Bɛn Onyankopɔn

Yehowa Ma Yɛpaw Nea Yɛpɛ

Deuteronomium 30:11-20

KRISTONI bea bi a ohyiaa nsɛnnennen wɔ ne mmofraase no susuw sɛ tebea a ɔfaa mu nti, ɔrentumi nyɛ nea Onyankopɔn pɛ da. Ɔka sɛ: “Mpɛn pii na mahaw me ho asusuw sɛ merentumi nni Yehowa nokware.” So saa na ɛte ampa? So ɛyɛ ampa sɛ nsɛnnennen a yɛahyia wɔ asetena mu pɛn no betumi asɛe yɛne Onyankopɔn ntam? Dabi. Yehowa Nyankopɔn de yɛn pɛ ama yɛn, enti yebetumi afi yɛn pɛ mu apaw sɛnea yɛbɛbɔ yɛn bra. Yehowa pɛ sɛ yɛpaw nea eye, na n’Asɛm Bible no kyerɛ yɛn sɛnea yebetumi ayɛ saa. Susuw Mose nsɛm a ɛwɔ Deuteronomium ti 30 no ho hwɛ.

So ɛyɛ den sɛ yebehu nea Onyankopɔn hwehwɛ fi yɛn hɔ na yɛayɛ n’apɛde? * Mose kae sɛ: “Mmara a mede rema wo nnɛ yi nyɛ den dodo mma wo na enni akyiri nso.” (Nkyekyɛm 11) Yehowa nhwehwɛ nea yɛrentumi nyɛ mfi yɛn hɔ. Nea ɔhwehwɛ fi yɛn hɔ no mmoro yɛn so, na ɛnyɛ den dodo. Afei nso, ɛnyɛ den sɛ yebehu. Ɛho nhia sɛ yɛforo ‘kɔ soro’ anaa yetwa ‘kɔ po agya’ ansa na yɛahu nea Onyankopɔn hwehwɛ fi yɛn hɔ. (Nkyekyɛm 12, 13) Bible no kyerɛ yɛn sɛnea ɛsɛ sɛ yɛbɔ yɛn bra pefee.—Mika 6:8.

Nanso, Yehowa nhyɛ yɛn sɛ yentie no. Mose kae sɛ: “Mede nkwa ne papa, owu ne bɔne asi w’anim.” (Nkyekyɛm 15) Yɛwɔ hokwan sɛ yɛpaw nkwa anaa owu, papa anaa bɔne. Yebetumi apaw sɛ yɛbɛsom Onyankopɔn, ayɛ nea ɔpɛ, na yɛanya nhyira, anaasɛ yɛbɛyɛ ne so asoɔden na yɛanya ɛho asotwe. Yɛwɔ hokwan sɛ yɛpaw emu biara a yɛpɛ.​—Nkyekyɛm 16-18; Galatifo 6:7, 8.

So nea yɛbɛpaw no ho hia Yehowa? Yiw, ɛho hia no paa! Onyankopɔn honhom kaa Mose ma ɔkae sɛ: “Fa nkwa.” (Nkyekyɛm 19) Ɛnde, yɛbɛyɛ dɛn apaw nkwa? Mose kyerɛkyerɛɛ mu sɛ: “Dɔ Yehowa wo Nyankopɔn na tie n’asɛm na fa wo ho fam ne ho.” (Nkyekyɛm 20) Sɛ yenya ɔdɔ ma Yehowa a, yɛbɛyɛ osetie ama no, na yɛde yɛn ho bɛfam ne ho ɛmfa ho nea ebesi biara. Sɛ yɛyɛ yɛn ade saa a, na yɛapaw nkwa—asetena pa a ɛsen biara a anidaso wom sɛ yebenya daa nkwa wɔ Onyankopɔn wiase foforo a ɛreba no mu.—2 Petro 3:11-13; 1 Yohane 5:3.

Mose nsɛm no ma yenya nokwasɛm bi mu awerɛhyem. Ɛmfa ho tebea biara a ebia woahyia wɔ wiase bɔne yi mu no, wubetumi ne Onyankopɔn ntam ayɛ papa; saa ara nso na wubetumi ayɛ nea ɔpɛ. Yehowa adi wo ni, na ɔde wo pɛ ama wo. Nokwarem no, wubetumi apaw sɛ wobɛdɔ Yehowa, atie no, na woakɔ so adi no nokware. Sɛ wopaw sɛ wobɛyɛ nea Yehowa pɛ a, wo brɛ renyɛ kwa.

Hokwan a yɛanya sɛ yɛbɛpaw nea yɛpɛ, na yɛadɔ Yehowa, na yɛasom no no kyekyee ɔbea a yɛadi kan aka ne ho asɛm no were. Ɔkae sɛ: “Medɔ Yehowa paa. Ɛtɔ mmere bi a, me were fi sɛ mɛkae nokwasɛm a ɛne sɛ medɔ Yehowa no. Eyi nti, metumi adi no nokware.” Ɛdenam Yehowa mmoa so no, wo nso wubetumi adi no nokware.—w09-E 11/1.

[Ase hɔ asɛm]