Momma Yɛmfa Yɛn Ho Nto Yehowa So Bere A Awiei No Rebɛn No
Momma Yɛmfa Yɛn Ho Nto Yehowa So Bere A Awiei No Rebɛn No
“Momfa mo ho nto Yehowa so daa.”—YES. 26:4.
1. Nsonsonoe bɛn na ɛwɔ nnipa a wɔwɔ wiase no mu ne Onyankopɔn asomfo ntam?
YƐTE wiase bi a nnipa ɔpepem pii nhu onipa a wɔmfa wɔn ho nto no so anaa biribi a wɔmfa wɔn ho nto so bio mu. Nea enti a ebia aba saa ne sɛ afoforo ayɛ ade ma ayɛ wɔn yaw anaa wɔadi wɔn huammɔ mpɛn pii. Nanso, Yehowa asomfo de, wɔnte saa koraa! Esiane sɛ Onyankopɔn nyansa kyerɛ wɔn kwan nti, wonim sɛ ɛnsɛ sɛ wɔde wɔn ho to wiase no anaa “adehye” a wɔwom no so. (Dw. 146:3) Mmom no, wɔde wɔn nkwa ne wɔn daakye hyɛ Yehowa nsa, efisɛ wonim sɛ Yehowa dɔ wɔn, na odi n’Asɛm so bere nyinaa.—Rom. 3:4; 8:38, 39.
2. Asɛm bɛn na Yosua kae de kyerɛe sɛ Onyankopɔn yɛ obi a yebetumi de yɛn ho ato no so koraa?
2 Yosua a ɔtenaa ase tete no kae sɛ Onyankopɔn yɛ obi a yetumi de yɛn ho to no so koraa. Aka kakra ma wawu no, ɔka kyerɛɛ ne mfɛfo Israelfo sɛ: “Munim mo koma nyinaa mu ne mo kra nyinaa mu sɛ nsɛmpa a Yehowa mo Nyankopɔn aka akyerɛ mo no mu asɛm biako mpo ntɔɔ fam. Ne nyinaa aba mu.”—Yos. 23:14.
3. Dɛn na Onyankopɔn din ma yehu fa ne ho?
3 Ɛnyɛ ɔdɔ a Yehowa wɔ ma n’asomfo nko nti na odi ne bɔhyɛ so, na mmom, ne titiriw no, ɔno ankasa din nso ntia. (Ex. 3:14; 1 Sam. 12:22) J. B. Rotherham kyerɛkyerɛɛ mu wɔ The Emphasized Bible nnianim asɛm no mu sɛ, nea Onyankopɔn din kyerɛ ne sɛ Onyankopɔn betumi ayɛ ne ho sɛnea ehia biara na wama n’atirimpɔw ahorow abam. Sɛ yɛte ne din a, yɛkae sɛ ɔyɛ nea ɔka bere nyinaa. Obetumi ayɛ nea ehia sɛ ɔyɛ bere biara ne baabiara a ɔpɛ. Biribiara nso Onyankopɔn yɛ. Onyankopɔn bɛyɛ n’ade sɛnea ne din kyerɛ no bere nyinaa.
4. (a) Dɛn na Yesaia 26:4 tu yɛn fo sɛ yɛnyɛ? (b) Dɛn na yebesusuw ho wɔ adesua yi mu?
4 Bisa wo ho sɛ: ‘So minim Yehowa yiye paa ma enti metumi de me ho ato no so koraa? So mede ahotoso hwɛ nneɛma a ɛbɛba daakye kwan, a minim sɛ Onyankopɔn tumi yɛ ade nyinaa?’ Yesaia 26:4 ka sɛ: “Momfa mo ho nto Yehowa so daa, efisɛ Yah Yehowa mu na yɛn daa Botan wɔ.” Nokwasɛm ne sɛ, ɛnnɛ Onyankopɔn mfa ne ho nnye nnipa nsɛm mu anwonwakwan so sɛnea ɛtɔ mmere bi a na ɔyɛ bere a na wɔrekyerɛw Bible no. Nanso, esiane sɛ ɔyɛ “yɛn daa Botan” nti, yebetumi de yɛn ho ato no so “daa.” Ɔkwan bɛn so na yɛn Nyankopɔn a yetumi de yɛn ho to no so no boa n’asomfo anokwafo a wɔwɔ hɔ nnɛ? Momma yensusuw akwan abiɛsa a ɔfa so yɛ saa no ho nhwɛ: Sɛ yɛsrɛ no sɛ ɔmmoa yɛn mma yennyina sɔhwɛ ano a, ɔhyɛ yɛn den, sɛ yehyia nnipa a wɔn ani nnye asɛm a yɛka no ho anaa wɔsɔre tia yɛn pefee a, ɔboa yɛn, na sɛ dadwen hyɛ yɛn so a, ɔhyɛ yɛn nkuran. Bere a yɛrehwehwɛ saa nneɛma abiɛsa yi mu no, susuw sɛnea wubetumi ahyɛ ahotoso a wowɔ wɔ Yehowa mu no mu den no ho.
Sɛ Wuhyia Sɔhwɛ a Ebetumi Ama Woayɛ Bɔne a, Fa Wo Ho To Onyankopɔn So
5. Dɛn ho na ebetumi ayɛ den paa ama yɛn sɛ yebenya Onyankopɔn mu ahotoso?
5 Ɛrenyɛ den sɛ yebenya Yehowa mu ahotoso wɔ ne bɔhyɛ a ɛfa Paradise ne owusɔre ho no ho—nneɛma a yɛrehwɛ kwan denneennen no. Nanso, sɛ ɛba sɛ ɛsɛ sɛ yesi gyinae de ne gyinapɛn a ɛfa abrabɔ ho yɛ adwuma, ne bere a ɛsɛ sɛ yegye tom koraa sɛ ɛyɛ papa sɛ yedi n’akwankyerɛ ne ne gyinapɛn akyi na ama yɛanya anigye kɛse a, ebetumi ayɛ den paa ama yɛn sɛ yebenya ne mu ahotoso. Ɔhene Solomon kyerɛw saa afotu yi sɛ: “Fa wo koma nyinaa to Yehowa so, na mfa wo ho ntweri w’ankasa ntease. Hu no w’akwan nyinaa mu, na ɔno na ɔbɛma w’akwan ateɛ.” (Mmeb. 3:5, 6) Hyɛ sɛnea ɔtwee adwene sii yɛn ‘akwan’ so no nsow. Nokwarem no, ɛsɛ sɛ nea yɛyɛ wɔ yɛn asetena mu nyinaa da no adi sɛ yɛde yɛn ho to Onyankopɔn so, na ɛnyɛ anidaso a yɛwɔ sɛ Kristofo no nko. Sɛ yehyia sɔhwɛ a, dɛn na yebetumi ayɛ de akyerɛ sɛ yɛwɔ ahotoso a ɛte saa?
6. Dɛn na yebetumi ayɛ de ahyɛ yɛn bo a yɛasi sɛ yɛbɛpo nsusuwii bɔne no mu den?
6 Sɛ yebetumi atwe yɛn ho afi bɔne ho a, ɛsɛ sɛ efi ase wɔ yɛn adwenem. (Monkenkan Romafo 8:5; Efesofo 2:3.) Ɛnde, dɛn na wubetumi ayɛ de ahyɛ wo bo a woasi sɛ wobɛpo nsusuwii bɔne no mu den? Susuw nneɛma anum a wubetumi ayɛ yi ho hwɛ: 1. Bɔ mpae fa hwehwɛ Onyankopɔn mmoa. (Mat. 6:9, 13) 2. Susuw nnipa bi a wɔn ho asɛm wɔ Bible mu a wɔantie Yehowa ne wɔn a wotiee no no ho hwɛ. Afei hyɛ nea ɛtoo wɔn no nsow. * (1 Kor. 10:8-11) 3. Dwinnwen sɛnea bɔne a wobɛyɛ betumi ama dadwen abɛtɔ wo ne w’adɔfo so na moateetee no ho. 4. Susuw sɛnea Onyankopɔn bɛte nka bere a ne somfo bi ayɛ bɔne a emu yɛ duru no ho hwɛ. (Monkenkan Dwom 78:40, 41.) 5. Sɛ Yehowa somfo nokwafo bi wɔ nnipa mu anaa kokoam na sɛ ɔtwe ne ho fi bɔne ho na ɔyɛ papa a, hwɛ sɛnea Yehowa koma tɔ ne yam. (Dw. 15:1, 2; Mmeb. 27:11) Wo nso wubetumi ada no adi sɛ wowɔ Yehowa mu ahotoso.
Sɛ Wɔnkyerɛ Asɛm no Ho Anigye Anaa Wɔsɔre Tia Wo a, Fa Wo Ho To Onyankopɔn So
7. Sɔhwɛ bɛn na Yeremia hyiae, na ɛtɔ mmere bi a na ɔte nka dɛn?
7 Yɛn nuanom pii ka asɛm no wɔ nsasesin a emu yɛ den paa mu. Odiyifo Yeremia kaa asɛm no wɔ asasesin a ɛte saa mu, saa asasesin no ne Yuda ahemman a na ɛwɔ ne nna a edi akyiri a na basabasayɛ ahyɛ mu ma no. Esiane sɛ ɔyɛɛ osetie na ɔkaa Onyankopɔn atemmusɛm kyerɛɛ ɔman no nti, da biara da na ohyia Yehowa mu ahotoso a na ɔwɔ no ho sɔhwɛ. Bere bi, ne kyerɛwfo nokwafo Baruk mpo kae sɛ wabrɛ. (Yer. 45:2, 3) So Yeremia maa n’abam bui? Mmere bi wɔ hɔ a, n’abam bui. Ɔteɛɛm sɛ: “Nnome nka da a wɔwoo me no! . . . Dɛn nti koraa na mifi yafunu mu bae sɛ merebehu adwumaden ne awerɛhow na me nna aba awiei aniwu mu?”—Yer. 20:14, 15, 18.
8, 9. Sɛnea Yeremia 17:7, 8 ne Dwom 1:1-3 kyerɛ no, dɛn na ɛsɛ sɛ yɛyɛ na ama yɛakɔ so asow aba pa?
8 Yeremia ampa abaw. Ɔkɔɔ so de ne ho too Yehowa so. Eyi a odiyifo nokwafo yi yɛe nti, ohuu asɛm a Yehowa ankasa kae a ɛwɔ Yeremia 17:7, 8 no mmamu. Ɛhɔ ka sɛ: “Nhyira ne ɔbarima a ɔde ne ho to Yehowa so na ɔde Yehowa yɛ n’anidaso. Ɔbɛyɛ sɛ dua a wɔadua wɔ nsu ho, a ne ntini tenetene kɔ asu no nkyɛn. Sɛ ɔhyew ba a, ɔrenhu, na n’ahaban bɛyɛ frɔmfrɔm. Afe a ɔpɛ besi nso, ɔrensuro, na ɔrennyae abasow.”
9 Yeremia ‘annyae abasow’ da te sɛ dua a ɛsow aba a n’ahaban yɛ frɔmfrɔm a “wɔadua wɔ nsu ho” anaa wɔadua wɔ baabi a nnuaba a wogugu so nsu wɔ. Wamma abɔnefo a wɔyɛ fɛwdifo a na ɔte wɔn mu no ammu n’abam. Mmom no, ɔbataa Onii a ɔma ‘nsu’ a ɛma nkwa no ho, na otiee asɛm biara a Yehowa ka kyerɛɛ no. (Monkenkan Dwom 1:1-3; Yer. 20:9) Hwɛ nhwɛso pa ara a Yeremia yɛ maa yɛn, titiriw, wɔn a wɔsom Onyankopɔn wɔ nsasesin a emu yɛ den mu no! Sɛ woka asɛm no wɔ asasesin a ɛte saa mu a, kɔ so fa wo ho to Yehowa so kɛse, na ɔbɛma woatumi agyina ano bere a ‘wobɔ ne din wɔ baguam no.’—Heb. 13:15.
10. Nhyira bɛn na yɛanya, na asɛm bɛn na ɛsɛ sɛ yebisa yɛn ho?
10 Yehowa ama yɛn nneɛma pii a ɛbɛboa yɛn ma yɛagyina nsɛnnennen a yehyia wɔ asetena mu wɔ nna a edi akyiri yi mu no ano. Nneɛma a ɔde ama yɛn no bi ne Onyankopɔn Asɛm mũ no nyinaa a wɔrekyerɛ ase pɛpɛɛpɛ kɔ kasa ahorow pii mu no. Ɔnam akoa nokwafo ne ɔbadwemma no so ama yɛn nsa aka honhom fam aduan pii wɔ ne bere mu. Wɔama yɛanya mfɛfo gyidifo mpempem pii a yɛne wɔn bɔ fekuw na wɔhyɛ yɛn nkuran wɔ asafo nhyiam ne nhyiam ahorow ase. So wode nsiesiei a wɔayɛ ama yɛn yi di dwuma yiye? Wɔn a wɔde saa nsiesiei no di dwuma no nyinaa “bedi ahurusi, koma pa nti.” Nanso, wɔn a wontie Onyankopɔn no ‘besu, komam yaw nti, na wobetwa adwo, honhom a abubu nti.’—Yes. 65:13, 14.
Sɛ Dadwen Hyɛ Wo So a, Fa Wo Ho To Onyankopɔn So
11, 12. Esiane ɔhaw a ɛrekɔ so wɔ wiase yi mu nti, dɛn na nyansa wom paa sɛ yɛyɛ?
11 Adesamma rehyia amanehunu pii sɛnea wɔhyɛɛ ho nkɔm no. (Mat. 24:6-8; Adi. 12:12) Sɛ nsu yiri fa baabi a, ade a yɛtaa yɛ ne sɛ yeguan kɔ bepɔw so anaa yɛforo kɔ ɔdan bi atifi—baabiara a ɛhɔ wɔ soro. Saa ara na bere a ɔhaw a ɛwɔ wiase mu redɔɔso no, nnipa ɔpepem pii rehwehwɛ ahobammɔ wɔ baabi a ɛte sɛ nea ɛhɔ korɔn te sɛ sikakorabea ahorow, amammui ne nyamesom ahyehyɛde ahorow, ne afei nyansahu ne mfiridwuma mu. Nanso, eyinom mu biara rentumi mmɔ wɔn ho ban ankasa. (Yer. 17:5, 6) Yehowa asomfo de, wɔwɔ guankɔbea a enni wɔn huammɔ da—“yɛn daa Botan” no. (Yes. 26:4) Odwontofo no kae sɛ: “[Yehowa ne] me botan ne me nkwagye, m’abantenten.” (Monkenkan Dwom 62:6-9.) Yɛyɛ dɛn de saa Ɔbotan yi yɛ yɛn guankɔbea?
12 Sɛ yɛde Yehowa Asɛm a mpɛn pii no, nnipa nyansa ne no nhyia yɛ adwuma a, ɛkyerɛ sɛ yɛbata Yehowa ho. (Dw. 73:23, 24) Sɛ nhwɛso no, ebia nkurɔfo a wɔma nnipa nyansa kyerɛ wɔn kwan no bɛka sɛ: ‘Wo bere ara ni; di wo mmere.’ ‘Pɛ adwuma pa bi yɛ.’ ‘Pɛ sika pii.’ ‘Tɔ eyi, tɔ eyi.’ ‘Tutu akwan, gye w’ani.’ Nanso, afotu a Onyankopɔn nyansa ma yenya ne sɛ: “Wɔn a wɔde wiase di dwuma no mmma wiase nnnye wɔn adwene; efisɛ wiase su resesa.” (1 Kor. 7:31) Saa ara na Yesu tu yɛn fo sɛ yɛmfa nneɛma a ɛfa Ahenni no ho nni kan bere nyinaa, na yɛnam so ahyehyɛ “ademude ɔsoro,” baabi a ɛrensɛe da.—Mat. 6:19, 20.
13. Bere a asɛm a ɛwɔ 1 Yohane 2:15-17 wɔ yɛn adwenem no, nsɛm bɛn na ɛsɛ sɛ yebisa yɛn ho?
13 So sɛnea woyɛ w’ade wɔ “wiase” no ne “nneɛma a ɛwɔ wiase” ho no da no adi sɛ wode wo ho to Onyankopɔn so koraa? (1 Yoh. 2:15-17) So w’ani gye nhyira a wubenya afi Yehowa hɔ ne Ahenni no ho adwuma a wobɛyɛ no pii no ho paa sen wiase nneɛma a wubenya? (Filip. 3:8) So wobɔ mmɔden sɛ wobɛkɔ so ama ‘w’aniwa ahwɛ tee’? (Mat. 6:22) Nokwarem no, Onyankopɔn mpɛ sɛ woyɛ obi a ɔnyɛ n’ade nyansam anaa onni n’asɛyɛde ho dwuma, ne titiriw no, sɛ woyɛ obi a wowɔ abusua a. (1 Tim. 5:8) Nanso, ɔhwɛ kwan sɛ n’asomfo de wɔn ho bɛto no so koraa, na ɛnyɛ Satan wiase a ɛretwam yi.—Heb. 13:5.
14-16. Mfaso bɛn na wɔn a wɔkɔ so ma wɔn ‘aniwa hwɛ tee’ na wɔkɔ so de nneɛma a ɛfa Ahenni no ho di kan no anya?
14 Susuw Richard ne Ruth a wɔwɔ mma nkumaa baasa no asɛm ho hwɛ. Richard ka sɛ: “Ná mihu paa sɛ metumi ayɛ pii wɔ Yehowa som mu. Ná mewɔ asetena pa, nanso sɛ mɛka a, na nea manya ma aboro so na mede ma Yehowa. Bere a me ne Ruth bɔɔ asɛm no ho mpae na yesusuw nea ebetumi afi gyinae a yɛpɛ sɛ yesi no mu aba ho no, yɛyɛɛ adwene sɛ menkɔsrɛ m’adwumam panyin sɛ ɔmma menyɛ adwuma nnanan wɔ dapɛn no mu, ɛmfa ho mpo sɛ saa bere no na ɔman no sikasɛm asɛe no. Ɔpanyin no penee m’abisade no so, na mifii ase yɛɛ adwuma nnanan wɔ ɔsram biako ntam.” Seesei Richard te nka dɛn?
15 Richard ka sɛ: “Akatua a migye no so atew ɔha mu nkyem 20 de, nanso ama manya nnafua 50 aka nna a minya wɔ afe biako mu ne m’abusua tena de tete me mma no ho. Nnɔnhwerew a mede kɔ asɛnka no abu abɔ ho abien, Bible adesua dodow a meyɛ abu abɔ ho abiɛsa, na mitumi di asafo no anim yiye nso. Na esiane sɛ minya bere pii de boa ma yɛhwɛ yɛn mma no nti, Ruth tumi yɛ akwampaefo boafo bere ne bere mu. Masi me bo sɛ mɛkɔ so ayɛ adwuma nnanan no ara bere dodow a m’adwumam panyin no bɛma me kwan no.”
16 Roy ne Petina a wɔwɔ ɔbabea a ɔda so ne wɔn te no tumi tew bere a wɔde yɛ adwuma no so sɛnea ɛbɛyɛ a wobetumi ayɛ bere nyinaa som adwuma no. Roy ka sɛ: “Mede nnansa na ɛyɛ adwuma dapɛn biara, na Petina nso de nnanu na ɛyɛ saa. Afei nso, yetu fii ofie kɛse bi mu kɔtenaa ketewaa bi a ɛnyɛ den koraa sɛ yebesiesie mu mu. Yɛyɛɛ akwampae adwuma ansa na yɛrewo yɛn babarima ne yɛn babea no, na akwampae adwuma no ho anigye mfii yɛn mu da. Enti bere a yɛn mma no nyinyinii no, yɛsan yɛɛ bere nyinaa som adwuma no bio. Sika biara nni hɔ a yebetumi de atoto nhyira a yɛanya no ho.”
Momma “Onyankopɔn Asomdwoe” Mmɔ Mo Koma Ho Ban
17. Esiane sɛ yennim ɔkyena asɛm nti, ɔkwan bɛn so na Kyerɛwnsɛm no akyekye wo werɛ?
17 Obiara nnim ɔkyena asɛm, efisɛ “asiane” to yɛn nyinaa ‘bere a yɛnhwɛ kwan.’ (Ɔsɛnk. 9:11) Nanso, ɛnsɛ sɛ yɛma nea ebesi ɔkyena a yennim no sɛe yɛn asomdwoe nnɛ, sɛnea ɛtaa to wɔn a abusuabɔ pa a wɔne Onyankopɔn nni nti wonni abotɔyam no. (Mat. 6:34) Ɔsomafo Paulo kyerɛwee sɛ: “Munnnwinnwen biribiara nnhaw mo ho, na mmom momfa mpaebɔ ne nkotɔsrɛ ne aseda so mfa mo adesrɛ nto Onyankopɔn anim ade nyinaa mu; na Onyankopɔn asomdwoe a ɛboro adwene nyinaa so no bɛbɔ mo koma ne mo adwene nsusuwii ho ban.”—Filip. 4:6, 7.
18, 19. Akwan bɛn na Onyankopɔn fa so kyekye yɛn werɛ? Ma ɛho nhwɛso.
18 Anuanom mmarima ne mmea pii a wɔrehyia nsɛnnennen anya abotɔyam ne asomdwoe afi Yehowa hɔ. Onuawa bi kae sɛ: “Oduruyɛfo bi a ɔyɛ oprehyɛn bɔɔ mmɔden sɛ obehunahuna me ma magye mogya. Sɛ na ɔba me nkyɛn a, na nsɛm a odi kan ka no bi ne sɛ, ‘Dɛn ne nsɛnhunu a worekeka sɛ worennye mogya no?’ Sɛ ɔka saa a, na mebɔ Yehowa mpae wɔ me tirim wɔ hɔ ara, na mmere foforo nso na meyɛ saa ara, na minyaa Yehowa asomdwoe. Metee nka sɛ mayɛ den te sɛ ɔbotan. Ɛmfa ho sɛ na me mogya so atew ma mayɛ mmerɛw no, mitumi de Kyerɛwnsɛm no kyerɛkyerɛɛ me gyidi mu pefee.”
19 Ɛtɔ mmere bi a Onyankopɔn tumi fa yɛn mfɛfo gyidifo so anaa ɔde honhom fam aduan a ɛba wɔ bere a ɛsɛ mu no kyekye yɛn werɛ. Ebia woate sɛ onua anaa onuawa bi reka sɛ: “Asɛm a mihia ara ni. Eyi de, wɔkyerɛw maa me!” Ɛmfa ho tebea biara a yɛwom, anaa biribiara a yehia no, sɛ yɛde yɛn ho to Yehowa so a, ɔbɛma yɛahu sɛ ɔdɔ yɛn. Anyɛ hwee koraa no, yɛyɛ ne “nguan,” na ɔde ne din ato yɛn so.—Dw. 100:3; Yoh. 10:16; Aso. 15:14, 17.
20. Sɛ wɔsɛe Satan wiase no a, dɛn nti na Yehowa asomfo ho bedwo wɔn?
20 Wɔ “Yehowa abufuw da” a ɛreba ntɛmntɛm no mu no, wɔbɛsɛe biribiara a nnipa a wɔwɔ Satan wiase no mu de wɔn ho to so no. Sika, dwetɛ, ne ahonyade foforo biara ntumi mmɔ wɔn ho ban. (Sef. 1:18; Mmeb. 11:4) “Yɛn daa Botan” no nkyɛn ne beae koro pɛ a yebetumi anya guankɔbea. (Yes. 26:4) Momma yɛmfa yɛn ho nto Yehowa so koraa ɛnnɛ denam osetie a yɛde bɛnantew n’akwantrenee so, Ahenni no ho asɛm a yɛbɛka ɛmfa ho sɛ nkurɔfo nkyerɛ ho anigye anaa wɔsɔre tia no, ne yɛn dadwen nyinaa a yɛde bɛto no so no so. Sɛ yɛyɛ eyinom nyinaa a, ‘yɛbɛtena hɔ komm’ ankasa, ‘na yɛn ho adwo yɛn a yensuro sɛ mmusu’ bi reba.—Mmeb. 1:33.
[Ase hɔ asɛm]
Wubetumi Akyerɛkyerɛ Mu?
Yɛbɛyɛ dɛn atumi de yɛn ho ato Onyankopɔn so
• bere a yɛrehyia sɔhwɛ a ebetumi ama yɛayɛ bɔne?
• bere a nkurɔfo nkyerɛ asɛm no ho anigye anaa wɔsɔre tia yɛn no?
• bere a dadwen hyɛ yɛn so?
[Adesua no ho Nsɛmmisa]
[Mfonini wɔ kratafa 13]
Sɛ yɛde Onyankopɔn gyinapɛn bɔ yɛn bra a, ɛma yɛn ani gye
[Mfonini wɔ kratafa 15]
‘Yehowa ne yɛn daa Botan no’