Hena Ne Abraham?
Hena Ne Abraham?
ONIPA biako a wiase nyamesomfo bu no kɛse ne Abraham. * Yudafo, Nkramofo ne Kristofo nyinaa bu no paa. Nkurɔfo taa ka ne ho asɛm sɛ ɔyɛ “onipa titiriw wɔ Kyerɛw Kronkron mu” na ebinom nso ka sɛ ɔyɛ “obi a wayɛ gyidi ho nhwɛso a edi mu kɛse.” Bible ka ne ho asɛm sɛ wɔn a “wɔwɔ gyidi nyinaa agya.”—Romafo 4:11.
Dɛn nti na nnipa pii bu Abraham saa? Ade biako ne sɛ, Abraham nkutoo na Bible ka no pen sɛ ɔyɛ Onyankopɔn adamfo.—Yesaia 41:8; Yakobo 2:23.
Nanso, na Abraham nyɛ onipa soronko; ná ɔte sɛ yɛn ara. Nsɛm a ɛtoto yɛn nnɛ no, ɛno ara bi na ɛtotoo no, nanso otumi gyinaa mu. Wopɛ sɛ wuhu nea ɛyɛe a otumi gyinaa mu no? Yɛnhwɛ nea Bible ka fa ɔbarima a ɔda nsow yi ho.
Abraham Nkyi ne Baabi a Ɔtenae
Wɔwoo Abraham wɔ Ur afe 2018 A.Y.B. (Genesis 11:27-31) Ná Ur yɛ kurow kɛse a edi yiye. Ná abosonsom nso agye ntini wɔ hɔ. Ebetumi aba sɛ na Abraham papa Tera nso som abosom no bi. (Yosua 24:2) Nanso, Abraham de, osii ne bo sɛ Yehowa * nkutoo na ɔbɛsom no sen sɛ ɔbɛsom anyame foforo a nkwa nni wɔn mu no.
Dɛn na ɛmaa Abraham sii ne bo sɛ ɔbɛsom Yehowa nkutoo? Wɔwoo Abraham no, edii mfe 150 ansa na Noa ba Sem rewu. Ebetumi aba sɛ Abraham ne ne nana Sem bɔe. Sɛ saa a, ɛnde dɛn na osua fii ne hɔ? Ebia Sem kaa Nsuyiri no ho asɛm kyerɛɛ Abraham ma ohuu sɛnea wonyaa wɔn ti didii mu. Ebetumi aba sɛ Sem sii so dua maa Abraham hui sɛ ɛho hia paa sɛ ɔsom Yehowa, Onyankopɔn a ɔkoraa Sem ne n’abusua nkwa so wɔ saa Nsuyiri no mu no.
Yɛrentumi nka no pi sɛ Sem na ɔkaa nokware Nyankopɔn no ho asɛm kyerɛɛ Abraham, nanso ɛmfa ho baabi a ɔte fii no, ɔde nea osuae no yɛɛ adwuma. Bere a Yehowa a “ɔhwehwɛ koma mu” no hwɛɛ Abraham no, ohuu adepa wɔ ne mu na ɔboaa no maa adepa a ɛwɔ ne mu no yɛɛ kɛse.—Mmebusɛm 17:3; 2 Beresosɛm 16:9.
Abraham Abrabɔ mu Nsɛm
Abraham dii nna pii, na n’abrabɔ nso sii no yiye. Ɛwom sɛ ohyiaa ɔhaw pii de, nanso na ɔwɔ akomatɔyam wɔ asetenam. Ma yɛnhwɛ n’asetena mu nsɛm kakra.
▪ Bere a na Abraham te Ur no, Onyankopɔn ka kyerɛɛ no sɛ ontu mfi ne man mu nkɔ asase a ɔno Onyankopɔn bɛkyerɛ no so. Ná Abraham ne Sara nnim baabi a wɔrekɔ ne nea enti a Onyankopɔn pɛ sɛ wotu, nanso wotiee no. Ntamadan mu na Abraham ne Sara tenae wɔ Kanaan asase so, na wɔn nkwa nna a aka nyinaa, wodii atutena.—Asomafo Nnwuma 7:2, 3; Hebrifo 11:8, 9, 13.
▪ Bere a na Abraham ne Sara nni ba mpo no, Yehowa hyɛɛ Abraham bɔ sɛ ɔbɛma ɔman kɛse afi ne mu aba. Yehowa san ka kyerɛɛ no sɛ asase so mmusua nyinaa nam ɔno Abraham so benya nhyira. (Genesis 11:30; 12:1-3) Akyiri yi, Yehowa san sii saa bɔhyɛ no so dua. Ɔka kyerɛɛ Abraham sɛ n’asefo bɛdɔɔso sɛ ɔsoro nsoromma.—Genesis 15:5, 6.
▪ Bere a Abraham nyaa mfe 99 na Sara nso reyɛ adi mfe 90 no, Yehowa hyɛɛ bɔ sɛ wɔbɛwo ɔbabarima. Nnipa ani so no, na ɛte sɛ nea ɛrentumi nyɛ yiye, nanso ankyɛ na Abraham ne Sara hui sɛ biribiara nni hɔ a ɛyɛ “den ma Yehowa.” (Genesis 18:14) Afe akyi no, Abraham woo ɔbabarima bere a na wanya mfe 100, na ɔtoo ne din Isak. (Genesis 17:21; 21:1-5) Onyankopɔn bɔɔ Isak din hyɛɛ bɔ sɛ, adesamma nam no so benya nhyira pii.
▪ Mfe bi akyi no, Yehowa ka kyerɛɛ Abraham sɛ ɔnyɛ biribi a sɛ obiara te a ɛbɛyɛ no nwonwa paa: Ɔka kyerɛɛ Abraham sɛ ɔmfa ne bakoro Isak a ɔdɔ no no mmɔ afɔre mma no. Saa bere no nso, na ne ba no nnya nware nwoo mma. * Wutumi hu sɛ na ɛbɛyɛ Abraham yaw sɛ ɔrebɛhwere ne ba no, nanso osiim sɛ ɔde Isak rekɔbɔ afɔre. Ná Abraham gye di paa sɛ Onyankopɔn betumi anyan Isak afi awufo mu ama ne bɔhyɛ aba mu. (Hebrifo 11:19) Abraham yɛe sɛ ɔrebekum Isak no ara pɛ, Onyankopɔn kae sɛ onnyae, enti wannya ankum Isak. Ɔkamfoo Abraham sɛ otumi tiee no saa. Ná Yehowa ahyɛ Abraham bɔ dedaw, na ɔsan sii so dua.—Genesis 22:1-18.
▪ Abraham dii mfe 175 ansa na ɔrewu. Bible ka sɛ owui a na “wanyin abɔ akora,” na ɛsan ka sɛ na “nna amee no.” (Genesis 25:7, 8) Enti Onyankopɔn bɔhyɛ foforo baa mu maa Abraham, efisɛ na Onyankopɔn aka akyerɛ no sɛ obedi nna pii na wawu asomdwoe mu.—Genesis 15:15.
Nea Abraham De Agyaw Yɛn
Abraham nyɛ tete nyamesomni bi kɛkɛ. Ɛnnɛ yi nyinaa nnipa werɛ mfii no, efisɛ wayɛ nhwɛso a ehia sɛ yɛn mu biara sua biribi fi mu. (Hebrifo 11:8-10, 17-19) Momma yensusuw su pa a Abraham daa no adi no anan ho. Ne su a yebedi kan aka ho asɛm ne nea nkurɔfo nim no yiye no—gyidi.
[Ase hɔ nsɛm]
^ nky. 2 Bere bi, na wɔfrɛ Abraham sɛ Abram na na wɔfrɛ ne yere nso Sarai. Akyiri yi Onyankopɔn sesaa Abram din yɛɛ no Abraham a ɛkyerɛ “Dodow Agya.” Ɔsesaa Sarai nso din frɛɛ no Sara a ɛkyerɛ “Ɔhemmaa.” (Genesis 17:5, 15) Nea ɛbɛma nneɛma mu ada hɔ no, yɛbɛfrɛ wɔn Abraham ne Sara wɔ Ɔwɛn-Aban yi mu.
^ nky. 6 Bible ma yehu sɛ Yehowa yɛ Onyankopɔn din.
^ nky. 14 Hwɛ asɛm a ɛwɔ nsɛmma nhoma yi kratafa 23 a yɛato din “Nsɛm a Akenkanfo Bisa . . . Adɛn Nti na Onyankopɔn Ka Kyerɛɛ Abraham sɛ Ɔmfa Ne Ba Mmɔ Afɔre?”
[Adaka wɔ kratafa 4]
Ɔbɛyɛɛ Onipa Titiriw Wɔ Bible Abakɔsɛm Mu
Sɛ wokenkan Bible a, wubehu sɛ Genesis ti 1 kosi 10 no ka gyidifo pii ho asɛm; wɔn mu bi ne Habel, Henok, ne Noa. Eti 11 kosi 25 no de, ɔbarima biako na ɛka ne ho asɛm kɛse—Abraham.
Afei nso nsɛntitiriw pii wɔ Bible mu a Abraham na wodii kan ka kyerɛɛ no anaasɛ ɔno na na ɛfa ne ho. Ɛho nhwɛso na edidi so yi:
▪ Bere a edi kan a wɔkaa Onyankopɔn ho asɛm sɛ ɔyɛ Kyɛm anaa obi a ɔbɔ n’asomfo ho ban no, Abraham na wɔka kyerɛɛ no.—Genesis 15:1; hwɛ Deuteronomium 33:29; Dwom 115:9; Mmebusɛm 30:5.
▪ Bere a edi kan a wɔkaa Onyankopɔn mu gyidi ho asɛm no, na ɛfa Abraham ho.—Genesis 15:6.
▪ Bere a edi kan a wɔde asɛmfua odiyifo dii dwuma no, Abraham na wɔde frɛɛ no.—Genesis 20:7.
▪ Bere a edi kan a wɔkaa ɔdɔ a ɔwofo wɔ ma ne ba ho asɛm no, na ɛfa Abraham ho.—Genesis 22:2.
