“Ua ravai oe i to ˈu hamani maitai rahi, i roto hoi i te paruparu e ite-maitai-hia ˈi te rahi o to ˈu puai.”—Korinetia 2, 12:9, Huriraa o te ao apî.

 “To ˈu nei maitai atire ïa ta oe: ei te paruparu e taa maitai roa ˈi to ˈu puai.”—Korinetia 2, 12:9, Te Bibilia Moˈa ra.

 Ua fafau te Atua e horoa i te puai ia faaoromai tamau te aposetolo Paulo i to ˈna mau fifi e paruparu.

 “Ua ravai oe i to ˈu hamani maitai rahi.” E hurihia atoa teie parau “e navai noa to ˈu hamani maitai no oe.” Te auraa, e navai noa to te Atua hamani maitai rahi ia nehenehe Paulo e faaoromai i to ˈna mau fifi. E nafea ïa? E faahohoˈahia te taˈo hamani maitai rahi aore ra maitai i te hoê ô no ǒ mai i te Atua aore ra hoê ô mea horoa-noa-hia mai. Ua faufaa-rahi-hia Paulo i te hamani maitai rahi o te Atua. I hamani ino na o ˈna i te mau Kerisetiano. Noa ˈtu râ, ua horoa te Atua ia ˈna i te puai no te taui e no te tauturu ia vetahi ê ia riro mai ei Kerisetiano. (Korinetia 1, 15:9, 10; Timoteo 1, 1:12-14) Ua turui Paulo i nia i ta te Atua tauturu no te faaoromai i te mau fifi atoa ta ˈna i faaruru.

 “I roto hoi i te paruparu e ite-maitai-hia ˈi te rahi o to ˈu puai.” Ua haamanaˈo te Fatu Iehova a ia Paulo e ite-maitai-hia to ˈna puai i roto i te mau paruparu o te taata. (Korinetia 2, 4:7; 12:8) Ia farii te mau Kerisetiano i to ratou mau taotiaraa, a ani ai i ta Iehova tauturu, te vaiiho ra ïa ratou i te puai o te Atua ia ohipa i nia ia ratou. (Ephesia 3:16; Philipi 4:13) Mea na reira ïa e ite-maitai-hia ˈi te puai o te Atua i roto i te paruparu o te taata.

 Ua papai Paulo i te rata i te mau Kerisetiano no Korinetia i te area matahiti 55. I te pae hopea o taua rata ra, ua faataa oia e maoti taua puai ra e tavini ai oia ei aposetolo. I faainohia na oia e vetahi mau faahua aposetolo, e parau ra e taata haihai o ˈna e mea faufaa ore ta ˈna parau.—Korinetia 2, 10:7-10; 11:5, 6, 13; 12:11.

 Ua faataa Paulo e ere maoti to ˈna puai i rave ai oia i ta ˈna taviniraa e i faaoromai ai oia e rave rahi fifi. (Korinetia 2, 6:4; 11:23-27; 12:12) I te pene 12, ua faahiti oia i “te hoê tara i roto i to ˈu nei tino” o te haamauiui ra ia ˈna i te pae aau aore ra te pae tino. (Korinetia 2, 12:7) Aita o ˈna i faataa eaha tera tara. Ua faaoti papu râ oia e faaoromai tamau maoti ta te Atua tauturu.

 Te faaruru atoa nei te mau Kerisetiano i te fifi e te hamani-ino-raa. Te itoitohia ra ratou a ite ai e maoti te puai o te Atua e nehenehe ai ratou e faaoromai tatou. Mai ia Paulo, e parau atoa ratou: “Ia paruparu hoi au, i reira ïa vau e puai ai.”—Korinetia 2, 12:10.

 A mataitai i teie video o te faataa poto noa i te buka Korinetia 2.