Nsɛmmisa a Efi Akenkanfo Hɔ

So asɛm a ɛwɔ Hesekiel 18:20 a ɛka sɛ, “ɔba rensoa agya bɔne,” ne nea ɛwɔ Exodus 20:5 a ɛka sɛ Yehowa de ‘agyanom bɔne ho asotwe bɛba wɔn mma so’ no bɔ abira?

Abirabɔ biara nni nsɛm abien yi mu. Asɛm no mu biako twe adwene si akontaa a ankorankoro biara bebu so, ɛnna nea ɛka ho no fa sɛnea nea ebefi obi mfomso mu aba betumi aka n’asefo ho.

Hesekiel ti 18 mu nsɛm ma yehu sɛ na wɔresi akontaa a ankorankoro biara bebu so dua. Hesekiel 18:4 ka sɛ, “Ɔkra a ɔyɛ bɔne no, ɔno ara na obewu.” Na onipa a ɔyɛ ‘ɔtreneeni a odi asɛntrenee na ɔyɛ nea ɛteɛ’ no nso ɛ? “Ɔbɛtena nkwa mu.” (Hes. 18:5, 9) Enti, sɛ obi nyin du baabi a wɔma obu ne nneyɛe ho akontaa a, wobu no ‘atɛn sɛnea n’akwan te.’—Hes. 18:30.

Lewini Kora asɛm no ma yɛte saa nnyinasosɛm yi ase. Bere a na Israelfo no nam sare no so no, Kora ani ansɔ ɔsom hokwan a na ɔwɔ no. Kora bɔɔ mmɔden sɛ ɔbɛyɛ asɔfo adwuma, na ɛno maa ɔne afoforo tew Mose ne Aaron a wɔyɛ Onyankopɔn ananmusifo no so  atua. Esiane sɛ Kora ne wɔn a wɔka ne ho yɛɛ aniammɔho hwehwɛɛ asɔfodi—adwuma a na wonni hokwan sɛ wonya—nti, Yehowa kum Kora ne nnipa a wɔne no tew atua no. (Num. 16:8-11, 31-33) Nanso, Kora mma antew atua no bi. Onyankopɔn annyina wɔn agya bɔne so ammu wɔn atɛn. Nokware a wodii Yehowa no ma wogyee wɔn nkwa.—Num. 26:10, 11.

Na kɔkɔbɔ a ɛwɔ Exodus 20:5 a ɛka Mmara Nsɛm Du no ho no nso ɛ? Susuw nsɛm a ɛfa ɛno nso ho hwɛ. Yehowa de Mmara a ɔne Israel man no de yɛɛ apam no maa wɔn. Bere a Israelfo no huu nea ɛwɔ apam no mu no, wɔkaa no baguam sɛ: “Nea Yehowa aka nyinaa, yɛbɛyɛ.” (Ex. 19:5-8) Enti, ɔman mũ no nyinaa ne Yehowa benyaa abusuabɔ soronko. Enti, wɔkaa asɛm a ɛwɔ Exodus 20:5 no kyerɛɛ ɔman mũ no nyinaa titiriw.

Bere a Israelfo no dii Yehowa nokware no, ɔman no nyaa mfaso, na wonyaa nhyira pii. (Lev. 26:3-8) Nanso, bere a wɔanni Yehowa nokware no, wɔn ho kyeree wɔn pii. Bere a Israel man no poo Yehowa na wɔkɔsom atoro anyame no, Yehowa ankɔ so anhyira wɔn, na wammɔ wɔn ho ban; ɔman no huu amane. (Atem. 2:11-18) Nokwarem no, ebinom wɔ hɔ a ɛmfa ho sɛ ɔman no kɔsom abosom no, wɔkɔɔ so kuraa wɔn mũdi mu, na wodii Onyankopɔn mmara so. (1 Ahe. 19:14, 18) Ɛda adi sɛ esiane ɔman no bɔne nti, anokwafo a na wɔwɔ hɔ no kɔɔ ahokyere bi mu, nanso Yehowa daa adɔe adi kyerɛɛ wɔn.

Bere a Israelfo sen wɔn kɔn na wobuu Yehowa mmara so maa amanaman no buu Yehowa din animtiaa no, Yehowa sii gyinae sɛ ɔbɛma wɔafa ɔman no akɔ Babilon de wɔn akɔyɛ nkoa de atwe wɔn aso. Nokwasɛm ne sɛ na eyi fa asotwe a wɔde baa ankorankoro ne ne nkurɔfo nyinaa sɛ kuw so ho. (Yer. 52:3-11, 27) Nokwarem no, Bible ma yehu sɛ na Israel man no bɔne sõ araa ma bɔne a wɔn agyanom yɛe no kaa awo ntoatoaso abiɛsa, anan, anaa nea ɛboro saa, sɛnea Exodus 20:5 ka no ara pɛ.

Onyankopɔn Asɛm san ka mmusua bi a bɔne a wɔn awofo yɛe kaa wɔn nso ho asɛm. Ɔsɔfo Panyin Eli hyɛɛ Yehowa abufuw denam ne mma “ahuhufo” a na wɔn bra asɛe a ɔma wɔkɔɔ so yɛɛ asɔfodwuma no so. (1 Sam. 2:12-16, 22-25) Esiane sɛ Eli dii ne mma no ni sen Yehowa nti, Onyankopɔn hyɛe sɛ obetwa Eli abusua no afi asɔfo mpanyin no mu, na eyi fii ase wɔ ne nanankansowa Abiatar so. (1 Sam. 2:29-36; 1 Ahe. 2:27) Gehasi asɛm no nso ma yɛte nnyinasosɛm a ɛwɔ Exodus 20:5 no ase. Gehasi de hokwan a na ɔwɔ sɛ Elisa somfo no dii dwuma ɔkwammɔne so sɛnea ɛbɛyɛ a obenya honam fam nneɛma afi Siria Sahene Naaman a wɔsaa no yare no hɔ. Yehowa nam Elisa so buu no atɛn sɛ: “Naaman kwata bɛfam wo ne w’asefo ho daa.” (2 Ahe. 5:20-27) Enti, nea efii bɔne a Gehasi yɛe mu bae no kaa n’asefo.

Yehowa a ɔyɛ Ɔbɔadeɛ ne Nkwamafo no wɔ hokwan sɛ ɔkyerɛ asotwe a ɛteɛ na ɛfata sɛ wɔde ma obi. Nhwɛso ahorow a yɛaka ho asɛm no ma yehu sɛ ɔhaw a efi agyanom bɔne mu ba betumi aka wɔn mma anaa wɔn asefo. Nanso, Yehowa ‘tie mmɔborɔni sufrɛ,’ na ankorankoro a wofi wɔn komam kɔ ne nkyɛn betumi anya n’anim dom, na wɔanya ahotɔ kakra mpo.—Hiob 34:28.

[Mfonini wɔ kratafa 29]

Wobuu Kora ne wɔn a wɔne no tew atua no atɛn wɔ nea wɔyɛe no ho