So Ɛsɛ sɛ Mmofra Sua Onyankopɔn Ho Asɛm?

“Yɛwɔ ɔsom a ɛdɔɔso sɛnea ɛsɛ a ɛbɛma yɛatan afoforo, nanso yenni nea ɛdɔɔso sɛnea ɛsɛ a ɛbɛma yɛadodɔ yɛn ho yɛn ho.”—JONATHAN SWIFT, ENGLAND NHOMA KYERƐWFO.

SWIFT kaa saa asɛm no wɔ afeha a ɛto so 18 mu, nanso nnipa a wɔwɔ hɔ nnɛ no pii ne no yɛ adwene. Nokwasɛm ne sɛ, ebinom susuw sɛ ɛnsɛ sɛ wɔma awofo kwan ma wɔkyerɛkyerɛ wɔn mma Onyankopɔn ho asɛm. Wɔte nka sɛ wɔaka mmofra a wɔtete wɔn wɔ mmusua a emufo yɛ nyamesomfo mu no ahyɛ.

Wususuw ho dɛn? Nsɛm a edidi so yi mu nea ɛwɔ he na ɛtɔ asom paa?

● Ɛnsɛ sɛ wɔma awofo kwan ma wɔkyerɛkyerɛ wɔn mma Onyankopɔn ho asɛm.

● Ɛsɛ sɛ awofo twɛn ma wɔn mma nnyinyin ansa na wɔne wɔn abɔ nyamesom ho nkɔmmɔ.

● Bere a mmofra no susua no na ɛsɛ sɛ awofo de nea wogye di wɔ Onyankopɔn ho no kyerɛkyerɛ wɔn. Nanso bere a mmofra renyin no, ɛsɛ sɛ awofo hyɛ wɔn nkuran ma wɔn ankasa susuw asɛm no ho.

● Ɛsɛ sɛ mmofra gye nea wɔn awofo gye di wɔ Onyankopɔn ho no tom ɔkwan biara so.

So Nyamesom Pira Mmofra?

Ɔwofo biara nni hɔ a odwen ne ba ho a ɔbɛpɛ sɛ opira no. Nanso so nokwasɛm yi foa wɔn a wɔkyerɛ sɛ ɛnsɛ sɛ yɛma mmofra sua Onyankopɔn ho asɛm no asɛm so? Mfe pii ni na nhwehwɛmufo abɔ mmɔden asua nkɛntɛnso a awofo som mu gyidi tumi nya wɔ mmofra so no ho asɛm. Dɛn na wɔahu?

Nhwehwɛmufo abehu sɛ sɛ anka nyamesom bepira mmofra no, ebetumi anya wɔn so nkɛntɛnso pa mmom. Wɔ afe 2008 mu no, amanneɛbɔ bi a wotintimii wɔ Social Science Research * mu no kae sɛ: “Abɛda adi sɛ nyamesom boa ma abusuabɔ a ɛda awofo ne mmofra ntam no mu yɛ den.” Amanneɛbɔ no kae nso sɛ: “Ɛda adi sɛ nyamesom ne abusuabɔ a mmofra ne Onyankopɔn benya no ho hia wɔ wɔn mu pii asetena mu, na ɛka mmusua bom.” Hyɛ sɛnea eyi ne asɛm a Yesu Kristo kae no di nsɛ no nsow: “Anigye ne wɔn a wonim wɔn honhom mu ahiade.”—Mateo 5:3.

Na ka a wɔka sɛ ɛsɛ sɛ wɔma mmofra nnyinyin ansa na wɔasua Onyankopɔn ne nyamesom ho ade no nso ɛ? Saa adwene no ne nokwasɛm yi nhyia: Abofra adwene te sɛ bokiti a hwee nnim. Nokwasɛm ne sɛ, ɛsɛ sɛ awofo yɛ ho biribi; sɛ́ ebia wɔde abrabɔ gyinapɛn ne gyidi ahorow a wosusuw sɛ ɛfata bɛhyɛ saa “bokiti” no mu ma wɔ fie, anaasɛ wɔbɛma kwan ma nkurɔfo a wonnim wɔn de wɔn nsusuwii bebrebe no ahyɛ mmofra no adwene ne wɔn komam ma.

Dɛn na Ɛbɛboa?

Abakɔsɛm ada no adi sɛ nyamesom betumi ama nnipa anya afoforo ho ɔtan ne adwemmɔne. Ɛnde ɛbɛyɛ dɛn na awofo atumi akwati nea afi nyamesom mu aba sɛnea Jonathan Swift kae no? Wɔbɛyɛ dɛn de wɔn gyidi akyerɛkyerɛ wɔn mma ma wɔadɔ afoforo?

Nea ɛbɛboa ne sɛ yebenya nsɛmmisa abiɛsa yi ho mmuae: (1) Dɛn na ɛsɛ sɛ mmofra sua? (2) Hena na ɛsɛ sɛ ɔkyerɛkyerɛ wɔn? (3) Akwan a wɔfa so kyerɛkyerɛ no mu nea ɛwɔ he na etu mpɔn paa?

[Ase hɔ asɛm]