Bɛn Onyankopɔn

“Awerɛkyekye Nyinaa Nyankopɔn”

2 Korintofo 1:3, 4

NNEƐMA pii te sɛ amanehunu, huammɔdi, ne ankonamyɛ betumi ama yɛn werɛ ahow, na mpo yɛapa abaw. Wɔ mmere a ɛte saa mu no, ebia wubebisa sɛ, ‘Ɛhe na metumi anya mmoa?’ Ɔsomafo Paulo nsɛm a ɛwɔ 2 Korintofo 1:3, 4 no ma yehu obi a obetumi akyekye yɛn werɛ bere nyinaa—Yehowa Nyankopɔn.

Wɔ nkyekyɛm 3 no, wɔfrɛ Onyankopɔn sɛ “ahummɔbɔ Agya.” Dɛn na ɛno kyerɛ? Hela asɛmfua a wɔkyerɛɛ ase “ahummɔbɔ” no betumi akyerɛ atenka a obi nya ma afoforo a wɔrehu amane. * Nhoma bi a ɛkyerɛkyerɛ Bible mu ka sɛ, wobetumi akyerɛ asɛmfua yi ase sɛ “ayamhyehye” anaa “sɛ́ obi dwen obi ho yiye.” “Ahummɔbɔ” a Onyankopɔn wɔ na ɛka no ma ɔyɛ ade. Akyinnye biara nni ho sɛ Onyankopɔn su yi a yɛabehu nti na ɛma yɛpɛ sɛ yɛbɛn no, so ɛnte saa?

Paulo san frɛ Yehowa sɛ “awerɛkyekye nyinaa Nyankopɔn.” Asɛmfua a Paulo de dii dwuma wɔ ha no “kura adwene a ɛne sɛ worekyekye obi a wahaw anaa ne werɛ ahow werɛ, na ɛkyerɛ mmoa a wɔde ma obi anaa nkuranhyɛ.” The Interpreter’s Bible kyerɛkyerɛ mu sɛ: “Yɛkyekye obi a ɔrehu amane werɛ a, yɛma onya akokoduru a ɔde begyina ne haw ano.”

Ebia wubebisa sɛ, ‘Ɔkwan bɛn so na Onyankopɔn kyekye yɛn werɛ na ɔma yɛn akokoduru a yɛde gyina yaw a yedi ano?’ N’Asɛm Bible no, ne hokwan a yɛwɔ sɛ yɛbɔ mpae no yɛ akwan titiriw a ɔnam so yɛ saa. Paulo ka kyerɛ yɛn sɛ Onyankopɔn fi ɔdɔ mu ma yɛn n’Asɛm sɛnea ɛbɛyɛ a ‘yɛnam Kyerɛwnsɛm no mu awerɛkyekye so benya anidaso.’ Bio nso, yɛnam mpae a yefi komam bɔ so nya “Nyankopɔn asomdwoe a ɛboro adwene nyinaa so no” bi.—Romafo 15:4; Filipifo 4:7.

Nneɛma bɛn mu na Yehowa kyekye ne nkurɔfo werɛ? Paulo kae sɛ Onyankopɔn ‘kyekye yɛn werɛ yɛn ahohiahia nyinaa mu.’ (2 Korintofo 1:4) Ɛmfa ho nhyɛso, ahokyere, anaa amanehunu a ebia yɛrefa mu no, Onyankopɔn ma yenya akokoduru ne ahoɔden a ɛsɛ ma yɛde gyina ano. So eyi nyɛ awerɛkyekyesɛm?

Ɛnyɛ onipa a Onyankopɔn kyekye ne werɛ no nko na onya so mfaso. Paulo kɔ so ka sɛ Onyankopɔn kyekye yɛn werɛ sɛnea ɛbɛyɛ na “yɛn nso, esiane awerɛkyekye yi a yenya fi Nyankopɔn hɔ nti, yebetumi akyekye wɔn a wɔwɔ ahohiahia biara mu no werɛ.” Bere a wɔakyekye yɛn werɛ wɔ yɛn ahohia mu no, ɛboa yɛn ma yenya tema ma afoforo, na ɛka yɛn ma yɛboa wɔn a wɔwɔ ahokyere mu no.

Sɛ́ “awerɛkyekye nyinaa Nyankopɔn” no, ɛnyɛ bere nyinaa na Yehowa beyi yɛn haw anaa yaw a yedi no afi hɔ. Nanso yebetumi anya awerɛhyem sɛ: Sɛ yɛma ɔkyekye yɛn werɛ a, obetumi ahyɛ yɛn den ma yɛagyina awerɛhow anaa ɔhaw biara a ebia yebehyia wɔ asetra mu no ano. Akyinnye biara nni ho sɛ ɛfata sɛ yɛsom Onyankopɔn a ɔwɔ ayamhyehye saa no, na yeyi no ayɛ.

[Ase hɔ asɛm]