Dɛn Nti na Aware Pii Resɛe?

“Farisifo baa [Yesu] nkyɛn a na wɔn adwene ne sɛ wɔrebɛsɔ no ahwɛ, na wɔkae sɛ: ‘Mmara ma kwan sɛ asɛm biara nti ɔbarima gyaa ne yere?’”—Mateo 19:3.

YESU bere sofo no binom bisaa Yesu sɛ ebia ɛfata sɛ wogyaa aware anaa. Yesu buaa wɔn sɛ: “Monkenkanee sɛ onii a ɔbɔɔ wɔn no yɛɛ wɔn ɔbarima ne ɔbea fii mfiase, na ɔkae sɛ, ‘Eyi nti na ɔbarima begyaw ne papa ne ne maame hɔ na wakɔfam ne yere ho, na wɔn baanu no ayɛ ɔhonam koro’? Enti wɔnyɛ baanu bio, na mmom ɔhonam koro. Enti nea Onyankopɔn aka abom no, mma onipa biara nntetew mu.” * (Mateo 19:4-6) Ɛda adi sɛ, ná Onyankopɔn mpɛ sɛ aware begu.

Ɛnnɛ, wɔ aman pii so no, aware ɔha biara mu 40 anaa nea ɛboro saa mu ‘tetew,’ na ekowie awaregyae mu. So Bible afotu a ɛfa aware ho no atwam anaa ɛnyɛ adwuma bio? So ebetumi aba sɛ aware nhyehyɛe no na asɛm wɔ ho anaasɛ annya nhyɛase pa?

Susuw mfatoho yi ho hwɛ: Awarefo baanu bi kɔtɔɔ kar abien a ne nyinaa yɛ ade koro. Awarefo no mu biako hwɛɛ wɔn kar no yiye na wɔanka no basabasa. Eyi nti wɔn kar no ansɛe. Nanso awarefo a aka no annya bere anhwɛ wɔn kar no yiye, na na wɔka no basabasa. Saa kar no sɛee, ma wogyaw sii hɔ. Ɛyɛɛ dɛn na awarefo a wɔto so abien no kar no sɛee?—mfomso no fi kar no anaa awarefo no? Ɛda adi pefee sɛ, sɛ́ kar bɛsɛe anaa ɛrensɛe no gyina wɔn a wɔtɔɔ kar no so.

Saa ara na aware pii a egu no nkyerɛ sɛ nea ɔhyehyɛɛ aware no na wanhyehyɛ no yiye. Aware ɔpepem pii a atumi agyina no kyerɛ sɛ ɛnte saa. Aware a etumi gyina no ma nnipa afoforo ne mmusua ne ɔmanfo nya anigye ne ahotɔ. Nanso aware te sɛ kar, sɛ wopɛ sɛ ɛkyɛ a, ehia sɛ wohwɛ so yiye na wusiesie no bere nyinaa.

Sɛ́ wowaree akyɛ anaa ɛnkyɛe no, Bible afotu betumi ama w’aware agyina. Hyɛ nsɛm bi nsow wɔ nsɛm a edidi so no mu.

[Ase hɔ asɛm]