So Adannandi Ne Bible No Hyia?

ƐYƐ ampa sɛ Onyankopɔn maa nnipa fii mmoa mu na wɔbae? So Onyankopɔn maa mmoawa bi danee mpataa, ɛnna mpataa no nso danee mmoa a wɔwea ne nufummoa, ɛnna wɔn nso bɛyɛɛ nkontromfi ma nnipa fi wɔn mu bae? Nyansahufo ne nyamesom akannifo binom kyerɛ sɛ wogye adannandi ne Bible no nyinaa di. Wɔka sɛ Bible mu nhoma a ɛne Genesis no yɛ ayɛsɛm. Ebia woabisa wo ho sɛ, ‘Adwene a ɛne sɛ nnipa fi mmoa mu na wɔbae no ne Bible no hyia anaa?’

Sɛ yehu nea ɛyɛe a yɛbae a, ɛbɛboa yɛn ma yɛate nnipa ko a yɛyɛ, baabi a yɛrekɔ, ne sɛnea ɛsɛ sɛ yɛbɔ yɛn bra ase. Sɛ yehu nea ɛyɛe a nnipa bae nkutoo a na yebetumi ate nea enti a Onyankopɔn ama amanehunu ho kwan ne nea ɔbɛyɛ ama nnipa daakye no ase. Sɛ yennye nni sɛ Onyankopɔn ne yɛn Bɔfo a, yɛrentumi ne no nnya abusuabɔ pa. Enti ma yensusuw nea Bible ka wɔ nea ɛyɛe a nnipa bae, tebea a wɔwɔ mu nnɛ, ne nea ɛwɔ hɔ ma wɔn daakye ho. Ɛno akyi no, yɛbɛhwɛ sɛ adannandi nkyerɛkyerɛ no ne Bible hyia anaa.

Bere a na Onipa Baako Pɛ wɔ Hɔ

Wɔn a wogye adannandi di no taa ka sɛ mmoa pii na wɔsakrasakrae bɛyɛɛ nnipa pii, na wonnye ntom sɛ bere bi na onipa baako pɛ na ɔwɔ hɔ. Nanso Bible ka asɛm foforo koraa. Ɛka sɛ yefi onipa baako, Adam mu. Bible ka sɛ Adam yɛ onipa ankasa a ɔtraa ase. Ɛbobɔ ne yere ne ne mma binom din. Ɛka nea ɔyɛe, nea ɔkae, bere a ɔtraa ase, ne bere a owui ho nsɛm pii kyerɛ yɛn. Yesu amfa saa asɛm no sɛ ɛyɛ ayɛsɛm bi kɛkɛ a wɔka kyerɛ nnipa a wonnim nhoma. Bere a ɔne nyamesom akannifo a wonim nhoma yiye rekasa no, ɔkae sɛ: “Monkenkanee sɛ onii a ɔbɔɔ wɔn no yɛɛ wɔn ɔbarima ne ɔbea fii mfiase?” (Mateo 19:3-5) Afei Yesu faa Adam ne Hawa ho asɛm a ɛwɔ Genesis 2:24 no mu asɛm kae.

Luka, Bible kyerɛwfo a ɔtɔɔ ne bo ase hwehwɛɛ nsɛm mu yiye ansa ɔrekyerɛw no kaa Adam ho asɛm sɛ ɔyɛ onipa a ɔtraa ase te sɛ Yesu. Luka kyerɛɛ Yesu anato kosii onipa a odi kan, Adam so. (Luka 3:23-38) Afei nso, bere a ɔsomafo Paulo kasa kyerɛɛ nnipakuw bi a na nyansapɛfo a wosuaa nhoma wɔ Hela sukuu ahorow a na agye din mu ka ho no, ɔka kyerɛɛ wɔn sɛ: “Onyankopɔn a ɔyɛɛ wiase ne nea ɛwɔ mu nyinaa no . . . na ɔyɛɛ nnipa aman nyinaa fii nipa baako mu sɛ wɔntra asase nyinaa so.” (Asomafo Nnwuma 17:24-26) Ɛda adi pefee sɛ Bible kyerɛkyerɛ sɛ yefi “nipa baako” mu. So nea Bible ka wɔ tebea a na onipa wom fi mfiase ho no ne adannandi hyia?

Nea Ɛyɛe a Onipa Tɔɔ Sin

Bible kyerɛ sɛ Yehowa yɛɛ onipa a odi kan a na ɔyɛ pɛ. Onyankopɔn ntumi nyɛ nneɛma  a ɛtɔ sin. Abɔde ho kyerɛwtohɔ ka sɛ: “Onyankopɔn bɔɔ onipa wɔ ne suban so . . . Na Onyankopɔn huu nea ɔyɛe nyinaa, na hwɛ, eye papa.” (Genesis 1:27, 31) Onipa a ɔyɛ pɛ te dɛn?

Onipa a ɔyɛ pɛ wɔ hokwan sɛ ɔpaw nea ɔpɛ, na otumi suasua Onyankopɔn su ahorow yiye. Bible ka sɛ: “Onyankopɔn bɔɔ onipa yiye, na wɔn de, wɔhwehwɛ tirim adwene bebree.” (Ɔsɛnkafo 7:29) Adam pawee sɛ ɔbɛtew atua atia Onyankopɔn. Adam nam atua a ɔtewee so benyaa sintɔ, na ɔde bi maa n’asefo. Nea ɛyɛe a onipa tɔɔ sin no ma yehu nea enti a mpɛn pii no yentumi nyɛ nea yɛpɛ sɛ yɛyɛ, ɛmfa ho mpo sɛ yɛpɛ sɛ yɛyɛ adepa no. Ɔsomafo Paulo kyerɛwee sɛ: “Nea mepɛ no, ɛnyɛ ɛno na meyɛ; na mmom nea mikyi na meyɛ.”—Romafo 7:15.

Bible kyerɛ sɛ onipa a ɔyɛ pɛ benya apɔwmuden a edi mu atra ase daa. Sɛ yɛhwɛ nea Onyankopɔn ka kyerɛɛ Adam no a, ɛda adi sɛ sɛ onipa a odi kan no anyɛ Onyankopɔn so asoɔden a, anka ɔrenwu da. (Genesis 2:16, 17; 3:22, 23) Sɛ na onipa bɛyare anaa ɔbɛtew atua a, anka Yehowa renka sɛ onipa a ɔbɔɔ no no ‘yɛ papa.’ Nea ɛyɛe a onipa tɔɔ sin no ma yehu nea enti a ɛmfa ho sɛ wɔyɛɛ nipadua ma ɛyɛ nwonwa no, etumi di dɛm anaa yare ka no. Enti adannandi ne Bible no nhyia. Adannandi ka onipa ho asɛm sɛ aboa a ɔkɔ so sakra ma ne tebea yɛ papa. Nanso Bible ka nnipa ho asɛm sɛ onipa a ɔyɛ pɛ asefo a wɔresɛe.

Adwene a ɛne sɛ Onyankopɔn nam adannandi so na ɔmaa nnipa bae no nso ne nea Bible ka fa Onyankopɔn nipasu ho no nhyia. Sɛ Onyankopɔn nam adannandi so na ɔmaa nnipa bae a, anka ɛbɛkyerɛ sɛ ɔno na ɔmaa adesamma kɔɔ tebea a asɛe na ɔhaw ahyɛ mu ma a wɔwom nnɛ no mu. Nanso Bible ka Onyankopɔn ho asɛm sɛ: “Ɔbotan no, n’adeyɛ yɛ pɛ, na n’akwan nyinaa yɛ trenee; ɔyɛ nokware Nyankopɔn na nkontompo nni no mu; ɔtreneeni ne teefo ne no. Wɔadi no asɛmmɔne, wɔn nkekae nti, wɔnna so nyɛ ne mma.” (Deuteronomium 32:4, 5) Enti amane a nnipa rehu nnɛ no nkyerɛ sɛ Onyankopɔn nam adannandi so na ɔmaa nnipa bae. Na mmom, ɛnam onipa baako a ɔtew atua tiaa Onyankopɔn so na ɛma ɔtɔɔ sin, na ɔde bi maa n’asefo. Seesei a yɛasusuw Adam ho awie no, ma yɛnnan nkɔ Yesu so. So adannandi ne nea Bible ka fa Yesu ho no hyia?

So Wubetumi Agye Adannandi ne Kristosom Nyinaa Adi?

“Yɛn bɔne nti na Kristo wui.” Sɛnea ebia wunim no, eyi ka Kristosom nkyerɛkyerɛ atitiriw no ho. (1 Korintofo 15:3; 1 Petro 3:18) Sɛ yɛbɛte nea enti a adannandi ne saa asɛm no nhyia ase a, ehia sɛ yedi kan te nea enti a Bible frɛ yɛn abɔnefo ne nea bɔne de yɛ yɛn no ase.

 Yɛn nyinaa yɛ abɔnefo kyerɛ sɛ yentumi nsuasua Onyankopɔn su ahorow te sɛ ne dɔ ne n’atɛntrenee pɛpɛɛpɛ. Enti Bible ka sɛ: “Wɔn nyinaa ayɛ bɔne na wonnu Onyankopɔn anuonyam ho.” (Romafo 3:23) Bible kyerɛkyerɛ sɛ bɔne na ɛde owu bae. 1 Korintofo 15:56 ka sɛ: “Nwowɔe a ɛde owu ba ne bɔne.” Bɔne a wɔde woo yɛn no nso ne ade titiriw a enti yɛyare. Yesu kyerɛe sɛ ɔyare ne bɔne a wɔde awo yɛn no wɔ biribi yɛ. Ɔka kyerɛɛ obubuafo bi sɛ, “Wɔde wo bɔne afiri wo,” na ɔbarima no ho tɔɔ no.—Mateo 9:2-7.

Ɔkwan bɛn so na Yesu wu no boa yɛn? Bible ma yehu nsonsonoe a ɛda Adam ne Yesu Kristo ntam, na ɛka sɛ: “Sɛnea obiara rewu wɔ Adam mu no, saa ara na wɔbɛma obiara anya nkwa wɔ Kristo mu.” (1 Korintofo 15:22) Yesu nam ne nkwa a ɔde bɔɔ afɔre no so gyee yɛn fii bɔne a yenya fii Adam hɔ no mu. Enti obiara a ogye Yesu di na otie no no benya nea Adam hweree no—daa nkwa.—Yohane 3:16; Romafo 6:23.

Enti afei, so wuhu sɛ adannandi ne Kristosom nhyia? Sɛ yennye nni sɛ “obiara rewu wɔ Adam mu” a, yɛbɛyɛ dɛn anya anidaso sɛ “wɔbɛma obiara anya nkwa wɔ Kristo mu”?

Nea Enti a Nkurɔfo Ani Gye Adannandi Ho

Bible ma yehu nea enti a nnipa pii ani gye nkyerɛkyerɛ te sɛ adannandi ho. Ɛka sɛ: “Bere bi bɛba a wɔrentra nkyerɛkyerɛ pa no mu, na mmom wɔbɛboaboa akyerɛkyerɛfo ano afa ma wɔanunu wɔn asom, sɛnea wɔn ankasa akɔnnɔ te; na wobeyi wɔn asõ afi nokware no ho, na wɔadan akɔ atosɛm so.” (2 Timoteo 4:3, 4) Ɛwom sɛ nyansahufo na wɔtaa ka adannandi ho asɛm de, nanso ɛyɛ nyamesom nkyerɛkyerɛ ankasa. Ɛkyerɛkyerɛ adwene a ɛsɛ sɛ nnipa nya wɔ asetra ne Onyankopɔn ho. Esiane sɛ nnipa yɛ pɛsɛmenkominya, na wɔpɛ ahofadi nti, adannandi nkyerɛkyerɛ no wia wɔn nkakrankakra. Nnipa pii a wogye adannandi di no ka sɛ wogye Onyankopɔn nso di. Nanso wosusuw sɛ ɛnyɛ Onyankopɔn na ɔbɔɔ nneɛma, ɔmfa ne ho nnye nnipa nsɛm mu, na ɔremmu nnipa atɛn. Ɛyɛ nkyerɛkyerɛ a ɛyɛ nkurɔfo asom dɛ.

Wɔn a wɔkyerɛkyerɛ adannandi no “ankasa akɔnnɔ” na ɛtaa kanyan wɔn ma wogye di, na ɛnyɛ emu nokwasɛm no—ebia wɔpɛ sɛ nyansahufo a wɔn mu pii gye adannandi nkyerɛkyerɛ di no gye wɔn tom. Ɔbenfo Michael Behe, a ɔyɛ abɔde a nkwa wom ho nhwehwɛmu a ɔde ne bere dodow no ara asua sɛnea nkwammoaa mu nneɛma pii no yɛ adwuma no kyerɛkyerɛɛ mu sɛ, wɔn a wɔkyerɛ sɛ nkwaboaa nam adannandi so na ɛbae no nni nnyinaso biara. So adannandi betumi akɔ so wɔ nkwaboaa ketekete yi mu? Ɔkyerɛwee sɛ: “Nkwaboaa a wɔkyerɛ sɛ ɛnam adannandi so na ɛbae no nnyina nyansahu so. Nyansahu ho nhoma, nsɛmma nhoma a agye din, anaa nhoma biara nni hɔ a ɛkyerɛkyerɛ sɛnea ɛyɛe a nkwaboaa a emu nneɛma pii no nam adannandi so bae anaa sɛ ebia ɛbae mu. . . . Darwin adannandi nkyerɛkyerɛ no yɛ nkyerɛkyerɛ a wɔde dwa wɔn anom kɛkɛ.”

Sɛ wɔn a wogye adannandi di nni nnyinaso biara a, dɛn nti na wɔka ho asɛm denneennen saa? Behe kyerɛkyerɛ mu sɛ: “Nyansahufo a nnipa bu wɔn yiye na wɔagye din no mu pii ne nkurɔfo afoforo mpɛ sɛ wogye tom sɛ obi a ɔwɔ tumi wɔ hɔ a ɔbɔɔ nneɛma.”

Asɔfo pii a wɔpɛ sɛ wɔyɛ wɔn ho sɛ anyansafo no ani gye adannandi nkyerɛkyerɛ no ho. Wɔte sɛ wɔn a ɔsomafo Paulo kaa wɔn ho asɛm wɔ ne krataa a ɔkyerɛw kɔmaa Kristofo a na wɔwɔ Roma no mu. Paulo kyerɛwee sɛ: “Nea wobetumi ahu afa Nyankopɔn ho no da adi wɔn mu . . . Ne su horow a wonhu no ada adi pefee fi wiase bɔ so, efisɛ wɔnam  nneɛma a wayɛ so na ehu, ɛno ne ne daa tumi ne ne Nyamesu, enti wonni anoyi biara; efisɛ wonim Nyankopɔn de, nanso wɔanhyɛ no anuonyam sɛ Nyankopɔn, na wɔanna no ase nso, mmom no, wosusuw nsɛnhuhuw ho, na wɔn koma a asen no duruu sum. Ɛwom, na wɔka sɛ wɔyɛ anyansafo de, nanso wɔbɛyɛɛ nkwaseafo.” (Romafo 1:19-22) Wobɛyɛ dɛn na atoro akyerɛkyerɛfo annaadaa wo?

Ɔbɔadeɛ no mu Gyidi a Ɛwɔ Nnyinaso

Sɛ Bible kyerɛkyerɛ gyidi mu a, ɛda adi sɛ adanse ho hia. Ɛka sɛ: “Gyidi ne awerɛhyem a yɛde twɛn biribi a yɛn ani da so, nneɛma a yenhu ho adanse a ɛda adi pefee.” (Hebrifo 11:1) Ɛsɛ sɛ Onyankopɔn mu gyidi ankasa gyina adanse a ɛkyerɛ sɛ Ɔbɔadeɛ bi wɔ hɔ so. Bible ma wuhu baabi a wubenya saa adanse no.

Dawid a Onyankopɔn honhom kaa no ma ɔkyerɛw Bible no bi kyerɛwee sɛ: “Meda wo ase sɛ woyɛɛ me ma ɛyɛ hu ne nwonwa.” (Dwom 139:14) Sɛ yegye bere susuw sɛnea wɔyɛɛ yɛn ankasa nipadua ne abɔde a nkwa wom afoforo ma ɛyɛ nwonwa no ho a, yɛn Yɛfo no nyansa ma yɛn ho dwiriw yɛn. Wɔyɛɛ yɛn nipadua nkwaadɔm pii no mu biara yiye ma ɛbom yɛ adwuma ma yɛkɔ so tra nkwa mu. Amansan yi nso ma yehu sɛ wɔahyehyɛ biribiara pɛpɛɛpɛ. Dawid kyerɛwee sɛ: “Ɔsoro ka Onyankopɔn anuonyam, na ewim kyerɛ ne nsa ano adwuma.”—Dwom 19:1.

Ɔbɔadeɛ no ho adanse pii wɔ Bible no mu. Sɛ wugye bere hwehwɛ sɛnea nhoma 66 a ɛwom no mu nsɛm hyia, ɛhyɛ abrabɔ pa ho nkuran kɛse, ne emu nkɔmhyɛ a ɛbam bere nyinaa no mu a, ɛbɛma woanya adanse pii a ɛkyerɛ sɛ ɛyɛ Ɔbɔadeɛ no nhoma. Sɛ wote Bible nkyerɛkyerɛ ase a, ɛbɛma woanya ahotoso nso sɛ Bible yɛ Ɔbɔadeɛ no Asɛm ampa. Sɛ nhwɛso no, sɛ wote Bible nkyerɛkyerɛ te sɛ nea ɛde amanehunu bae, Onyankopɔn Ahenni, nea adesamma benya daakye, ne sɛnea wubetumi anya anigye ase a, wubehu Onyankopɔn nyansa ho adanse. Ebia wo ne Paulo a ɔkyerɛw asɛm yi bɛyɛ adwene: “O hwɛ sɛnea Onyankopɔn ahonya ne nyansa ne nimdeɛ mu dɔ fa! Hwɛ sɛnea wontumi mpɛɛpɛɛ n’atemmu mu, na wɔrentumi nhwehwɛ n’akwan mu nwie da!”—Romafo 11:33.

Bere a worehwehwɛ adanse no mu na wo gyidi mu reyɛ den no, wubehu sɛ sɛ wokenkan Bible no a, na Ɔbɔadeɛ no ankasa na woretie no no. Ɔka sɛ: “Me na meyɛɛ asase, na mebɔɔ ɛso nnipa; me na me nsa trɛw ɔsoro mu, na mehyɛ mu asafo nyinaa.” (Yesaia 45:12) Akyinnye biara nni ho sɛ worennu wo ho da sɛ w’ankasa wobɔɔ mmɔden hwehwɛ hui sɛ Yehowa na ɔbɔɔ nneɛma nyinaa.

[Asɛm a wɔafa aka wɔ kratafa 14]

Ɔsomafo Paulo ka kyerɛɛ Helafo nhomanimfo no sɛ: “[Onyankopɔn yɛɛ] nnipa aman nyinaa fii nipa baako mu”

[Asɛm a wɔafa aka wɔ kratafa 15]

Adannandi ka onipa ho asɛm sɛ aboa a ɔkɔ so sakra ma ne tebea yɛ papa. Bible ka nnipa ho asɛm sɛ onipa a ɔyɛ pɛ asefo a wɔresɛe

[Asɛm a wɔafa aka wɔ kratafa 16]

“Nkwaboaa a wɔkyerɛ sɛ ɛnam adannandi so na ɛbae no nnyina nyansahu so”

[Asɛm a wɔafa aka wɔ kratafa 17]

Sɛnea wɔayɛ abɔde a nkwa wom ma ɛyɛ nwonwa no ma yɛn ho dwiriw yɛn wɔ yɛn Yɛfo no nyansa ho