Bible Tumi Sesa Nnipa

DƐN na ɔbarima bi a ofi Scotland hui sɛ ɛho hia koraa sen adwuma a sika wom? Dɛn na ɛboaa ɔbarima bi a ofi Brazil ma ogyaee brabɔne ne cocaine a ano yɛ den nom? Ɛyɛɛ dɛn na ɔbarima bi a ofi Slovenia tumi gyaee nsawe? Kenkan saa nnipa yi anom asɛm.

“Ɛte sɛnea na asetena rekɔ yiye ma me.”—JOHN RICKETTS

AFE A WƆWOO NO: 1958

ƆMAN A OFI MU: SCOTLAND

TEBEA A NA ƆWOM: OGUADINI A ƆWƆ SIKA

ME KAN ASETENA: Wɔwoo me too abusua a biribi wɔ wɔn nsam mu. Ná me papa yɛ Britain sraani panyin, enti na yɛn abusua taa di atutena. Scotland akyi no, baabi a yɛtenae nso ne England, Germany, Kenya, Malaysia, Ireland, ne Cyprus. Midii mfe awotwe no, mekɔɔ bɔɔden sukuu wɔ Scotland. Metoaa so kosii sɛ miwiee Cambridge Sukuupɔn.

Midii mfe 20 no, mifii ase dii fango gua. Mehyɛɛ ase yɛɛ saa adwuma no wɔ Amerika Anafo fam, na akyiri yi ɛde me kɔɔ Afrika, na afei mikopuee Australia Atɔe fam. Mitu kɔɔ Australia no, mehyehyɛɛ sikadwuma bi wɔ hɔ, nanso akyiri yi metɔnee.

Metɔnee no, minyaa sika kɛse, enti mekɔɔ pɛnhyen bere a na madi mfe 40. Mede bere pii a minyae no tutuu akwan. Mede moto tutuu akwan kɔɔ Australia nyinaa, na mikyinkyinii wiase nyinaa. Ɛte sɛnea na asetena rekɔ yiye ma me paa.

SƐNEA BIBLE NO SESAA M’ASETENA: Ansa na meregyae adwuma no mpo na merehwehwɛ ɔkwan bi a mɛfa so ada Onyankopɔn ase wɔ asetena a mewom no ho. Mifii ase kɔɔ Anglikan Asɔre a wɔwoo me too mu no. Nanso asɔre no ankyerɛkyerɛ Bible mu ahe biara. Afei me ne Mormon asɔrefo suaa ade, nanso na wɔmfa Bible no nyɛ adwuma enti migyaee.

Da koro Yehowa Adansefo bɛbɔɔ me pon mu. Me ne wɔn bɔɔ nkɔmmɔ no, ankyɛ koraa na mihui sɛ wɔde wɔn nsɛm nyinaa gyina Bible so. Kyerɛwsɛm biako a wɔkenkan kyerɛɛ me ne 1 Timoteo 2:3, 4. Saa nkyekyɛm no ka Onyankopɔn ho asɛm sɛ “ɔpɛ sɛ ogye nnipa ahorow nyinaa ma wobenya nokware no ho nimdeɛ a edi mũ.” M’ani gyei sɛ Adansefo no sii so dua sɛ ɛnyɛ nimdeɛ kɛkɛ na ehia na mmom nimdeɛ a edi mũ a efi Bible mu.

Bible a me ne Yehowa Adansefo suae no boaa me ma minyaa saa nimdeɛ a edi mũ no. Ɛho nhwɛso ne sɛ misua hui sɛ Onyankopɔn  ne Yesu nyɛ Baasakoro nworonworann biara. Mmom no, ɛsono wɔn mu biara. (Yohane 14:28; 1 Korintofo 11:3) M’ani gyei sɛ misuaa nokwasɛm a emu da hɔ no. Ɛyɛɛ me yaw nso sɛ mesɛee bere pii wɔ nkyerɛkyerɛ a ntease biara nnim no ho na ne nyinaa akyi no ammoa me!

Ankyɛ na mifii ase kɔɔ Yehowa Adansefo asafo nhyiam ahorow. Sɛnea na wɔn nyinaa pɛ nnipa na wɔbɔ bra pa no yɛɛ me fɛ paa. Wohwɛ a wobɛka sɛ gyama wonni mfomso mpo. Ɔdɔ kann a ɛwɔ wɔn ntam no ma mihui sɛ wɔn som no ne nokware som.—Yohane 13:35.

SƐNEA ABOA ME: M’asubɔ akyi no, mihyiaa ɔbea pa bi a wɔfrɛ no Diane. Yehowa Adansefo na wɔtetee no, na na ɔwɔ suban pa pii a m’ani gye ho. Akyiri yi, yɛwaree. Sɛnea Diane ne me atena kama na waboa me no de, ɛyɛ Yehowa nhyira paa.

Ɛbaa me ne Diane komam sɛ yebetu akɔ baabi a wohia asɛmpakafo pii akɔka Bible mu asɛm. Afe 2010 mu no, yetu kɔɔ Belize, Central America. Yɛkɔɔ hɔ no, yɛkaa asɛm no kyerɛɛ nkurɔfo a wɔdɔ Onyankopɔn na wɔn ani abere sɛ wobesua Bible.

Onyankopɔn ne n’Asɛm mu nokwasɛm a afei yɛahu no ama m’asom adwo me. Bere nyinaa som adwuma a mereyɛ no ama mede anigye akyerɛkyerɛ Bible mu akyerɛ nnipa bebree. Biribiara nni hɔ a ɛyɛ anigye sen sɛ wubehu sɛ Bible mu nokware resesa nkurɔfo asetena sɛnea ɛsesaa me de no. Afei de, manya ɔkwampa a mɛfa so ada Onyankopɔn ase wɔ asetena a mewom no ho.

“Wɔma mihui sɛ wodwen me ho.”—MAURÍCIO ARAÚJO

AFE A WƆWOO NO: 1967

ƆMAN A OFI MU: BRAZIL

TEBEA A NA ƆWOM: NÁ OBU BRABƆNE

ME KAN ASETENA: Avaré a ɛyɛ kurow ketewa bi a ɛwɔ São Paulo no, ɛhɔ na metena nyinii. Ɛhɔfo no yɛ awiɛmfoɔ.

Me papa wui bere a na me maame yem me. Meyɛ abarimaa no, sɛ me maame nni hɔ a, na mehyɛ ne ntade. Ná meyɛ me ho ɔbea-barima, na nkurɔfo fii ase kae sɛ me ne mmarima da. Akyiri yi, mifii ase ne mmarima mpanyimfo ne mmarimaa dae.

Minyin kakra no, na mehwehwɛ mmarima ne mmea a me ne wɔn bɛda wɔ baabiara a mɛkɔ—asanombea, anigyebea ne asɔredan mu mpo. Sɛ edu afahyɛ bere a sukuufo saw wɔ guabɔ ase no a, na misiesie me ho sɛ ɔbea kɔsaw bi. Ná nkurɔfo nim me paa.

Ná me nnamfo binom yɛ mmarima a wɔne mmarima da, ebinom nso yɛ tuutuufo, na na ebinom nso nom nnubɔne. Me nnamfo no binom piapiaa me ma menom cocaine a ano yɛ den, na eduu baabi no, na aka me hɔ. Ɛtɔ da bi a na yɛnom sigaret anadwo mu nyinaa. Ɛtɔ da bi nso a, metew me ho kɔnom cocaine da mu nyinaa. Mefɔnee ara maa eduu baabi no, na nkurɔfo rekeka sɛ manya AIDS.

 SƐNEA BIBLE NO SESAA M’ASETENA: Saa bere no ara mu na mihyiaa Yehowa Adansefo. Wɔma mihui sɛ wodwen me ho. Bible mu nsɛm a wɔkenkan kyerɛɛ me no biako ne Romafo 10:13, na ɛhɔ ka sɛ: “Obiara a ɔbɛbɔ Yehowa din afrɛ no no, wobegye no nkwa.” Saa asɛm no ma mihui paa sɛ ɛho hia sɛ mede Yehowa din yɛ adwuma. Mpɛn pii no, sɛ menom cocaine no anadwo mu nyinaa a, mibue me mpomma, na mema me ti so hwɛ soro de nusu bɔ Yehowa mpae sɛ ɔmmoa me.

Bere a mihui sɛ nnubɔne a mede resɛe me ho no ama me maame redi awerɛhow no, meyɛɛ m’adwene sɛ megyae. Ankyɛ pii na mepenee so maa Adansefo no ne me yɛɛ Bible adesua. Wɔma minyaa awerɛhyem sɛ adesua no bɛhyɛ me den ama matumi agyae nnubɔne no, na ɛboaa me nso!

Migu so resua Bible no, mihui sɛ ɛsɛ sɛ mesesa me suban. Ná ɛyɛ den paa sɛ megyae mmarima a me ne wɔn da no, efisɛ na mayɛ akyɛ. Nanso ade biako a ɛboaa me ne sɛ mesesaa nneɛma mu. Me ne me nnamfo dedaw no twaa mu, na migyaee asanombea ne anigyebea no kɔ.

Ɛwom sɛ na saa nsakrae no nyɛ mmerɛw de, nanso bere a mihui sɛ Yehowa dwen me ho na ɔte me ase no, ɛkyekyee me werɛ. (1 Yohane 3:19, 20) Eduu afe 2002 no, na magyae mmarima a me ne wɔn da no nyinaa, na saa afe no ara, wɔbɔɔ me asu ma mebɛyɛɛ Yehowa Dansefo.

SƐNEA ABOA ME: Nsakrae a meyɛe no, me maame ani gyee ho paa ma enti ɔno nso fii ase suaa Bible. Awerɛhosɛm ne sɛ, wayare ama ne fã adwudwo. Nanso, ɔdɔ a ɔwɔ ma Yehowa ne Bible mu nokware no gu so reyɛ kɛse.

Mfe awotwe a atwam ni no, mede me ho ahyɛ bere nyinaa som adwuma no mu, na mede me bere pii kyerɛkyerɛ nkurɔfo Bible. Nokwarem ni, ɛtɔ mmere bi a akɔnnɔ a ɛmfata tumi ba me mu. Nanso ade a ɛma me ahoɔden ne sɛ mehu sɛ saa akɔnnɔ no a memma ɛmfa me so no ma Yehowa ani gye me ho.

Bɛn a mabɛn Yehowa na mabɔ me bra ama asɔ n’ani no ama nkurɔfo bu me paa. Ɛnnɛ metumi aka sɛ mewɔ anigye.

“Ná meyɛ ɔwee mu ɔwee.”​—LUKA ŠUC

AFE A WƆWOO NO: 1975

ƆMAN A OFI MU: SLOVENIA

TEBEA A NA ƆWOM: NÁ ƆWE BOW

ME KAN ASETENA: Wɔwoo me wɔ Slovenia ahenkurow Ljubljana. Ná m’ani gye wɔ me mmofraase kosii sɛ midii mfe anan. Saa bere no, me papa kum ne ho. Awerɛhosɛm yi akyi no, na ɛsɛ sɛ me maame yɛ adwumaden paa na watumi ahwɛ me ne me nuabarima panyin.

Midii mfe 15 no, mitu kɔtenaa me nanabea nkyɛn. Mekɔɔ hɔ no, na mepɛ paa efisɛ na me nnamfo pii te  bɛn hɔ. Ɛhɔ nso, na wonsiw me kwan wɔ nneɛma pii mu te sɛ me maame hɔ. Midii mfe 16 no, mifii ase ne nkurɔfo a wɔwe nsa nnawɔtwe awiei biara bɔe. Migyaw me ti nhwi ma efuw yɛɛ tenten, na mifii ase siesiee me ho sɛ otuatewfo. Akyiri yi mifii ase nom sigaret.

Mesɔɔ nnubɔne pii hwɛe, nanso nsa na ɛsɔɔ me dɛ mu paa. Ahyɛase no, na menom nsa no nkakrankakra, nanso ewiee ase no, na mitumi nom boro akɔtoa biako. Sɛ menom bow sɛ dɛn ara mpo a, obi nhu. Ade a obi de behu sɛ manom nsa pii ara ne nsa a ɛbɔn me ho no. Ɛno mpo no, sɛ yɛka sɛ manom bobesa anaa bia ntoa pii atwa vodka aka ho a, obiara rennye nni!

Mpɛn pii no, sɛ yɛkɔ disko kɔnom nsa a, me na na meboa me nnamfonom ma wotumi nantew, nanso wobɛhwɛ no, na manom nsa no bebree koraa kyɛn wɔn. Da koro metee sɛ m’adamfo bi reka sɛ meyɛ ɔwee mu ɔwee, na Slovenia kasa mu no, sɛ wɔka biribi saa fa obi ho a ɛkyerɛ sɛ ɔwe mma obi nwe bi. Saa asɛm no yɛɛ me yaw paa.

Mifii ase dwen bra a merebɔ no ho. Mebɛtee nka sɛ mensɛ hwee. Minyaa adwene no sɛ biribiara a meyɛ wɔ asetena mu no nka hwee.

SƐNEA BIBLE NO SESAA M’ASETENA: Saa bere yi mihui sɛ obi a me ne no kɔɔ sukuu suban asesa ma wabɛyɛ obi a odwo. Ná me ho pere me sɛ mehu nea ama wasesa no, enti me ne no kɔtenaa baabi bɔɔ nkɔmmɔ. Ɔka kyerɛɛ me sɛ ɔne Yehowa Adansefo afi ase resua Bible. Ɔkaa nea wasua no bi kyerɛɛ me na na mentee bi da efisɛ na menkɔɔ asɔre biara da. Mifii ase kɔɔ Adansefo no asafo nhyiam no bi na wɔne me suaa Bible.

Bible a misuae no ama mahu nokwasɛm a tumi wom a ɛka koma. Ɛho nhwɛso ne sɛ, misuae sɛ yɛte bere a Bible frɛ no “nna a edi akyiri” mu. (2 Timoteo 3:1-5) Mihui nso sɛ Onyankopɔn beyi nnebɔneyɛfo afi asase so na wama nnipa pa atena asase so Paradise mu daa. (Dwom 37:29) Minyaa atenka wɔ me mu sɛ mɛsesa me suban na ama me nso mayɛ onipa pa anya asase no so atena.

Mifii ase kaa Bible mu nokware a meresua no bi kyerɛɛ me nnamfonom. Wɔn mu bebree dii nea meka kyerɛɛ wɔn no ho fɛw, nanso ɛboaa me ɔkwan bi so. Nea wɔyɛe no boaa me ma mihui sɛ wɔnyɛ nnamfo pa. Ɛbɛdaa adi sɛ nnipa a me ne wɔn bɔe no na na ɛma menom nsa. Nnawɔtwe no nyinaa, nea wɔda dwene ho ara ne sɛ nnawɔtwe awiei bɛba ama wɔakɔwe abow.

Me ne me nnamfonom no twaa mu na mefaa Yehowa Adansefo a wobetumi aboa me no nnamfo. Minyaa nkuranhyɛ pii fii Yehowa Adansefo no hɔ, efisɛ wɔyɛ nkurɔfo a wofi wɔn koma mu dɔ Onyankopɔn na wɔbɔ mmɔden sɛ wɔde ne mmara bɛbɔ wɔn bra. Nkakrankakra mitumi gyaee nsã a na mewe bow no.

SƐNEA ABOA ME: Meda Yehowa ase paa sɛ seesei ɛnyɛ nsã na ɛma m’ani gye. Sɛ mannyae abrabɔ a na mewom no a, minnim nea anka ɛbɛto me. Nanso afei de mahu sɛ mewɔ anigye.

Mfe ason a atwam ni no, manya hokwan resom wɔ Yehowa Adansefo adwumayɛbea a ɛwɔ Slovenia no. Yehowa a mahu no na meresom no no ama m’asetena ayɛ papa.