“Galilea Nyinaa Agude”

NÁ KUROW bi da Nasaret, baabi a wɔtetee Yesu no atifi fam atɔe a wɔammɔ din da wɔ Nsɛmpa no mu. Ná efi hɔ kɔ Nasaret yɛ kwansin anan pɛ. Nanso, afeha a edi kan no mu Yudani abakɔsɛm kyerɛwfo Flavius Josephus a wagye din no kyerɛwee sɛ na wɔfrɛ kurow no “Galilea nyinaa agude.” Ná wɔfrɛ saa kurow no Sepphoris. Dɛn na yenim fa saa kurow yi ho?

Bere a Herode Ɔkɛse no wui bɛyɛ afe 1 A.Y.B. no, Sepphorisfo no tew atua tiaa Roma, na ɛma wɔsɛee wɔn kurow no. Herode ba Antipa bedii Galilea ne Peraea so na ɔkyekyee n’ahenkorow foforo wɔ Sepphoris amamfõ no so. Wɔsan kyekyee kurow no sisii mu adan te sɛ nea Helafo ne Romafo sisi wɔn adan nanso na Yudafo titiriw na wɔte kurow no mu. Sɛnea Ɔbenfo Richard A. Batey kae no, “ɛbɛyɛɛ kurow titiriw a aban no fi dii Galilea ne Perea so” kosii sɛ Antipa kyekyee Tiberia wɔ bɛyɛ afe 21 Y.B. sɛ ahenkurow de sii Sepphoris ananmu. Saa bere yi na na Yesu te bɛn saa kurow no.

Ɔbenfo James Strange a watutu Sepphoris amamfõ so hui sɛ na tete nneɛma akorae, baabi a wɔde sika sie, baabi a wɔde akode sie, sikakorabea, aban adwumayɛdan, ne gua a na wɔtɔn nkuku, nhwehwɛ, dadesɛn, agude ne nnuan ahorow wɔ kurow no so. Ná ntamawenfo ne ntamatɔnfo wɔ hɔ, na na wɔtontɔn nkɛntɛn, nkongua, sradehuam ne nneɛma afoforo nso wɔ sotɔɔ ahorow mu wɔ hɔ. Saa bere no na nnipa a wɔwɔ kurow no mu bɛyɛ 8,000 kosi 12,000.

So Yesu kɔɔ kurow a na emu yɛ hyew a efi Nasaret kɔ hɔ begye dɔnhwerew biako no? Nsɛmpa no nka ho asɛm. Nanso, The Anchor Bible Dictionary ka sɛ “ɔkwantempɔn a na efi Nasaret kɔ Kana a na ɛwɔ Galilea no twam Sepphoris kurow no mu.” (Yohane 2:1; 4:46) Sɛ wugyina Naseret a wutumi hu Sepphoris bepɔw a ne tenten bɛyɛ anammɔn 400 no. Ebinom adwene yɛ wɔn sɛ bere a Yesu maa mfatoho bi sɛ “kurow a ɛda bepɔw so ntumi nhintaw” no, ɛbɛyɛ sɛ na saa kurow yi ho asɛm na na ɔreka.—Mateo 5:14.

Bere a wɔsɛee Yerusalem wɔ afe 70 Y.B. no, Sepphoris bɛyɛɛ Yudafo kurow titiriw wɔ Galilea, na akyiri yi woyii Sanhedrin a na ɛyɛ Yudafo asɛnnibea kunini no kɔɔ hɔ. Ɛbɛyɛɛ kurow titiriw a na Yudafo a wɔn nhomanim kɔ kan no kɔtoa wɔn nhomasua so wɔ hɔ kosii bere bi.

[Asase mfonini/​Mfonini wɔ kratafa 32]

(Wopɛ nsɛm a wɔahyehyɛ awie no a, hwɛ nhoma no mu)

GALILEA

Kana

SEPPHORIS

Nasaret

Tiberia

Galilea Po

PEREA

[Mfonini wɔ kratafa 32]

Nkuku: Excavated by Wohl Archaeological Museum, Herodian Quarter, Jewish Quarter. Owned by Company for the Reconstruction of the Jewish Quarter in the Old City of Jerusalem, Ltd