O vai te anetimesia?
Te pahonoraa a te Bibilia
E ere te anetimesia aore ra taata patoi i te Mesia i te hoê noa taata aore ra faanahonahoraa, te parau ra hoi te Bibilia “mea rahi te taata patoi i te Mesia.” (Ioane 1, 2:18) Te auraa o te taˈo Heleni “anetimesia,” oia hoi “patoi (aore ra mono) i te Mesia,” te mau taata atoa ïa o te rave ra i te mau ohipa i muri nei:
Te parau ra e ere o Iesu te Mesia e aita ratou e tiaturi e o ˈna te Tamaiti a te Atua.—Ioane 1, 2:22.
Te patoi ra i te Mesia ta te Atua i faatavai.—Salamo 2:1, 2; Luka 11:23.
Te parau ra o ratou te Mesia.—Mataio 24:24.
Te hamani-ino ra i te mau pǐpǐ a te Mesia, no Iesu o ˈna ta ratou e hamani-ino nei.—Ohipa 9:5.
Te parau ra e Kerisetiano ratou a ofati noa ˈi ratou i te ture aore ra a haavarevare noa ˈi ratou i te taata.—Mataio 7:22, 23; Korinetia 2, 11:13.
Ia parau anaˈe te Bibilia no nia i “te taata patoi i te Mesia,” o te mau taata ïa o tei rave i teie mau ohipa faahitihia na mua aˈe. (Ioane 2, 7) Ua fa mai te taata patoi i te Mesia i te tau o te mau aposetolo e te haa noa ra oia, tae roa mai i teie nei mahana mai ta te Bibilia i tohu.—Ioane 1, 4:3.
E nafea ia ite o vai teie mau taata patoi i te Mesia?
Te haapii nei ratou i te mau manaˈo hape no nia ia Iesu. (Mataio 24:9, 11) Ei hiˈoraa, te feia o tei haapii i te Toru tahi aore ra o tei parau e o Iesu te Atua Manahope, te patoi ra ratou i te mau haapiiraa a Iesu o tei parau: “Mea hau aˈe te Metua ia ˈu.”—Ioane 14:28.
Aita te taata patoi i te Mesia e farii ta Iesu i parau no nia i ta te Faatereraa arii a te Atua e rave. Ua parau te mau tia haapaoraa e te ohipa nei Iesu na roto i te mau faatereraa taata. Mea hape hoi tera manaˈo, no te mea ua parau Iesu: “E ere ta ˈu Faatereraa arii no teie nei ao.”—Ioane 18:36.
Te parau ra ratou e o Iesu to ratou Fatu. Tera râ, aita ratou e auraro i ta ˈna mau faaueraa mai te pororaa i te parau apî oaoa a te Faatereraa arii.—Mataio 28:19, 20; Luka 6:46; Ohipa 10:42.