Te tamaˈi o Aramagedo, o te tamaˈi hopea ïa i rotopu i te mau faatereraa a te taata e i te Atua. I teie atoa mahana, te patoi nei teie mau faatereraa a te taata, oia atoa te mau taata o te paturu nei ia ratou, i te Atua ma te ore e hinaaro e auraro i ta ‘na faatereraa. (Salamo 2:2) Maoti te tamaˈi o Aramagedo e haamouhia ˈi te mau faatereraa a te taata.​—Daniela 2:44.

 E itehia te taˈo Aramagedo hoê noa taime i roto i te Bibilia, i roto i te Apokalupo 16:16. I roto i te buka Apokalupo, te tohu ra te Bibilia e “i te vahi parauhia Aramagedo na roto i te reo Hebera”, e haaputuputuhia mai “te mau arii atoa o te fenua nei no te tamaˈi o te mahana rahi o te Atua Mana hope.”​—Apokalupo 16:14.

 O vai te aro i Aramagedo? E upootia o Iesu Mesia e ta ˈna nuu i te raˈi i nia i teie mau enemi o te Atua. (Apokalupo 19:11-16, 19-21) I rotopu i teie mau enemi, te vai ra te feia o te patoi nei i te Atua e o te ore e faatura ra ia ˈna.​—Ezekiela 39:7.

 E tupu anei te tamaˈi o Aramagedo i hitia o te râ no ropu? Eita. Eita te tama’i o Aramagedo e tupu i te hoê noa vahi, i nia râ i te taatoaraa o te fenua.​—Ieremia 25:32-34; Ezekiela 39:17-20.

 Te auraa o te parau Aramagedo (Har Meghiddohn na roto i te reo Hebera), o te “mouˈa no Megido” ïa. Na mua ˈˈe, e oire Megido i roto i te tuhaa fenua no Iseraela i tahito. Ia au i te tuatapaparaa, ua tupu te mau aroraa faufaa roa i tera vahi e ua faahitihia te tahi o tera mau aroraa i roto i te Bibilia. (Te mau tavana 5:19, 20; Te mau arii 2, 9:27; 23:29) Tera râ, e ere Aramagedo i te hoê vahi i pihai iho ia Megido no tahito ra. Oia hoi, aita e mouˈa rarahi i tera vahi, e mea nainai roa te Peho o Iezereela no te farii i te taatoaraa o te feia e aro i te Atua. Eaha ïa Aramagedo? E tupuraa na te ao nei i reira e tahoê ai te mau nunaa atoa no te taime hopea no te patoi i te faatereraa a te Atua.

 Eaha te tupu i te roaraa o te tamaˈi o Aramagedo? Eita tatou e ite e nafea te Atua e faaohipa ˈi i to ˈna puai. E nehenehe o ˈna e faaohipa i te ûa paari rahi, te aueueraa fenua, te ûa rahi, te auahi e te mau ofai ura, te uira e te mau maˈi mai ta ˈna i rave i te tau tahito. (Ioba 38:22, 23; Ezekiela 38:19, 22; Habakuka 3:10, 11; Zekaria 14:12) I roto i te hoê arepurepuraa, e haapohe te tahi o te mau enemi o te Atua i te tahi e te tahi e i te pae hopea râ, e taa ratou o te Atua e aro nei ia ratou.​—Ezekiela 38:21, 23; Zekaria 14:13.

 O Aramagedo anei te hopea o teie nei ao? Eita ta tatou paraneta e haamouhia i Aramagedo no te mea ua poietehia te fenua ia nehenehe te huitaata e ora e a muri noa ˈtu. (Salamo 37:29; 96:10; Koheleta 1:4) Eita te tamaˈi o Aramagedo e haamou i te huitaata, e faaora râ i te “nahoa rahi” o te mau tavini a te Atua.​—Apokalupo 7:9, 14; Salamo 37:34.

 I roto i te Bibilia, e faaohipahia te taˈo “ao” no te faahiti i te fenua. I te tahi taime, e nehenehe atoa te “ao” e faahiti i te taatoaraa o te feia ino o te patoi nei i te Atua. (Ioane 1, 2:15-17) Tera te auraa o te ao a parauhia ˈi e e haamou te tamaˈi o Aramagedo i “te anotau hopea o te ao nei.”​—Mataio 24:3.

 Afea te tamaˈi o Aramagedo e tupu ai? A paraparau ai Iesu no nia i te “ati rahi,” o Aramagedo hoi te tuhaa hopea o tera ati rahi, ua parau oia: “No nia i te reira mahana e te reira hora, aita te hoê i ite, aita te mau melahi o te raˈi e aita atoa te Tamaiti, o te Metua anaˈe râ.” (Mataio 24 :31, 36) Te faaite nei râ te Bibilia e tupu Aramagedo i te tau o te vairaa mai itea ore o Iesu Mesia, tei haamata i 1914.​—Mataio 24:37-39.