Dɛn ne Honhom Kronkron?

BERE bi Yesu bisaa n’asuafo no sɛ: “Mo mu hena koraa na ɔyɛ agya a sɛ ne ba bisa no apataa a, ɔde ɔwɔ bɛhyɛ ne nsam na ɔremma no apataa? Anaasɛ sɛ obisa kesua nso a, ɔde akekantwɛre bɛhyɛ ne nsam?” (Luka 11:11, 12) Ná mmofra a wɔwɔ Galilea no pɛ kesua ne apataa paa; na na wotumi kyerɛ nea wobedi.

Yesu kae sɛ, ɛsɛ sɛ yɛkɔ so bisa honhom kronkron no te sɛ abofra a ɔkɔm de no a ɔrepɛ aduan adi. (Luka 11:9, 13) Sɛ yehu sɛnea honhom kronkron no te a, ɛbɛboa yɛn ma yɛate dwuma a ebetumi adi wɔ yɛn asetena mu no ase. Enti momma yenni kan nhwehwɛ nea Bible no kyerɛkyerɛ wɔ honhom kronkron ho no mu.

“Ɔsorosoroni no Tumi”

Kyerɛwnsɛm no ma emu da hɔ pefee sɛ honhom kronkron yɛ tumi a Onyankopɔn de di n’atirimpɔw ho dwuma. Bere a ɔbɔfo Gabriel bɔɔ Maria amanneɛ sɛ ɔbɛwo ɔbabarima ɛmfa ho sɛ ɔyɛ ɔbaabun no, Gabriel kae sɛ: “Honhom kronkron bɛba wo so, na Ɔsorosoroni no tumi bɛkata wo so. Ɛno nso nti na wɔbɛfrɛ nea wobɛwo no no kronkron, Onyankopɔn Ba.” (Luka 1:35) Sɛnea Gabriel kyerɛe no, abusuabɔ bi da honhom kronkron ne “Ɔsorosoroni no tumi” ntam.

Adwene a ɛte saa pue wɔ baabi foforo wɔ Bible no mu. Odiyifo Mika kae sɛ: “Yehowa honhom nti, tumi . . . ahyɛ me mã.” (Mika 3:8) Yesu hyɛɛ n’asuafo no bɔ sɛ: “Sɛ honhom kronkron no ba mo so a mubenya tumi.” (Asomafo Nnwuma 1:8) Ɔsomafo Paulo nso kaa “honhom kronkron tumi” ho asɛm.—Romafo 15:13, 19.

Ɛnde, dɛn na yɛbɛka wɔ asɛm yi ho? Honhom kronkron no ne Onyankopɔn tumi wɔ abusuabɔ titiriw bi. Yehowa nam honhom kronkron so da ne tumi adi. Ne tiaa mu no, honhom kronkron yɛ Onyankopɔn tumi a ɔde yɛ adwuma, anaa n’adeyɛ tumi. Tumi a ɛkyɛn so bɛn ara ni! Yɛrentumi nte tumi a na ebegye ansa na wɔabɔ amansan yi nyinaa no ase nwie da. Yehowa nam odiyifo Yesaia so hyɛɛ yɛn nkuran sɛ yensusuw nea edidi so yi ho: “Momma mo ani so nhwɛ soro. Hena na ɔbɔɔ eyinom nyinaa? Ɔno na obu wɔn asafodɔm ano yi wɔn adi, na ɔbobɔ wɔn nyinaa din frɛfrɛ wɔn. Na n’ahoɔden dodow ne ne tumi mmoroso nti, wɔn mu biako mpo nyera.”—Yesaia 40:26.

Enti Bible no kyerɛ sɛ, amansan yi ne emu nneɛma a ɛyɛ adwuma pɛpɛɛpɛ no nyinaa nam Onyankopɔn “ahoɔden” anaa ade nyinaa so Tumfoɔ Nyankopɔn no tumi so na ɛbae. Ɛda adi sɛ, Onyankopɔn adeyɛ tumi no nni ano, na ɛnam so na yɛte nkwa mu.​—Hwɛ adaka, “Dwuma a Honhom Kronkron Di.”

Yehowa betumi de ne honhom kronkron ayɛ adwuma kɛse te sɛ nea ɔde bɔɔ amansan yi no. Nanso obetumi de adi dwuma aboa nnipa. Nhwɛso bebree wɔ Bible no mu a  ɛkyerɛ sɛnea Onyankopɔn maa ne nkoa a wɔwɔ asase so no tumi.

“Yehowa Honhom wɔ Me So”

Yesu som adwuma no ma yehu sɛnea Onyankopɔn betumi de ne honhom kronkron no aboa n’asomfo. Yesu ka kyerɛɛ Nasaretfo sɛ: “Yehowa honhom wɔ me so.” (Luka 4:18) Ɔkwan bɛn so na Yesu nyaa “honhom no tumi” no so mfaso. (Luka 4:14) Ɔsaa nyarewa nyinaa bi, ɔmaa po asorɔkye yɛɛ dinn, ɔde paanoo kakraa bi ne apataa maa nnipa mpempem pii ma wodii, na onyanee awufo mpo. Ɔsomafo Petro kaa Yesu ho asɛm sɛ ‘ɔbarima a Onyankopɔn afa anwonwade ne nsɛnkyerɛnne a ɔnam no so  yɛe so ayi no adi akyerɛ pefee.’​—Asomafo Nnwuma 2:22.

Seesei, honhom kronkron no nyɛ anwonwade a ɛte saa. Nanso, ebetumi ayɛ nneɛma pii ama yɛn. Yehowa fi ne pɛ mu de ne honhom kronkron no ma wɔn a wɔsom no, sɛnea Yesu hyɛɛ n’asuafo no bɔ no. (Luka 11:13) Enti, na ɔsomafo Paulo betumi aka ma afata sɛ: “Ade nyinaa mu mewɔ ahoɔden, nea ɔhyɛ me den no nti.” (Filipifo 4:13) So honhom kronkron betumi adi dwuma a ɛte saa ara wɔ w’asetena mu? Asɛm a edi hɔ no bɛkyerɛkyerɛ saa asɛmmisa no mu.

[Adaka/​Mfonini wɔ kratafa 5]

Nea enti a honhom kronkron no nyɛ onipa

Bible de honhom kronkron toto nsu ho. Bere a Onyankopɔn rehyɛ ne nkurɔfo bɔ wɔ nhyira a wobenya daakye ho no, ɔkae sɛ: “Mehwie nsu agu nea osukɔm de no so, na nsuwansuwa asen asase kesee so. Mehwie me honhom agu w’asefo so na mede me nhyira agu wo nkyirimma so.”​—Yesaia 44:3.

Sɛ Onyankopɔn hwie ne honhom gu n’asomfo so a, ‘honhom kronkron hyɛ wɔn mã,’ anaa ‘honhom kronkron yɛ wɔn mã.’ Wɔka Yesu, Yohane Suboni, Petro, Paulo, Barnaba, ne asuafo a na wɔahyiam wɔ Pentekoste afe 33 wɔ Yesu awo akyi no ho asɛm sɛ, honhom kronkron yɛɛ wɔn mã, anaa ɛhyɛɛ wɔn mã.​—Luka 1:15; 4:1; Asomafo Nnwuma 4:8; 9:17; 11:22, 24; 13:9.

Susuw eyi ho hwɛ: So wobetumi ‘ahwie’ onipa bi agu nnipa afoforo pii so? So wubetumi aka sɛ onipa biako betumi ‘ahyɛ’ nnipakuw bi ‘mã’? Ntease nni eyi mu. Bible ka nnipa a nyansa, ntease, anaa nokware nimdeɛ ahyɛ wɔn mã ho asɛm, nanso ɛnka da sɛ wɔde onipa bi ahyɛ onipa foforo mã.​—Exodus 28:3; 1 Ahene 7:14; Luka 2:40; Kolosefo 1:9.

Hela asɛmfua pneuʹma, a wɔkyerɛɛ ase “honhom” no san kyerɛ tumi a aniwa ntumi nhu. Sɛnea nhoma bi kyerɛ no, nea asɛmfua pneuʹma “kyerɛ ankasa ne mframa . . . ɔhome; titiriw honhom a ɛte sɛ mframa, ade a aniwa ntumi nhu, wontumi nso mu, na ɛwɔ ahoɔden.”​—Vine’s Expository Dictionary of New Testament Words.

Enti, ɛda adi pefee sɛ honhom no nyɛ onipa. *

[Ase hɔ asɛm]

[Asɛm Fibea wɔ kratafa 5]

Photodisc/SuperStock