Sɛ ɔmanfoɔ de tumi ma aban bi, na sɛ emufoɔ de tumi no pɛ wɔn ankasa mfasoɔ a, yɛbɛtumi aka sɛ kɛtɛasehyɛ ne porɔeɛ adidi aban no mu. Ɛnyɛ nnɛ na saa suban no firii aseɛ. Mmara bi wɔ Bible mu a ɛma yɛhu saa. Bɛboro mfie 3,500 ni na wɔde saa mmara no maeɛ. Ná ɛbara sɛ obi bɛgye adanmudeɛ anaa sika ansa na wadi asɛm. Ɛno di adanseɛ sɛ tete nyinaa, na kɛtɛasehyɛ ne porɔeɛ atu atese. (Exodus 23:8) Sɛ yɛka kɛtɛasehyɛ ne porɔeɛ a, ɛnyɛ adanmudeɛ anaa braeb a obi bɛgye nko ara ho asɛm na yɛreka. Aban mpanimfoɔ a porɔeɛ ahyɛ wɔn ma tumi wia nneɛma, wɔde wɔn dibea gye nneɛma a wɔnni hokwan sɛ wɔnya, na ɛtɔ da mpo a, wɔwia sika. Ebinom nso de tumi a wɔwɔ no boa wɔn nnamfo ne wɔn mmusua berɛ a ɛnsɛ sɛ wɔyɛ saa.

Kɛtɛasehyɛ ne porɔeɛ tumi wurawura nnwumakuo ne mmeaeɛ foforɔ, na amammuo mu koraa deɛ yɛnka. Kuo bi taa yɛ nhwehwɛmu kyerɛ aman a kɛtɛasehyɛ ne porɔeɛ agye ntini wom ne baabi a ebi nni hɔ papa. (Transparency International) Afe 2013 no, wɔn nhwehwɛmu maa ɛdaa adi sɛ amanyɔkuo, polisifoɔ, aban mpanimfoɔ, mmarahyɛ badwafoɔ, ne atɛmmuo adwuma no paa na kɛtɛasehyɛ ne porɔeɛ adidi wɔn mu. (Global Corruption Barometer, 2013) Amanneɛbɔ a ɛdidi so yi ma yɛhu sɛnea kɛtɛasehyɛ ne porɔeɛ agye ntini.

• AFRIKA: Afe 2013 no, kɛtɛasehyɛ ne porɔeɛ nti, wɔbɔɔ aban mpanimfoɔ bɛyɛ 22,000 kwaadu wɔ South Africa.

• AMERIKA ANAFOƆ FAM: Afe 2012 no, wɔbuu nnipa 25 fɔ wɔ Brazil. Wɔde wɔn nsa bɔɔ aban sika mu kyekyɛ maa ɔmanfoɔ sɛnea ɛbɛyɛ a wɔbɛtaa aban no akyi. Wɔn mu baako mpo deɛ, na ɔyɛ Brazil mampanin no soafoɔ panin paa.

• ASIA: Afe 1995 mu no, sotɔɔ dan kɛseɛ bi dwiri guiɛ maa nnipa 502 wuiɛ. Asɛm no sii wɔ South Korea kuro Seoul mu. Nhwehwɛmufoɔ kyerɛ sɛ, kuro no mpanimfoɔ gyee braeb firii kɔntratafoɔ a wɔsii dan no hɔ. Ɛno nti, wɔyɛɛ nhwɛhaa ma wɔde nneɛma a ɛnyɛ papa na ɛsii dan no.

• EUROPE: “Sɛnea [kɛtɛasehyɛ ne porɔeɛ abu so wɔ Europe] no, wodwene ho a, wonte aseɛ.” Wei yɛ asɛm a ɔsoafoɔ a ɔhwɛ Europe afisɛm so, Cecilia Malmström kaeɛ. Ɔsan kaa sɛ: “Wonhu biribiara a ɛkyerɛ sɛ amanyɔfoɔ pɛ sɛ wɔtu kɛtɛasehyɛ ne porɔeɛ ase.”

Sɛnea kɛtɛasehyɛ ne porɔeɛ adidi amammuo mu nti, ama aseɛ tu ayɛ den. Ɔbenfoɔ Susan Rose-Ackerman yɛ obi a wasua sɛnea wɔtu kɛtɛasehyɛ ne porɔeɛ ase. Ɔtwerɛɛ sɛ, sɛ kɛtɛasehyɛ ne porɔeɛ ase bɛtu afiri amammuo mu a, “gye sɛ aban biara sesa ɔkwan a wɔfa so yɛ nneɛma koraa.” Wohwɛ a, wobɛka sɛ aban a kɛtɛasehyɛ ne porɔeɛ nnim deɛ yɛrennya bi da. Nanso Bible ma yɛhu sɛ aban a ɛte saa bɛba.