“A faaea, e ia ite outou e o vau te Atua. E faahanahanahia vau i rotopu i te mau nunaa. E faahanahanahia vau i nia i te fenua.”—Salamo 46:10, Huriraa o te ao apî.

 “A faatupua na, ia ite mai e, o vau te Atua, e faateiteihia vau i ǒ te mau etene, e faateiteihia vau i te fenua nei.”—Salamo 46:10, Te Bibilia Moˈa ra.

 Te faaitoito ra te Atua i te taata atoa ia haamori ia ˈna e ia farii e tiaraa to ˈna e faatere i te fenua. Te taata atoa o te hinaaro e ora e a muri noa ˈtu, ia farii iho â ïa i to ˈna puai e mana faatere.—Apokalupo 4:11.

 “A faaea, e ia ite outou e o vau te Atua.” I roto i te tahi mau Bibilia, ua hurihia “a faaea” ei “a faatupua.” Manaˈo ihora ïa e rave rahi e faaueraa teie ia faaite i te faatura aore ra eiaha e maniania i roto i te mau fare pure. E ere roa ˈtu râ. Te pereota Hebera tei hurihia “a faaea, e ia ite outou e o vau te Atua,” e faaueraa ïa no ǒ mai ia Iehova a ra i to te mau nunaa atoa ia faaea i te patoi ia ˈna e ia farii e o ˈna anaˈe te haamorihia.

 Tera atoa te faaueraa i roto i te Salamo 2. I roto i tera Salamo, te fafau ra te Atua e tairi o ˈna i te feia e patoi ra ia ˈna. Area te feia e farii ra i to ˈna mana faatere, te imi ra ïa i ta ˈna aratairaa, to ˈna puai e to ˈna paari. Te fanaˈo ra te feia “e imi ra i te haapuraa i te Atua” i te oaoa e te hau i te mau taime fifi iho â râ.—Salamo 2:9-12.

 “E faahanahanahia vau i rotopu i te mau nunaa. E faahanahanahia vau i nia i te fenua.” I tahito ra, ua faahanahanahia te Atua ra o Iehova i to ˈna faaohiparaa i to ˈna puai rahi no te paruru i to ˈna nunaa. (Exodo 15:1-3) I mua nei, e rahi roa ˈtu â Iehova i te faahanahanahia ia auraro to te fenua taatoa i to ˈna mana faatere, a haamori atu ai ia ˈna.—Salamo 86:9, 10; Isaia 2:11.

 I roto i te hoê faahororaa, e parauhia te Salamo 46 “e himene arueraa i te mana o te Atua, te paruru puai i ta ˈna mau tavini.” A himene ai ratou i te Salamo 46, te faaite ra ïa te mau tavini a te Atua i to ratou tiaturi e nehenehe iho â ta Iehova e paruru e e tauturu ia ratou. (Salamo 46:1, 2) Ua haamanaˈo noa te reira ia ratou e tei pihai iho noa Iehova ia ratou.—Salamo 46:7, 11.

 Ia puai atu â to ratou tiaturi i te mana paruru o te Atua ra o Iehova, te ani ra tera Salamo ia ratou ia feruri i te mau mea faahiahia ta ˈna i rave. (Salamo 46:8) Ei hiˈoraa, te faaite ra tera himene e nehenehe iho â ta ˈna e faaore i te tamaˈi. (Salamo 46:9) E nehenehe e parau e ua faaore Iehova i te tamaˈi i tahito ra ia ˈna i paruru i to ˈna nunaa i te mau nunaa enemi. Teie râ, te fafau ra te Bibilia e fatata te Atua i te faaore i te tamaˈi ati aˈe te ao nei.—Isaia 2:4.

 Te tauturu atoa ra anei Iehova i ta ˈna mau tavini i teie mahana? E. Inaha, ua faaitoito roa te aposetolo Paulo i te mau Kerisetiano ia turui i nia ia ˈna ia tauturuhia ratou. (Hebera 13:6) Te haapuai ra te Salamo 46 i to tatou tiaturi i te mana paruru o te Atua. E tauturu tera Salamo ia tatou ia hiˈo i te Atua mai to tatou “haapuraa e puai.”—Salamo 46:1.

 A mataitai i teie video o te faataa poto noa i te buka Salamo.