Onyankopɔn tie nnipa a wofi aman nyinaa mu. (Dwom 145:18, 19) N’Asɛm Bible hyɛ yɛn nkuran sɛ biribiara a ɛhaw yɛn no, yɛnka nkyerɛ no. (Filipifo 4:6, 7) Nanso mpaebɔ bi wɔ hɔ a Onyankopɔn ani nnye ho. Ebi ne sɛ wobɛkyere nsɛm bi agu wo tirim na wode ayɛ mpae a wobɔ no bere biara.—Kenkan Mateo 6:7.

Bio nso, nnipa a wɔhyɛ da bu Yehowa mmara so no, ɔmpɛ wɔn mpaebɔ atie. (Mmebusɛm 28:9) Tete hɔ no, Israelfo a na wodi awu no, Onyankopɔn antie wɔn mpaebɔ. Enti emu da hɔ paa sɛ, ɛsɛ sɛ yɛyɛ biribi ansa na Onyankopɔn atie yɛn mpaebɔ.—Kenkan Yesaia 1:15.

Sɛ yenni gyidi a, yɛrentumi mmɔ Onyankopɔn mpae. (Yakobo 1:5, 6) Ɛsɛ sɛ yegye di sɛ ɔwɔ hɔ na odwen yɛn ho. Sɛ yesua Bible a, ebetumi ama yɛn gyidi ayɛ den, efisɛ yɛka gyidi a, ɛkyerɛ adanse ne awerɛhyem a yenya fi Onyankopɔn Asɛm mu.—Kenkan Hebrifo 11:1, 6.

Sɛ yɛrebɔ mpae a, ɛsɛ sɛ yɛde ahobrɛase ka yɛn komam asɛm nyinaa. Onyankopɔn Ba Yesu mpo de ahobrɛase bɔɔ mpae. (Luka 22:41, 42) Enti ɛnsɛ sɛ yɛkyerɛ Onyankopɔn nea ɔnyɛ; mmom ɛsɛ sɛ yɛkenkan Bible na yehu nea ɔno mmom hwehwɛ fi yɛn hɔ. Sɛ yehu a, ɛnde yebetumi abɔ mpae ama ɛne n’apɛde ahyia.—Kenkan 1 Yohane 5:14.