Ɛfiri tete nyinaa nkurɔfo bu Buronya sɛ afahyɛ a Kristofo di de kae Yesu awoɔ. Nanso, sɛ yɛhwɛ amanneɛ ahorow a ɛbatabata buronya ho no a, yɛnhu nea enti a nkurɔfo di afahyɛ a ɛte sei de kae Yesu.

Buronya amanneɛ no baako ne Papa Buronya (Santa Claus) ho anansesɛm no. Wohwɛ Papa Buronya a, ɔhyɛ atade kɔkɔɔ, n’abɔdwesɛ yɛ fitaa, na n’afono ho kɔɔ. Wɔkyerɛ sɛ afe 1931 mu no, Amerika adwumakuo bi a wɔyɛ anonneɛ de Papa Buronya yi bɔɔ wɔn nneɛma a wɔtɔn no Buronya bere mu ho dawuro, na ɛkɔɔ yie maa wɔn paa. Brazilfo nso wɔ biribi a wɔfrɛ no Grandpa Indian, na afe 1950 mu no, ebinom yɛɛ sɛ wɔde no bɛsi Papa Buronya ananmu. Ɛkɔwiee sɛn? Ɔbenfo Carlos E. Fantinati ka sɛ: Papa Buronya bɛgyee din senee Grandpa Indian na “mpo ɔbɛgyee din senee akokoaa Yesu. Enti ɔno na sɛ ɛdu December 25 afahyɛ no a, ɔdi mu akoten.” Nanso, Papa Buronya nko ara ne ade a ɛnyɛ wɔ Buronya ho anaa? Sɛ yɛhwɛ sɛnea na tete Kristofo no bu awodadi a, yɛbɛtumi ahu mmuaeɛ no.

Nwoma bi ka sɛ, “Bɛyɛ mfe ahanu a Kristosom fii ase no, na [Kristofo] nni nnipa a wɔn gyidie nti wɔkunkum wɔn no awoda na kampɛsɛ wɔadi Yesu awoda.” (Encyclopedia Britannica) Adɛn ntia? Ná Kristofo bu awodadi sɛ ɛyɛ abosonsom a ɛnsɛ sɛ wɔbɔ so wɔ wɔn mu koraa. Wokenkan Bible a, wobɛhu sɛ wɔanka ɛda a wɔwoo Yesu ho asɛm.

Ná tete Kristofo no nni awoda nanso Katolek Asɔre no deɛ, wɔbuu wɔn ani guu biribiara so, na Yesu wuo akyi bɛboro mfe 300 no, wɔfirii ase dii Buronya. Ná Katolek Asɔre no pɛ sɛ wɔyɛ biribi a ɛbɛma nkurɔfo ani agye wɔn asɔre no ho. Ɛno nti wɔfaa kwan bi so yii afahyɛ ahorow a Roma abosonsomfo ani gye ho no fii hɔ. Nwoma bi a Penne L. Restad kyerɛwee no ma yɛhu sɛ afe biara, ɛfiri December 17 kɔsi January 1 mu no, na “Romafo dodow no ara di afahyɛ ahorow de hyɛ wɔn anyame anuonyam. Ɛdu saa bere no a, wɔto santen, na wɔto pono akɛse, di agorɔ, gye wɔn ani sɛpɛ wɔn ho.” (Christmas in America) Ɛdu December 25 wɔ afahyɛ no mu a, Romafo di Owia awoda. Enti Katolek Asɔre no boapa de Buronya hyɛɛ saa da no de daadaa Romafo no sɛ ɛnyɛ owia awoda na wɔredi, na mmom Yesu awoda. Nwoma bi a Gerry Bowler kyerɛwee no, ɔkyerɛɛ mu sɛ: “Afahyɛ dada a na [Romafo] di no ho hwee ansesa.” Enti yɛreka paa a, nea ɔrepɛ akyerɛ ara ne sɛ Kwasi kɔ, nanso ɔgyina nkwantia.—Santa Claus, a Biography.

Enti yɛhwɛ nea yɛaka afa Buronya ne ɛho amanneɛ ho no a, yɛhu sɛ asɛm wɔ Buronya ho. Nwoma bi a Stephen Nissenbaum kyerɛwee no, ɔkaa sɛ Buronya “yɛ abosonsom a wɔde Kristosom adura ho.” (The Battle for Christmas) Enti sɛ obi di Buronya a, ɔrentumi nka da sɛ ɔde rehyɛ Onyankopɔn ne ne Ba, Yesu Kristo anuonyam. Sɛ saa na ɛte a, ɛnneɛ wonhu sɛ ɛyɛ aniberesɛm? Wo deɛ, hwɛ asɛm bi a Bible no ka: “Twaka bɛn na tenenee ne amumuyɔ wɔ? Anaasɛ ayɔnkofa bɛn na hann ne sum wɔ?” (2 Korintofoɔ 6:14) Wei nti yɛbɛtumi de Buronya atoto dua kɔntɔnkye ho; sɛnea akɔntɔn akyea no deɛ, obiara ‘rentumi ntene no.’—Ɔsɛnkafoɔ 1:15.