ˈu te Metua, te rave nei au i ta te Metua i faaue mai.”—Ioane 14:31.

2.   Ua here Iesu i to ˈna taata tupu ma te haapao na mua i to ratou hinaaro eiaha râ i to ˈna iho. Ua tae roa ia ˈna i te horoa i to ˈna iho ora.—Mataio 20:28.

3.   Ua here Iesu ia ˈna iho, ua rave o ˈna i te taime no te faafaaea, no te tamaa e no te amuimui e ta ˈna mau pǐpǐ.—Mareko 6:31, 32; Luka 5:29; Ioane 2:1, 2; 12:2.

E iti anei te oaoa ia here na mua oe i to oe taata tupu?

 Aita roa ˈtu! No te mea ua poiete te Atua ia tatou i to ˈna huru. O te here hoi to ˈna huru maitai matamua. (Genese 1:27; Ioane 1, 4:8) No reira, e nehenehe ïa tatou e here ia vetahi ê. E rahi to oe oaoa ia here oe na mua roa i te Atua e ia rave i te mea maitai no vetahi ê. Mai ta te Bibilia e parau ra: “E rahi aˈe te oaoa ia horoa ˈtu ia horoahia mai.”—Ohipa 20:35.

 I teie mahana, e rave rahi taata o te parau ra e oaoa oe ia haapao noa oe ia oe iho. Ua mono ratou i te faaueraa ia “here i to taata tupu” i teie parau “a here ia oe iho.” Te mea papu râ, e maitaihia to oe ea e e oaoa oe ia pee anaˈe i teie aoraa paari a te Bibilia: “Ia imi te taata tataitahi, eiaha i to ˈna iho maitai, i to vetahi ê râ.”—Korinetia 1, 10:24.